Esther 10

Guarani 2015 (Ñanderuete Ñe’ẽ Porã 2015)

← Chapter 9 Jump to:

1Pe tetã ruvicha Asuéro ombyatyuka impuésto opaite hetãyguakuéragui pe yguasu rembe’y peve ha umi yvy pehẽngue (ísla) jepe oĩva yguasu mbytépe.

2Opaichagua Asuéro rembiapo oñemoĩ peteĩ kuatiañe’ẽme, ijapytépe ojehai avei Mardoquéo rembiapo porã ha mba’éichapa pe tetã ruvicha Asuéro ombotuicha ichupe, opaite ko’ã mba’e ojehai Pérsia ha Média retã ruvicha kuatiañe’ẽme hembiapo porã reheve.

3Ha pe Judaygua, Mardoquéo, opyta tetã ruvicha Asuéro rire mburuvicha guasu mokõiha ramo, ha oiko mba’eguasu ramo Judayguakuéra apytépe, ha ojehayhuete ichupe hetãyguakuéra apytépe, oheka ha oñeha’ãgui ohupity hag̃ua mba’eporãitéva Israel tribukuérape g̃uarã.

← Chapter 9 Jump to: