Numbers 20

Dagbani Bible (Naawuni Kundi Kasi)

← Chapter 19 Jump to: Chapter 21 →

1Ka Izraɛlnim’ zaa daa kana ti paai Zin yɔɣu ni gol’ so ŋun daŋ tooni puuni n-ʒini Kadɛshi. Ka Miriam daa kpi nimaani, ka bɛ sɔɣ’ o nimaani.

2Kom daa ka nimaani ka niriba maa ni nyu, ka bɛ daa laɣim taai duŋ niŋ Musa mini Aduna.

3Ka niriba maa daa taai bahi Musa zuɣu, ka yɛl’ o, “Ti yi di daa pahi ti mabihi la zuɣu kpi Yawɛ tooni, di naan so.

4Bɔzuɣu ka a zaŋ tinim’ Yawɛ niriba ŋɔ ka yɔɣu ŋɔ ni na ni ti mini ti biŋkɔbiri ti kpi kpe?

5Ka bɔzuɣu ka a daa yihi ti Ijipti n-zaŋ ti na ti niŋ luɣ’ shɛli din bi viɛli ŋɔ? Luɣ’ shɛŋa nir’ ni yɛn biri chi bee n-sa fiig tihi bee n-sa wain tihi bee n-sa pumpɔrinchihi tihi kani, ka kom gba kani ka ti ni nyu.”

6Di saha ka Musa mini Aduna daa yi niriba maa sani n-chaŋ Yawɛ chirigibu shee suɣili maa dunol’ ni ti gbani n-zaŋ bɛ nina kpa tiŋa. Ka Yawɛ jilima neesim daa neei bɛ sani.

7Ka Yawɛ daa yɛli Musa,

8“Kpuɣim’ jaaŋgbee, ka a min’ a biɛli Aduna laɣim niriba maa na, ka a ti yɛli tampiŋ ŋɔ ni di chɛ ka kom yi di ni na bɛ zaa ninni. Lala ka a yɛn niŋ yihi kom tampiŋ maa ni na ti ba; ka bɛ mini bɛ biŋkɔbiri nyu.”

9Ka Musa daa shiri kpuɣi jaaŋgbee maa Yawɛ tooni kaman o ni daa zal’ o shɛm maa.

10Ka Musa mini Aduna daa laɣim niriba maa tampiŋ maa gbini ka Musa ti yɛli ba, “Yinim’ duŋtaariba ŋɔ, wummiya pumpɔŋɔ, ti chɛ ka kom yi kuɣili ŋɔ ni na n-tin ya?”

11Di saha ka Musa daa kpuɣ’ o jaaŋgbee maa zuɣusaa ŋ-ŋme tampiŋ maa buyi, ka kom pam daa yi di ni na, ka niriba maa mini bɛ biŋkɔbiri maa daa nyu.

12Amaa ka Yawɛ daa yɛli Musa mini Aduna, “Yi bi niŋ ma yɛda, ka bi wuhi n ni be kasi shɛm Izraɛlnim’ sani, dinzuɣu yi ku zaŋ ba kuli tiŋgbɔn shɛli n ni zaŋ ti ba maa ni.”

13Dimbɔŋɔ nyɛla Mɛriba kom, luɣ’ shɛli Izraɛlnim’ mini Yawɛ ni daa yɛl’ tab’ finafina ni luɣ’ shɛli o ni daa wuhi ni o nyɛla ŋun be kasi.

14Musa daa ti tim tuumba Ɛdom naa sani, ka bɛ yi Kadɛshi chaŋ ti yɛl’ o, “A mabihi Izraɛlnim’ ni yɛli shɛm m-bɔŋɔ: A mi wahala shɛli ti ni pun nya zaa yɛla.

15A mi ti yaannim’ ni daa kuli Ijipti, ka ti be nimaani yuui pam, ka Ijiptinim’ maa daa nahim ti mini ti yaannim’ maa pam shɛm la yɛla.

16Ka ti daa kuhi niŋ Yawɛ, ka o wum ti kuhigu maa ka daa tim o malaika na ka o ti yihi ti Ijipti maa na, ka ti kana ti be Kadɛshi tin’ shɛli din miri a tintariga la.

17Chɛ ka ti kpe a tiŋgbɔŋ ŋɔ ni gari. Ti ku tim yi puri ni bee yi wain tihi ni gari bee n-nyu yi kɔbilisi kom. Ti yɛn dolila solɔɣu gari. Ti ku ŋmaligi kpa nudirigu polo bee nuzaa polo hal ti yi a tiŋgbɔŋ maa ni.”

18Amaa ka Ɛdomnim’ daa yɛl’ o, “Yi ku kpe ti tiŋgbɔŋ maa ni gari, yi yi niŋ lala, ti ni ŋmɛn ya tɔbu.”

19Ka Izraɛlnim’ daa yɛl’ o, “Ti ni doli solɔɣu maa gari; ka ti mini ti biŋkɔbiri yi nyu yi kom, ti ni yo di zuɣu; ti ni kul bɔri shɛli nyɛla yi chɛ ka ti kana ti gari.”

20Amaa ka o daa lan yɛli, “Yi ku gari.” Ka Ɛdom naa maa daa zaŋ tɔbbihi pam bɛn gbib’ bidibbina pam kana ti gu ba soli.

21Ɛdom naa ni daa zaɣisi ni Izraɛlnim’ di tim bɛ tiŋgbɔŋ maa ni gari maa, ka Izraɛlnim’ maa daa taɣi doli shɛli polo gari.

22Ka Izraɛlnim’ zaa daa yi Kadɛshi m-mali ti paai Hɔr Zoli gbini.

23Di saha ka Yawɛ daa yɛli Musa mini Aduna Hɔr Zoli din daa be Ɛdom tintariga maa gbini,

24“Aduna ku paai n ni zaŋ tiŋgbɔn shɛli ti Izraɛlnim’ maa ni, o ni kpi, yi ni daa zaɣisi n zaligu Mɛriba kom la yɛla ni la zuɣu.

25Zaŋm’ Aduna min’ o bia Ɛliɛza du Hɔr Zoli zuɣu na;

26ka a ti yeei Aduna kpariti n-zaŋ li yɛl’ o bia Ɛliɛza; ka Aduna kpi nimaani n-chaŋ o yaannim’ sani.”

27Ka Musa daa niŋ kaman Yawɛ ni zal’ o shɛm maa. Ka bɛ daa chaŋ ti du Hɔr Zoli maa niriba maa zaa ninni.

28Ka Musa daa yeei Aduna kpariti maa n-zaŋ li yɛli o bia Ɛliɛza; ka Aduna daa shiri kpi zoli maa zuɣu. Ka Musa mini Ɛliɛza daa yi zoli maa zuɣu siɣina.

29Izraɛlnim’ zaa ni daa baŋ ni Aduna kpiya, ka bɛ zaa daa zaŋ biɛɣ’ pihita n-kum o kuli.

← Chapter 19 Jump to: Chapter 21 →