1 Corinthians 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Ko’ág̃a ambohovaise umi mba’e peporanduva’ekue chéve: Kuimba’épe g̃uarã iporãve ha’e nomendái ramo,

2opáichavo ani hag̃ua ho’a teko ky’ápe, iporã peteĩ kuimba’e oguereko hembirekoteéva, ha peteĩ kuñakarai oguereko imenateéva avei.

3Pe ména katu toiko hekópe hembireko ndive, ha péicha avei pe tembireko toiko hekópe iména ndive.

4Pe tembireko ndaha’éi hetetee jára, iména mba’e; ha péicha avei pe ména ndaha’éi hetetee jára, hembireko mba’e.

5Anítei peñombotove ojuehegui, peñemoĩrõ peteĩ ñe’ẽmente mbovy ára peñembo’e hag̃ua, uperire katu peiko jevy oñondive, ani hag̃ua Satana penera’ã ndapejejokokuaáigui, ha pe’a teko ky’ápe.

6Ko’ã mba’e che ha’e chejehegui, ndaha’éi Ñanderuete rembiapoukapy.

7Aipotánte ningo opavave oiko chéicha; Ñanderuete katu ombohasa peteĩteĩme ime’ẽmbyteéva, peteĩme péicha ha ambuépe amóicha.

8Umi omenda’ỹva ha umi imenave’ỹva iporã opyta chéicha.

9Ndojejokokuaái ramo katu tomenda, iporãve omenda, iñakãraku tapia rãngue ha okái.

10Ha umi omendávape Hesu Crísto he’iuka, ndachéi: Tembireko anítei opoi iménagui, ha pe ména anítei opoi hembirekógui térã omosẽ ichupe.

11Pe tembireko opoi ramo iménagui, nomendaveimava’erã térã oñemoĩ porã jevyva’erã imenakue ndive.

12Ambuekuérape katu che ha’e, ndaha’éi Hesu Crísto ñe’ẽ: Peteĩ ñane hermáno oiko ramo hembireko ojerovia’ỹva ndive, ha ha’e oikosehína hendive, anítei omosẽ hembirekópe.

13Ha peteĩ ñane hermána oiko ramo iména ojerovia’ỹva ndive, ha ha’e oikosehína hendive, anítei ha’e omosẽ iménape.

14Pe ména ojerovia’ỹva oñemboheko potĩ hembireko ojeroviáva rupi, ha pe tembireko ojerovia’ỹva oñemboheko potĩ ñane hermáno rupi, upeicha’ỹ rire pene mitãkuéra heko ky’ava’erãmo’ãma, ko’ág̃a katu oñemboheko potĩma avei Hesu Crísto rupi.

15Pe ojerovia’ỹva opoise ramo hembirekógui térã iménagui, topoi katu. Upéicha ramo ñane hermáno térã ñane hermána noñeñapytĩvéi hendive, upémaramo ojopoikuaa. Ñanderuete katu ñanerenói jaiko hag̃ua py’aguapýpe.

16Mba’éicha rupi piko nde, tembireko, reikuaase ikatuha resalva ne ména ojerovia’ỹvape. Térãpa nde, ména, mba’éicharupi piko reikuaase nde ikatuha resalva ne rembireko ojerovia’ỹvape.

17Peteĩteĩ toiko Ñanderuete ome’ẽ haguéicha ichupe, ha Ñanderuete ohenói ramoguare ichupe. Ko’ã mba’e ko’ãva che ambo’e opaite iglésiape.

18Ñanderuete ohenói ramo peteĩ oñekytĩ’ova’ekuépe, anítei ha’e opoi pe Juda rekógui, ha Ñanderuete ohenói ramo peteĩ oñekytĩ’o’ỹva’ekuépe, anítei ha’e opoise pe hetã ambueygua rekógui.

19Pe Judaygua pire’i ñekytĩ’ova’ekue (oñecircuncidáva) ndaha’éi mba’eve, ha pe tetã ambueygua ñekytĩ’o’ỹ ndaha’éi avei mba’eve. Ñanderuete resápe ovalénte umi iñe’ẽrendúva ha ojapóva Ñanderuete rembipota añetete háicha.

20Oimeraẽva opytava’erã pe (teko) oikohápe ha Ñanderuete ohenói ramoguare ichupe.

21Nde reiko tembiguái (esclávo) ramo Ñanderuete nerenói ramoguare, ani rejepy’apy mba’éichapa reñemosãsokuaa, Ñanderuete katu ombohapepáta ñesãso ne rembiguái rekógui, evy’a katu.

22Pe tembiguáipe oñeme’ẽma sãso, opyta Hesu Crísto rembiguáirõ, ha pe karai oikomava’ekue sãsóme opyta Hesu Crísto rembiguáirõ (ojeroviágui hese).

23Hepy rehe Ñanderuete pendejoguava’ekue, upévare anítei peiko nde rapicha rembiguái ramo.

24Upévare, che hermanokuéra peteĩteĩ opytava’erã (hekópe) ha’e oikohápe Ijára renondépe, Ñanderuete ohenói ramoguare ichupe (ojerovia hag̃ua).

25Umi kuñataĩ omenda’ỹvape ningo che ndaguerekói Hesu Crístogui peteĩ tembiapoukapy, che ambohasase katu che pensamiénto, Ñanderuete ohechaukágui chéve iporiahuvereko ha aikógui hembiguái heko peguáva ramo.

26Hi’ã chéve, pe jehasa asyrã rehe, oimeraẽ kuimba’e térã kuña iporãveha opyta oĩ haichaite.

27Reñeñapytĩ ramo ne rembireko rehe, ani repoi ichugui. Rejepoímapa ani rehekátei jevy peteĩ kuñáme.

28Pe omendaséva ndojapói angaipa, ha peteĩ kuñataĩ omenda’ỹva omenda ramo ndojapói avei angaipa umi omendáva katu ohasa asýta, che ndaipotáiva pehasa.

29Che hermanokuéra, kóva katu ha’ese peẽme: Mbovy ára (póco tiémpo) hemby ñandéve, upévare umi omendáva toiko omenda’ỹ ramoguáicha,

30ha umi hasẽva toiko hasẽ’ỹ ramoguáicha, ha umi ovy’áva toiko ovy’a’ỹva ramoguáicha, ha umi ojoguáva toiko oguereko’ỹ ramoguáicha,

31ha umi oiporúva ko yvy arigua mba’e toiko oiporu’ỹ ramoguáicha; ko yvy ha ára ohasava’erã katuete.

32Ndaipotái peẽ peneangekõi. Pe omenda’ỹva oñangarekóva Ñanderuete mba’éva rehe, ombovy’a hag̃ua ichupe.

33Pe omendáva katu ojepy’apy ko yvy arigua mba’e rehe, ha oiko ombovy’a hag̃ua hembirekópe, péicha oiko py’a mokõime.

34Pe kuña omenda’ỹva ha pe kuñataĩ oñangarekóva Hesu mba’e rehe, omboykégui hete ha ipytu porã Ñanderuetépe g̃uarã; upe omendáva katu oñangareko ko yvy arigua mba’e rehe ha mba’éichapa ombovy’áta iménape.

35Che ningo ha’e peẽme ko’ã mba’e poipytyvõ hag̃uánte, ndapoityséi ñuhãme, peñeñapytĩ uvei Ñanderuete rehe ha peiko hekópe.

36Upe túva, oimo’ãva ojapo vaiha nomomendái ramo itajýra ityarõvape, tojapo ojaposéva, tomomenda, péva ningo ndaha’éi angaipa.

37Ha oime ramo peteĩ túva oresolvéva ipy’apýpe ha ndojejopýigui mba’evépe, nomomendái hag̃ua itajýrape, ojapo porã avei.

38Upéicha upe omomendáva itajýrape ojapo porã, ha upe nomomendáiva itajýrape ojapo porãve.

39Pe kuña omendáva oñeñapytĩ iména rehe, ha’e oikove aja. Omano ramo iména, ha’e isãso jevy, ikatu omenda omendaséva rehe, ha’e ojerovia guive Hesu Crísto rehe.

40Ovy’avéta, chéverõ g̃uarã, opytárõ ha’eño, ha hi’ã ningo chéve aguerekoha avei Ñanderuete Pytu Porãite.

← Chapter 6 Jump to: Chapter 8 →