Ephesians 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Upévare che, Páblo, aĩ cárcelpe Hesu Crísto rayhupápe, amyasãi haguére Ñanderuete ñe’ẽ porãite peẽ tetã ambueyguakuéra apytépe.

2Katuete pehendúma oñeme’ẽ hague chéve Ñanderuete mborayhu amyasãi hag̃ua pe evangélio tetã ambueyguakuéra apytépe.

3Upévare Hesu Crísto ojehechauka avei chéve omyesakã hag̃ua chéve Ñanderuete ñemimby, che ahai mbykymi haguéicha peẽme.

4Ha pemoñe’ẽvo che kuatiañe’ẽ pehechakuaáta Hesu Cristoha Ñanderuete ñemimby, Ha’e oikuaauka haguéicha chéve.

5Ko Ñanderuete ñemimby kóva ndojehechaukái yvyariguakuérape umi ára atyguasukuéra ohasava’ekuépe, ojehechauka háicha ko’ág̃a ijapóstol ha iprofetakuérape Pytu Porãmbáva rupi.

6Ko’ágã Ñanderuete ohechaukáma Ipytu Porãite rupi umi tetã ambueygua ohupitymaha avei Israelguakuéra ndive Ñanderuete jopói, oiko hag̃ua peteĩ teterõguáicha Israelguakuéra ndive, ha ichupekuéra oñeme’ẽma avei Ñanderuete promésa Hesu Crísto evangélio rupi.

7Che, Páblo, aiko Hesu Crísto remimondo ramo Ñanderuete mborayhu me’ẽmby ha ipu’aka rupi, che amyasãi hag̃ua Ñanderuete ñe’ẽ porãite (evangélio).

8Che ningo pe imichĩetevéva opaite Hesu Crísto reheguáva apytépe, opáichavo oñeme’ẽ chéve Ñanderuete jopói poriahuvereko reheguáva amyasãi hag̃ua tetã ambueyguakuérape pe evangélio ha Hesu Crísto mba’eita ijojaha’ỹva,

9amyesakã hag̃ua opavavépe Ñanderuete ñemimby, Ha’e oñongatuva’ekue heta ára atyguasu guivéma ha ko’ág̃ante Ha’e omboajehína (ocumpli), Ha’e voi ningo opaite mba’e apohára.

10Ko’ág̃a ojehechauka hag̃ua avei mburuvichakuéra ha pu’akakuéra oĩva yvágape Ñanderuete arandu Hesu Crísto iglésia rupi.

11Péva voi ningo pe propósito Ñanderuete oguerekomava’ekue ipy’apýpe ymaite guive ha ko’ág̃a Ha’e omboaje (ojapo) Ñandejára Hesu Crísto rupi.

12Hesu Crísto rupi ñag̃uahẽ Ñanderuete rendápe jajeroviágui jeroviapópe hese.

13Upévare che ajerure peẽme ani hag̃ua penekangy che jepy’ara’ã rehehápe, ahasáva pene rendaguépe ha kóva ningo mba’eguasu peẽme g̃uarã.

14Upévare che añesũ Ñanderuete renondépe.

15Ha’e ningo opavavete Túva añeteguáva, oikóva guive yvagakuérape ha yvy apére.

16Ñanderuete tome’ẽ heko jajái mba’eitagui pe pu’aka penemombareteve hag̃ua pehóvo pendepype Ipytu Porãite rupi.

17Hesu Crísto oiko hag̃ua pende py’apýpe pende jerovia rupi, ha pene mborayhu toñembohapo mbareteha tokakuaa porãve ohóvo,

18ikatu hag̃ua peikuaa porãve pehóvo opaite ambue Hesu Crísto reheguáva ndive, pe mborayhu pukukue, ipekue, ijyvatekue ha ipypukukue,

19ha peñemomba’e porã Hesu Crísto mborayhu rehe peẽ penerenyhẽmba hag̃ua Ñanderuete mborayhu reheve.

20Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype.

21Upéicharamo Hesu Crísto iglesiaygua tomomba’eguasu Ñanderuetépe Hesu Crísto rupi, ko ára atyguasúpe ha opaite ára atyguasurãme, péva he’ise tapia g̃uarã, taupéicha (amen).

← Chapter 2 Jump to: Chapter 4 →