1 Corinthians 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Oñehendu ningo peteĩ heko ky’áva oikoha pende apytépe, koichagua teko meg̃ua noñehendúi gueteri oĩha ojerovia’ỹva Hesu Crístore apytépe jepe, peteĩ oguerekóva ikuña ramo isy angápe.

2Ha peẽ pejererovu gueteri, peñembyasy ha pemosẽ rãngue ichupe pende apytégui.

3Che rete reheve naiméi ramojepe pende apytépe, che pytu porãme katu aĩ upépe, ha ambojovakéma ichupe, che aimérõ guáicha che retépe pende apytépe.

4Peñembyaty Ñandejára Hesu Crísto rérape ha che aiméta penendive che pytu porã rupi, ha Ñandejára Hesu Crísto pu’aka reheve,

5ñame’ẽ pe kuimba’e pévape Satanáme, ha’e ombyai hag̃ua hete ojesalva hag̃ua ipytu porã Hesu Crísto ouha árape.

6Naiporãi peẽ peñembotuicha. Ndapeikuaái piko michĩmi levadúra ombovupaha pe mása (apatuka).

7Pemombo pe levadúra tuja, oiko hag̃ua pendehegui peteĩ mása pyahu, ha Hesu Crísto oiko hag̃ua pende rekovépe levadúra pyahu ramo, Ha’e voi ningo ojejuka páscuape ñanderehehápe.

8Upévare ñamboarete pe páscua pan reheve ojejapóva levadura’ỹre, péva he’ise teko potĩme ha añetegua reheve, ha ñamombo pe levadúra tuja, péva he’ise teko ñaña ha teko ky’a.

9Che ha’eukáma peẽme che kuatiañe’ẽ rupi ani hag̃ua pejehe’a ni peiko pe heko ky’áva ndive.

10Nda’éi ningo peẽ pejeiete hag̃ua opaite heko ky’ávagui, oikóva ko yvy apére, térã ha’entesévagui, térã mondahágui, térã ta’ãnga omomba’eguasúvagui, péichataramo ningo pesẽva’erã ko yvy apégui.

11Ko’ág̃a che kuatiañe’ẽ rupi ha’eukáma peẽme pejei hag̃ua umi hermáno gua’úgui, oikóva iglesiayguakuéra apytépe ha oikovahína gueteri upe teko ky’ápe, térã ha’enteséva, térã ta’ãnga omomba’eguasúva, térã oñe’ẽ reíva hapicháre, térã oka’úva, térã omondáva.

12Ndaijái chéve ambojovake hag̃ua umi oka peguávape, ñande ñambojovake raẽva’erã iglesiayguakuérape.

13Umi oka peguávape ningo Ñanderuete ombojovakeva’erã. Pemosẽ katu pende apytégui pe tekove ky’a pévape.

← Chapter 4 Jump to: Chapter 6 →