1 John 3

Ewe 2014 (EƲEGBE BIBLIA)

← Chapter 2 Jump to: Chapter 4 →

1Mikpɔ ale si gbegbe Tɔ́ la lɔ̃ mí la ɖa! Elɔ̃ mí ale gbegbe be woyɔa mí be Mawu viwo. Ẽ, nyateƒee, viawo míenye baa! Nu si ta koŋ xexea me medze si mí o lae nye be medze si Mawu o.

2Nye lɔlɔ̃tɔwo, fifia la, Mawu viwo míenye. Nu si tututu míava zu koŋ la medze nyuie haɖe o. Ke míenyae be ne Kristo va do la, míanɔ abe eya ŋutɔ ene, eye ale si tututu wòle lae míakpɔ.

3Ame sia ame si le mɔ kpɔm na Kristo alea la, kɔa eya ŋutɔ ɖokui ŋu, abe ale si Kristo hã le kɔkɔe ene.

4Ame sia ame si wɔa nuvɔ̃ la, zu Mawu ƒe sedzidala. Nu vɔ̃ nye Mawu ƒe sedzidada.

5Míenya be Kristo ɖe wòva be yeatsɔ amewo ƒe nuvɔ̃wo adzoe, eya ta nuvɔ̃ aɖeke mele eyama me o.

6Ame sia ame si le hadede me kple Kristo la, mewɔa nuvɔ̃ o. Ame sia ame si wɔa nuvɔ̃ la, mekpɔ Kristo kpɔ kaka ahayi si dze gee o.

7Vinyewo, migana ame aɖeke nable mi o. Ame sia ame si wɔa nu dzɔdzɔe la le dzɔdzɔe abe ale si Kristo hã le dzɔdzɔe ene.

8Ame si wɔa nuvɔ̃ la, vɔ̃ɖitɔ la tɔe wònye, elabe vɔ̃ɖitɔ la wɔ nuvɔ̃ tso keke gɔmedzedzea me ke. Nu si ta Mawu Vi la va ɖoe nye be yeagblẽ vɔ̃ɖitɔ la ƒe dɔwɔnawo keŋ.

9Ame sia ame si nye Mawu vi la, mewɔa nuvɔ̃ o, elabe Mawu ƒe nɔnɔme le eyama me. Mate ŋu awɔ nuvɔ̃ o, elabe Mawue nye Tɔ́a.

10Vovototo si le Mawu viwo kple vɔ̃ɖitɔ la viwo dome lae nye be: Ame sia ame si mewɔa nu dzɔdzɔe o, alo melɔ̃ nɔvia o la, menye Mawu vi o.

11Gbedeasi si miese le gɔmedzedzea me lae nye be ele na mí be míalɔ̃ mía nɔewo.

12Ke miganɔ abe Kain, ame si nye vɔ̃ɖitɔ vi eye wòwu nɔvia la ene o. Nu ka tae wòwui ɖo? Ewui, elabe eya ŋutɔ wɔ nuvɔ̃ɖi, ke nɔvia ya wɔ nu dzɔdzɔe.

13Nɔvinyewo, megawɔ nuku na mi be ame siwo le xexea me lé fu mi o.

14Le mía gome la, míenya be míeto ku me hege ɖe agbe la me, elabe míelɔ̃ mía nɔewo. Ame sia ame si melɔ̃ nɔvia o la, tsi ku me.

15Ame sia ame si lé fu nɔvia la, amewulae, eye mienya be agbe mavɔ mele amewula aɖeke me o.

16To esia me la, míenya nu si koŋ nye lɔlɔ̃: Eyae nye be Kristo tsɔ eƒe agbe na ɖe mía ta, eya ta ele na míawo hã be míatsɔ míaƒe agbe ana ɖe mía nɔewo ta.

17Nenye be xexemenuwo le ame aɖe si, eye hiã tu nɔvia wòkpɔ, gake eƒe dzi meʋãe be yeakpe ɖe eŋu o la, ale ke wòate ŋu agblɔ le eya ŋutɔ ƒe dzime be yelɔ̃ Mawui?

18Vinyewo, migana míatsɔ nya kple nuƒoƒo ko alɔ̃ amee o, ke boŋ míaƒe lɔlɔ̃ nanye nyateƒetɔ si adzé le míaƒe nuwɔna me.

19To esia me míenya be míenye nyateƒe la tɔ, eye dzi anɔ mía ƒo le Mawu ŋkume,

20ɣe si ɣi míaƒe dzi bu fɔ mí; elabe Mawu nye gã wu míaƒe dzi, eye wònya nu sia nu.

21Nye lɔlɔ̃tɔwo, nenye be míaƒe dzi mebu fɔ mí o la, ekema dzideƒo anɔ mía si le Mawu ŋkume.

22Míexɔa nu sia nu si míebiana la tso egbɔ, elabe míewɔa eƒe seawo dzi, eye míewɔa nu siwo dzea eŋu.

23Eƒe se lae nye be: míaxɔ Via Yesu Kristo dzi ase, eye míalɔ̃ mía nɔewo, abe ale si Kristo di tso mía si la ene.

24Ame siwo katã wɔa Mawu ƒe sewo dzi la, le Mawu me eye Mawu hã le wo me. To eƒe Gbɔgbɔ si wòna mí la me la, míenya be Mawu le mía me.

← Chapter 2 Jump to: Chapter 4 →