Ephesians 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Peẽ ningo Ñanderuete ra’ykuéra ha itajyrakuéra Ha’e ohayhuetéva, upévare peñeha’ãke peiko hag̃ua Hesu Crísto oiko haguéicha (ko yvy apére).

2Ha peiko mborayhúpe, Hesu Crísto ñanderayhu haguéicha ha upévare Ha’e oñeme’ẽma ñane rendaguépe peteĩ me’ẽmby ha kuave’ẽmby ramo hyakuã porãva Ñanderuetépe g̃uarã.

3Ani peñemomandu’a pene ñemongetápe: Teko ky’a, mba’evai térã mba’e pota rei rehe, peẽ ningo Hesu Crísto reheguáva.

4Ani peje mba’e oporomotĩkuaáva, térã ñe’ẽ výro rei, térã toryja rembiapo naiporãiva, umi mba’e rãngue peagradece (Ñanderuetépe).

5Peikuaa porãke opaite umi oikóva oñondive omenda’ỹre, umi hembiapo ky’áva, umi ha’enteséva térã umi omomba’eguasúva jára ra’ãngápe ndoikemo’ãi Ñanderuete ha Hesu Crísto retãguasúpe.

6Aníke avave penembotavy ñe’ẽ reípe, ko’ã mba’e rehe ningo Ñanderuete jehavira ho’a umi iñe’ẽrendu’ỹva ra’ykuéra ári.

7Aníke pemoirũtei ichupekuéra.

8Ymave ningo peikova’ekue avei pytũguýpe, ko’ág̃a katu peikóma Ñanderuete ndive tesapehápe. Upéicha ramo peikóna avei tesape ra’y ha itajýra ramo.

9Pe tesape hi’a py’aporã, justícia ha añetegua.

10Oñeha’ãva oikuaa ha ojapo hag̃ua umi mba’e ombovy’áva Ñanderuetépe.

11Ani pejehe’a umi pytũ rembiapo hi’a’ỹva ndive, upéva rãngue peikuaauka ivaiha.

12Umi mba’evai ha’ekuéra ojapóva ñemiháme ñatĩete ñamombe’u hag̃uánte jepe.

13Pe tesape ohesapehápe ohechaukáta hembiapokuéra ivaiha.

14Opaite mba’e Ha’e ohechaukáva ningo tesape, upévare Ñanderuete kuatiañe’ẽme he’i avei: Epáy nde rekéva, ha epu’ã omanóva apytégui, ha Hesu Crísto nderesapéta.

15Pema’ẽ porãke, mba’éichapa peikopeína, ani peiko iñarandu’ỹvaicha, iñarandúvaichante uvei peiko.

16Peiporu porãke umi oportunidad ko ára kóvape Ñanderuete ome’ẽva peẽme, ko’ã ára ningo ivaieterei.

17Upévare anítei peñembotarova, peñeha’ã katu peikuaa porã hag̃ua Ñanderuete rembipota.

18Ha anítei peka’u, upéva ningo ogueru teko vai, penerenyhẽ uvei Pytu Porãmbávagui.

19Peñomokyre’ỹke Salmokuéra rupi, puraheikuéra omomba’eguasúva Ñanderuetépe ha puraheikuéra omopu’ãkuaáva ñande rekove pytu porã reheguáva, pepurahéi ha pembopu Ñanderuetépe g̃uarã pende py’apýpe.

20Ha peagradece opaite árape Ñandejára Hesu Crísto ha Ñandejára Ñanderuetépe opaite mba’e rehe.

21Ha peñemoĩ ojopoguýpe Hesu Crísto kyhyje rupi.

22Peẽ kuñakaraikuéra, peikóke pene menakuéra poguýpe, peiko háicha Hesu Crísto poguýpe.

23Pe ména ningo hembireko akã, Hesu Crísto ijiglésia akã ramoguáicha, Ha’e osalvágui hetépe (ijiglésiape).

24Pe iglésia oĩ háicha Hesu Crísto poguýpe, péicha pe tembireko toñemoĩ avei iména poguýpe opaite mba’épe.

25Peẽ, menakuéra, pehayhúke pene rembirekópe Hesu Crísto ohayhu háicha ijiglésiape ha Ha’e voi oñeme’ẽ omano hag̃ua ijiglésia rehehápe.

26Ha’e omboheko potĩ ijiglésiape. Ha’e omopotĩ ijiglésiape iñe’ẽrendu haguére Ñanderuete ñe’ẽ porãitépe.

27Hesu Crísto omoĩse hendápe peteĩ iglésia heko porã omimbíva, iky’a’ỹva, ivai’ỹva, oguereko’ỹva mba’eveichagua mba’evai, taheko porãnte uvei ha avave ndaikatúiva oñe’ẽvai hese.

28Upéicha avei pe ména ohayhuva’erã hembirekópe ku heteteéicha. Pe ohayhúva hembirekópe ojehayhu ojupe voi.

29Ndaipóri ningo avave ohayhu’ỹva heteteépe, omongaru ha oñangareko porã uvei hese, upéicha Hesu Crísto ojapo avei ijiglésia rehe,

30ñande ha’égui Hesu Crísto rete reheguáva voi.

31Upévare ningo pe kuimba’e ohejava’erã itúva ha isýpe ha ojoajuva’erã hembireko ndive, oiko hag̃ua mokõivégui peteĩ to’ónte (teténte) (Génesis 2,24).

32Ko ñemimby mba’eguasu chéverõ g̃uarã oñe’ẽ Hesu Crísto ha ijiglésia rehe.

33Upévare nde, ména, ehayhu ne rembirekópe nde rejehayhu háicha voi, ha pe tembireko tomomba’e iménape.

← Chapter 4 Jump to: Chapter 6 →