Lamentations 5

Ewe 2014 (EƲEGBE BIBLIA)

← Chapter 4 Jump to:

1Ao! Aƒetɔ, ɖo ŋku nu si dzɔ ɖe mía dzi la dzi. Trɔ kɔ, nàkpɔ míaƒe ŋukpe ɖa!

2Wotsɔ míaƒe domenyinu na amedzrowo, míaƒe aƒewo zu ame manyamanyawo tɔ.

3Míezu tsyɔ̃eviwo; tɔ́ mele mía si o, mía nɔwo le abe ahosiwo ene.

4Ele be míadze tsi hafi ano, aƒle nake hafi ado dzo.

5Kɔkuti le kɔ na mí, woyɔ mí ɖe nu kplìkplikpli, ɖeɖi te mía ŋu; ke womeɖe mɔ na mí be míagbɔ ɖe eme o.

6Míena ta Egipte kple Asiria, bene míakpɔ nu aɖu aɖi ƒo.

7Mía tɔgbuiwo wɔ nuvɔ̃; womegali o. Míawo míele fu kpem le woƒe nuvɔ̃ɖi wɔwɔwo ta.

8Kluviwo le mía dzi ɖum, ke ame aɖeke meli aɖe mí le wo si me o.

9Yi le asi le gbedadaƒo; ale be ɖe míetsɔa míaƒe agbe kena hafi dia nuɖuɖu vaa aƒee.

10Dɔwuame sesẽ na míaƒe ŋutigbalẽ ʋu dzo abe kpodzo me ene.

11Wode asi nyɔnuwo ŋu sesẽtɔe le Zion, eye wogblẽ ɖetugbiwo le Yuda-duwo me.

12Wode ka dukplɔlawo ƒe abɔ tsi ɖe ya me, eye womede bubu aɖeke amegãɖeɖiwo ŋu o.

13Wozi ɖekakpuiwo dzi wole nu tum le té dzi, eye ŋutsuviwo le ƒoƒom le nakegba te.

14Ame tsitsiwo dzo le dutakpeƒe, eye ɖekakpuiwo dzudzɔ hadzidzi.

15Míaƒe dzidzɔkpɔkpɔ nu tso; konyifafa xɔ ɣeɖuɖu teƒe.

16Fiakuku la ge le mía ta! Nu wɔ mí loo! Elabe míewɔ nuvɔ̃.

17Míaƒe dzi dze dɔ le esia ta, míaƒe ŋkuwo dzi wɔ flukpee le nu siawo ta,

18elabe Zion-to zu gbegbe, afi si akpatakuwo le tsatsam le.

19Ke wò Aƒetɔ la, èle fia ɖum tegbee, eye wò fiazikpui li tso dzidzime yi dzidzime.

20Nu ka ta nèŋlɔ mí be ɖikaa? Nu ka ta nègblẽ mí ɖi eteƒe didi ale?

21Aƒetɔ, gbugbɔ mía gɔme ɖo anyi ɖe gbɔwò, ne míanɔ te. Gbugbɔ egbeŋkekewo wɔ yeyee na mí abe tsãtɔwo ene.

22Alo ɖe nègbe mí keŋkeŋua? Ðe nèdo dziku ɖe mía ŋu ale gbegbea?

← Chapter 4 Jump to: