Ephesians 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Che Páblo, aĩva cárcelpe Hesu Crísto rehehápe, ajerure peẽme peiko hag̃ua hekópe Ñanderuete oipota háicha ha peñehenoiva’ekuépe,

2opaite ñemomirĩ ha py’aporã reheve, ha paciéncia reheve pejogueraha porã hag̃ua oñondivepa mborayhu añeteguáva rupi,

3ha peñeha’ã pende py’aite guive peñemopeteĩ hag̃ua Pytu Porãmbavapype ha py’aguapy añeteguáva rupi.

4Oĩ peteĩ tete año (pe iglésia) ha oĩ peteĩ Pytu Porãmbáva año ha penehenóiva peiko hag̃ua peteĩ esperánzape.

5Peteĩ Ñandejára, peteĩ jerovia, peteĩ bautísmo,

6peteĩ Jaraitéva ha peteĩ Ñanderuete oĩva opavavéva ári, omba’apóva ha oikóva opavavéva py’apýpe.

7Hesu Crísto ome’ẽma peteĩteĩme hembiaporã ha ime’ẽmby Ha’e oha’ã (omedi) haguéicha.

8Upévare Ñanderuete kuatiañe’ẽme he’i: Ha’e ojupi yvate ha ogueraha hendive heta ojepokuávape (prisionéro) ha ome’ẽ tetãyguakuérape ime’ẽmbykuéra, (Salmokuéra 68,19).

9Mba’épa he’ise, Ha’e ojupi. He’ise, Ha’e oguejy raẽ hague avei pe yvy ipypukuvehápe.

10Pe oguejymava’ekue ningo Hesu Crísto voi ha pe ojupiva’ekue opaite yvagakuéra ári Ha’e voi avei, Ha’e omyenyhẽ hag̃ua ijehegui opaite mba’e oĩva guive yvýpe ha yvagakuérape.

11Hesu Crísto voi ome’ẽ ime’ẽmbykuéra (dónes) ijiglesiayguakuéra apytépe oiko hag̃ua: Apostolkuéra ramo, ambuekuéra proféta ramo, ambuekuéra omyasãi hag̃ua pe evangélio (evangelísta ramo), ambuekuéra pastor ramo (iglésia rerekua ramo) ha ambuekuéra mbo’ehára ramo,

12oñembosako’i porã hag̃ua Hesu Crísto reheguávape hembiaporãme, oipytyvõ ha omopu’ã hag̃ua Pytu Porãmbáva pu’aka rupi Hesu Crísto rete, ha kóva voi ningo ijiglésia,

13ñande jahupitypa hag̃ua peteĩ jerovia año ha ñanemopeteĩ hag̃ua Hesu Cristopype ha ñanemopeteĩ meve avei ñande kuaapy arandu jarekóva Ñanderuete Ra’y rupi, jakakuaa porã hag̃ua ha ñane kuimba’e ha kuña reko oñemoĩmba hag̃ua Pytu Porãmbáva poguýpe ha upéicha jahupity hag̃ua ñande rekovépe Hesu Crísto reko henyhẽva, oiko hag̃ua ñandéhegui kuimba’e ha kuña tyarõ porãmbáva (oĩmbaitéva).

14Anive jaiko mitãicha ojererotyryrýva ágotyo pégotyo, oñaníva oimeraẽichagua mbo’epy yvytu rapykuéri, ohendu hag̃ua umi tekove ensuguy japúpe oporombo’éva ombotavy hag̃uánte hapichakuérape, upévare ñañeñangarekóke ani hag̃ua ja’a iñuhãme,

15jaiko katu mborayhu añeteguáva poguýpe ha jakakuaave hag̃ua jahávo opaite mba’épe Hesu Crísto gotýo, Ha’e voi ningo pe iglésia akã.

16Ha’érupi pe tete (iglésia) ojoapypa ha oñembojoajuhína ohóvo peteĩteĩ tete rehegua rembiapo ha ñepytyvõ porã rupi, okakuaa porãmba hag̃ua opaite tete, oñemopu’ãvahína mborayhu añeteguáva rupi.

17Kóva ningo che ha’e ha aikuaauka peẽme Hesu Crísto rérape anive hag̃ua peiko umi tetãyguakuéra oiko háicha, ipy’apy rembipota vai oisãmbyhýgui ichupekuéra.

18Ipensamientokuéra iñypytũmba, oñemomombyry Ñanderuete jeikovégui ndoikuaáigui ha oñembopy’a hatãgui hikuái.

19Notĩvéi hikuái ojeity hag̃ua opaichagua teko ky’ápe, ndojejokosevéigui.

20Péicha peẽ ndapeikuaaiva’ekue Ñandejára Hesu Crístope.

21Oñemombe’u porã katu Ñanderuete evangélio ha ojehekombo’e porã avei Hesu Crísto añeteguáre.

22Pepoi pende reko tujágui, pe yvy arigua reko tuja oñembyaihína heko vai rembipota rupi.

23Peẽ peñembopyahupeína pende pytu porãme ha pende py’apýpe.

24Pemondéma pe tekove pyahu ha teko pyahúpe, Ñanderuete omoingovemava’ekue pendepype, peiko hag̃ua teko porãme pe Pytu Porãmbáva oisãmbyhy háicha pende rekove.

25Upévare pepoi japúgui, peje pe añetegua pende rapichakuéra ndive, ñande ningo peteĩ tete reheguánte.

26Peẽ pendepochy ramo ani peñemoangaipa. Ani peheja oike pe kuarahy pende pochy reheve.

27Ani peme’ẽ Satanáme hendag̃ua (pende rekovépe).

28Upe omondáva anive omonda, toñeha’ãmba uvei omba’apo hag̃ua ipo rupi, ome’ẽkuaa hag̃ua upe oikotevẽvape.

29Mba’eveichagua ñe’ẽ tie’ỹ ani osẽ pende jurúgui, pejénte ñe’ẽ porã omopu’ãva’erãichagua nde rapichápe ijehasa asýpe ha ombopy’aguapy hag̃ua nerendúvape.

30Ani pembopy’ambyasy Ñanderuete Pytu Porãmbávape, Ha’érupi peñemarcamava’ekue salvacion árape g̃uarã.

31Opaichagua py’aro, pochy ñarõ, pochy rei, sapukái pochy, juru tie’ỹ, tojeipa pendehegui, opaichagua ambue ñaña reheve.

32Tapendepy’a porã uvei oñondive, peñopytyvõ, pejoporiahuvereko, peñoperdona, Ñanderuete peneperdona háicha avei Hesu Crísto ruguy rupive.

← Chapter 3 Jump to: Chapter 5 →