Ephesians 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Ñanderuete penemoingovéma avei, yma peẽ pemano napeneñe’ẽrendúigui, pene rembiapo vai rupi,

2peikova’ekue pene rembipota vai poguýpe, ojeiko háicha ko ára atyguasúpe ha pejapova’ekue ko múndo jára rembipota vai, ha’e ningo pe pytu vai (Satana) omba’apovahína avei opavave oñemoĩvape guive Ñanderuete rehe.

3Ijapytépe ñande jaikopava’ekue avei, ha jajapova’ekue opaite umi mba’e ñande yvyarigua rete ha reko rembipota vai ojaposéva, ha jaiko avei ambuekuéraicha ñande reko pochy poguýpe.

4Ñanderuete katu henyhẽ poriahuverekógui, ñanderayhu imborayhu tuichaite reheve.

5Ha ñande ñamanova’ekue jepe ñane rembiapo vaípe, Ha’e ñanemoingovéma Hesu Crísto rupi, Ñanderuete py’a porã rupi (grácia) peẽ pejesalváma.

6Ñanderuete ñanemoingove Hesu Crísto ndive ha hendive ñanemboguapýma avei hetãguasúpe.

7Ha’e ohechauka hag̃ua umi ára atyguasurãme imborayhu tuichaitéva ha ipy’aporãha ñanendive Hesu Crísto rupi.

8Ñanderuete mborayhu rupi peẽ pejesalva ha pejerovia Hesu Crísto rehe ndaha’éi katu pendejehegui, Ñanderuete me’ẽmby rupínte.

9Ndaha’éi yvyarigua rembiapo porã rupi, ani hag̃ua avave oñembotuicha.

10Ha’e ningo ñande Apohare ha Ha’e ñanemoingoveva’ekue Hesu Crísto rupi jajapo hag̃ua Ha’érupi ñane rembiapo porã, Ha’e ombosako’ipamava’ekue voi ñandepype, jajapokuaa hag̃ua ipu’aka rupi ñane rembiapo porã, ha jaguata hag̃ua ipype.

11Upévare peñemomandu’áke, ymave peẽ tetã ambueyguáva, peiko pende yvyarigua rete ha reko rembipota vai poguýpe, peẽ ningo umi oñekytĩ’o’ỹva (oñecircuncida’ỹva), ore katu umi oñekytĩ’óva ore retépe.

12Umi ára umívape peẽ peiko Hesu Crísto’ỹre ha ndaha’eiva’ekue Israel retãygua, upévare ndapeikuaái avei Ñanderuete oñembopy’apeteĩha Israel ndive, ha ndapeguerekói pe esperánza, peikógui Ñanderuete’ỹre ko yvy apére.

13Ko’ág̃a katu peẽ peiko Hesu Cristopype, yma peikova’ekue mombyry ichugui, ko’ág̃a katu Hesu Crísto ruguy rupi peñemoag̃uíma avei Ñanderuete rehe.

14Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.

15Hesu Crísto ñemano rupi Ha’e omboykéma Moises rembiapoukapykuéra, ome’ẽ hag̃ua Israelguakuéra ha tetã ambueyguakuérape peteĩ tekove pyahu, oñemoambuéva Hesu Crísto rupi oiko hag̃ua hikuái oñondive py’aguapýpe,

16ha Hesu Crísto oipe’a pe a’e’ỹ oĩva Israelguakuéra ha tetã ambueyguakuéra apytépe, oiko porã jevy hag̃ua hikuái Ñanderuete ndive iñemano rupi kurusúre.

17Hesu Crísto ou omyasãi hag̃ua Ñanderuete ñe’ẽ porãite oguerúva py’aguapy opavavépe, umi oikóva mombyry Ñanderuetégui ha umi oikóva ijypýpe.

18Hesu Crísto rupi mokõivéva og̃uahẽ peteĩ Pytu Porãmbávape Ñanderuete rendápe.

19Upévare peẽ ndaha’evéima tetã ambueyguáva ni ndapeikovéima peteĩ tetã ndaha’éiva pene mba’épe; peẽ ningo tapicha oñemboheko potĩva ha Ñanderuete rogaygua avei.

20Peẽ peñemopu’ã Ñanderuete ñe’ẽ porã ári, apostolkuéra ha profetakuéra oikuaaukava’ekue, Hesu Crísto katu pe itaguasu, (pe óga pyenda).

21Ha’érupi ojejapopa ha hi’ári oñemopu’ã ohóvo Ñanderuete iglésia.

22Opaite Hesu Crísto reheguáva oñemopu’ã Ñanderuete iglésiape, Ha’e oiko hag̃ua pendepype Ipytu Porãite rupi.

← Chapter 1 Jump to: Chapter 3 →