Ephesians 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Che, Páblo, Hesu Crísto apóstol, Ñanderuete ha Hesu Crísto rembipota rupi, ahai ko kuatiañe’ẽ umi oñemboykéva Hesu Crístope g̃uarã ha umi ojeroviáva Hesu Crísto rehe oikóva guive Efésope.

2Ñandejára Ñanderuete ha Ñandejára Hesu Crísto py’aporã ha ipy’aguapy toĩ penendive.

3Toñemomba’eguasu Ñanderuete ha Ñandejára Hesu Crísto Rúpe, Ha’e ome’ẽ haguére ñandéve opaichagua yvága pegua jopói (jehovasa Pytu Porãmbáva rehegua) Hesu Crísto rupi.

4Ñanderuete ñandeporavomava’ekue Hesu Crísto rupi ko yvy ha yvagakuéra oiko mboyve. Ha’e ñanemboyke jaiko hag̃ua heko potĩva ramo henondépe mborayhu añeteguapýpe.

5Ymaite guive Ñanderuete ñandeporavo jaiko hag̃ua ita’ýra ha itajýra ramo Hesu Crísto rupi, imba’eteerã ramo hembipota porã rupi,

6ñande ñamomba’eguasu hag̃ua ichupe tapia g̃uarã, Ha’e ipy’a porã haguére, ha Ha’e ohechauka haguére ñandéve iporiahuvereko Ita’ýra Hesu Crísto rupi.

7Hesu Crísto ruguy ñandesalva ha Ha’e operdona avei ñane rembiapo vai, ipy’aporã ituichaitégui.

8Ha’e oñohẽ jo’a jo’a ñande’ári iñarandu ha ikuaapy.

9Ha oikuaauka ñandéve hembipota ñemi, hi’ã porã haguéicha ichupe, ha Ha’e oipota háicha.

10Ha og̃uahẽvo pe ára Ñanderuete oiporavova’ekue, ojehecháta Ñanderuete propósito (plan), Ha’e oguerekóva Ita’ýra Hesu Crísto ndive, upémaramo opaite mba’e oĩva guive yvagakuérape ha yvy apére og̃uahẽta hu’ãme Hesu Cristopype.

11Ñanderuete ñandeporavo Hesu Crísto rupi, Ha’e oipotágui jajesalva Ita’ýra rupi; Ñanderuete ojapopa hekópe Ha’e voi oipota háicha.

12Ñande jajerovia ñepyrũ guive ñamoĩma ñane esperánza hese, upévare ñamomba’eguasuve jahávo Ñanderuete teko jajaipávape.

13Peẽ pehendu rire pe ñe’ẽ añeteguáva, pe evangélio oporosalváva, pejerovia avei Hesu Crísto rehe ha peñemarcáma pe Pytu Porãmbávape.

14Ko Pytu Porãmbáva ningo pe adelánto (ñemohenonde) umi mba’erãgui oñeme’ẽtava ñandéve g̃uarã. Ko jopói kóva térã ko salvacion rupi ñande japytáta imba’eteerã ramo, ñamomba’eguasu hag̃ua Ñanderuete reko jajaipávape.

15Upévare che ahendu guive peẽ pejerovia porãha Hesu Crísto rehe ha pehayhuha añetehápe opaite Hesu Crísto reheguávape,

16Che Páblo, ndapoíri agradece hag̃ua (Ñanderuetépe) chemandu’ávo penderehe che ñembo’épe.

17Ha Ñanderuete, pe teko jajaipa Jára ha Ñandejára Hesu Crísto Ru tome’ẽ peẽme pe Pytu Porãmbáva rehegua arandu ha tojehechauka peẽme peikuaa porãve hag̃ua pehóvo ichupe,

18ha tohesape pende py’apy resa peikuaa hag̃ua mba’épa he’ise pe esperánza peẽ peguerekóva, Ha’e penerenóigui, pehechakuaa porã hag̃ua pe jopói tuichaitéva Ha’e ombosako’ímava Hesu Crísto reheguávape g̃uarã,

19ha peẽ peikuaa hag̃ua avei Ñanderuete pu’aka tuichaitereíva omba’apoha ñande jajeroviáva rekovépe ñanemombarete ha ñanemokyre’ỹve hag̃ua jahávo.

20Ñanderuete pu’akaguasu omba’apova’ekue Hesu Cristopype omoingove jevy hag̃ua ichupe omanova’ekue apytégui, ha upéi omboguapy avei ichupe yvágape Ñanderuete akatúape.

21Ha Ñanderuete ombo’yvatete Hesu Crístope opaichagua mburuvicha ári, mburuvichaguasu hesaitéva ári, pu’akaguasu ári, jára ári ha opaite téra ári, ndaha’éi ko ára atyguasu kóva añómente, upe ouva’erãme avei.

22Ha’e omoĩ opaite mba’e ipy guýpe ha omoĩ avei Hesu Crístope ijiglésia akã ramo.

23Pe iglésia ningo Hesu Crísto rete (hembirekorã), ha Ha’e omyenyhẽmbáta ijiglésiape oñemboheko porãve hag̃ua ohóvo, ha ijiglésia henyhẽmba hag̃ua Hesu Crísto reko porãgui.

Jump to: Chapter 2 →