1 Corinthians 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Upéicha ñande rapichakuéra tañanderechakuaa ñande jaikoha Hesu Crísto rembiguái ramo, ha Ñanderuete mba’e ñemi rerekua ramo.

2Oñeha’ãrõ ningo ko’ã terekua (capataz) tojejohu hekópe ha opia’ỹre heko porãgui.

3Chéve g̃uarã ningo mba’e výro rei, peẽ chembojovake ramo térã ambue che rapicha chembojovake ramo, che jepeve nañembojovakéi.

4Ndaikuaái ramojepe mba’eve ivaíva ajapoha’aína, che ndaikatúi ha’e chepotĩha, Ñanderuete voi chembojovakéta hekoitépe.

5Upévare peha’ãrõ Hesu Crísto ouha ára peve, Ha’e ombojovake hag̃ua. Ha’e voi omyesakãmbáta umi mba’evai ha iporãva oñemivahína pytũmbýpe jepe, ha Ha’e ohechaukáta ñande py’apy rembipota jepe; upépe ae peteĩteĩva ohupitýta pe hekopeteguáva Ñanderuetégui.

6Che hermanokuéra, che pohayhúgui ha’e peẽme ko mba’e kóva che rembiapokue ha Apólos rembiapokue rehe, peẽ pehechakuaa porã hag̃ua ko ñe’ẽ he’íva: Avave ndohoiva’erã amo gotyove Ñanderuete ñe’ẽ he’ívagui, ani hag̃ua avave oñembotuicha oñemoĩvo hapicháre.

7Máva piko nemoĩra’e ambuekuéra ári. Mba’e piko reguereko rehupity’ỹva’ekue Ñanderuetégui. Ha rehupitypa rire piko, mba’érehe reñembotuicha rehupity’ỹrõ guáicha.

8Peneryg̃uatãma, penemba’etáma, peiko mburuvichaguasúicha oikotevẽ’ỹva ramo mba’eve orehegui. Mba’éichatamora’e oiko pendehegui mburuvichaguasu, ore roiko hag̃ua avei mburuvichaguasu ramo penendive.

9Hi’ã ningo chéve, Ñanderuete ombotapykueha ore apostolkuérape, roiko hag̃ua mba’evai apohára ojejukátava ramoguáicha, ha péicha roiko ñembosarái ramo opaite yvága remimboukuérape ha yvyariguakuérape avei.

10Ore ningo orevýro Hesu Crísto rehehápe, peẽ katu peiko iñarandúvaicha Cristopype; orekangy, peẽ katu penembarete; orerehe ojejahéi, peẽ katu peñemomba’eguasu.

11Ko’ág̃a peve ningo oreñembyahýi, orey’uhéi, oreopívo, roñenupã, ndaorerogateéi,

12ha orekane’õ romba’apo haguére ore poteépe; rojeja’o ramojepe ore rohovasa; roñemuña ramojepe ore rogueropu’aka kirirĩháme;

13oñe’ẽvai ramo hikuái orerehe, ore rombohovái ñe’ẽ porã reheve. Ore roiko ytýicha térã gue’ẽnguéicha (vomitokuéicha).

14Che ndahaíri ko mba’e kóva pomotĩ hag̃ua, pohekombo’e hag̃uánte uvei, pohayhúgui che ra’ykuéraicha.

15Peẽ peguereko ramojepe 10.000 penerekombo’éva Hesu Crísto rapére, napenderu hetamo’ãi, che ningo pende ru, amombe’u haguére peẽme Ñanderuete ñe’ẽ porã, peiko hag̃ua Hesu Crísto reheguáva ramo.

16Upévare che ajerure peẽme, peguata hag̃ua che pyporépe.

17Upévare amondo avei Timotéope pene rendápe, ha’e ningo che ra’y ahayhúva ha oguatáva hekópe Hesu Crísto rapére, ha’e voi penemomandu’áta mba’éichapa che aguata’aína Hesu Crísto rape rehe, ha opaite mba’e che ambo’eva’aína guive ambue iglesiakuérape.

18Oime ningo pende apytépe umi ojererovúva oimo’ãgui che ndahamo’ãveimaha pene rendápe.

19Voiete ahase pene rendápe, Hesu Crísto oipota ramo, aikuaa hag̃ua umi ojererovúva pu’aka, ndaikuaaséi iñe’ẽnguéra.

20Ñanderuete oisãmbyhy ipu’aka rupi, noisãmbyhýiri ñe’ẽ heta rei rupi.

21Mba’épa peipota. Yvyra po’i rehevépa aha hag̃ua pene rendápe, térãpa mborayhu ha pytu porã ñemomirĩ reheve.

← Chapter 3 Jump to: Chapter 5 →