1 John 4

Ewe 2014 (EƲEGBE BIBLIA)

← Chapter 3 Jump to: Chapter 5 →

1Nye lɔlɔ̃tɔwo, migaxɔ ame siwo katã gblɔna be Gbɔgbɔ la le yewo me la dzi se o, ke mido wo kpɔ, ne miakpɔ ɖa be Gbɔgbɔ si le wo me la tso Mawu gbɔ vavã mahã. Elabe aʋatsogbeƒãɖela geɖewo do go le tsatsam le xexea me.

2Nu si miakpɔ anya be Gbɔgbɔ la tso Mawu gbɔe nye esi: Ame si gblɔna be Yesu Kristo va abe amegbetɔ ene la ƒe Gbɔgbɔ la tso Mawu gbɔ.

3Ke ame si meʋua Yesu me alea o la ƒe gbɔgbɔ la metso Mawu gbɔ o. Yesu ƒe futɔ ƒe gbɔgbɔ si ŋkɔ miese be egbɔna lae nye esia, eye azɔ la eva ɖo xexea me.

4Vinyewo, Mawu tɔwoe mienye eye mieɖu aʋatsogbeƒãɖela siawo dzi, elabe ame si ƒe Gbɔgbɔ le mia me la ƒe ŋusẽ tri akɔ wu ame siwo le xexea me la ƒe gbɔgbɔ tɔ.

5Esi wònye xexea me wotso ta la, xexea me nuwo ŋu ko woƒoa nu tsonɛ, eye ame siwo tso xexea me la ɖoa to wo.

6Ke míawo la, Mawu tɔwoe míenye. Ame sia ame si nya Mawu la, ɖoa to mí, eye ame si ke menye Mawu tɔ o la, meɖoa to mí o. Nu sia míekpɔna hedzea si Gbɔgbɔ si nye nyateƒe tɔ kple esi nye alakpa tɔ la.

7Nye lɔlɔ̃tɔwo, mina míalɔ̃ mia nɔewo, elabe Mawu gbɔe lɔlɔ̃ tso. Ame sia ame si lɔ̃a ame la, Mawu vie wònye, eye wòdze si Mawu.

8Ame sia ame si melɔ̃a ame o la, medze si Mawu o, elabe Mawu nye lɔlɔ̃.

9Ale si Mawu ɖe eƒe lɔlɔ̃ fia mí lae nye be edɔ eya ŋutɔ Via ɖeka hɔ̃ la ɖo ɖe xexea me bene míanɔ agbe to eyama dzi.

10To esia me la, míenya nu si koŋ nye lɔlɔ̃. Menye ale si míawo míelɔ̃ Mawu lae nye lɔlɔ̃ o, ke boŋ ale si Mawu lɔ̃ mí, eye wòdɔ Via ɖo ɖa be wòanye ame si dzi yeato atsɔ míaƒe nuvɔ̃wo ake mí lae nye lɔlɔ̃.

11Nye lɔlɔ̃tɔwo, esi Mawu lɔ̃ mí alea ta la, ele na míawo hã be míalɔ̃ mía nɔewo.

12Ame aɖeke mekpɔ Mawu kpɔ o. Ne míelɔ̃ mía nɔewo la, ekema Mawu le mía me, eye wòwɔ eƒe lɔlɔ̃ la wòde blibo le mía me.

13Ale si míewɔ nya be míele Mawu me, eye Mawu hã le mía me lae nye be etsɔ eya ŋutɔ ƒe Gbɔgbɔ la na mí.

14Míekpɔ esia, eye míetsɔe ɖe gbeƒãe na amewo be Tɔ́ la ɖo Via ɖa be wòava zu amewo Ɖela le xexea me.

15Ame sia ame si ʋua eme be Yesue nye Mawu Vi la la, Mawu le eyama me, eye eya hã le Mawu me.

16Ale míawo míedze si Mawu ƒe lɔlɔ̃ si wòtsɔ na mí la, eye míexɔ edzi se hã. Mawu nye lɔlɔ̃, eye ame sia ame si lɔ̃a ame la, ele Mawu me, eye Mawu hã le eme.

17Esia ta wòle be lɔlɔ̃ nade blibo le mía me, ale be dzideƒo nanɔ mía si le ʋɔnudrɔ̃gbe la, elabe míaƒe agbenɔnɔ le xexea me sɔ kple Kristo tɔ.

18Vɔvɔ̃ aɖeke mele lɔlɔ̃ me o, ke lɔlɔ̃ si de blibo la nyaa vɔvɔ̃ ɖa. Eya ta ame si vɔ̃na la ƒe lɔlɔ̃ mede blibo o, elabe vɔvɔ̃ hea tohehe vanɛ.

19Míelɔ̃a Mawu elabe eyae lɔ̃ mí gbã.

20Ne ame aɖe gblɔ be: “Melɔ̃ Mawu” evɔ wòlé fu nɔvia la, aʋatsokala wònye. Elabe ame sia ame si melɔ̃a nɔvia si wòkpɔna o la, mate ŋu alɔ̃ Mawu si mekpɔna o la hã o.

21Ale se si Kristo na mí lae nye be: Ame sia ame si lɔ̃a Mawu la, nelɔ̃ nɔvia hã.

← Chapter 3 Jump to: Chapter 5 →