Esther 6

Guarani 2015 (Ñanderuete Ñe’ẽ Porã 2015)

← Chapter 5 Jump to: Chapter 7 →

1Pe pyhare pévape tetã ruvicha ndikatúi oke, ha he’i ojegueru hag̃ua ichupe tetã ruvicha rembiapokue rehegua kuatiañe’ẽ ojehaihápe opaite mba’e tuicháva ojehúva guive Pérsia retãguasúpe.

2Ha oñemoñe’ẽvo tetã ruvichápe pe kuatiañe’ẽ ojohu hikuái ojehaipyre Mardoquéo omba’emombe’u hague pe ñepu’ã ñemi ojapova’ekue Bigtan ha Teres, mokõi tetã ruvicha rembiguaiguasu, hokẽ ñangarekoharakuéra omopu’ãse hague ipo tetã ruvicha Asuéro rehe.

3Ha tetã ruvicha oporandu: Mba’eichagua ñemomba’eguasúpa térã mba’e iporãvapa ojejaporaka’e Mardoquéope hembiapo porã rehehápe ojapova’ekue cherehe, ha he’i ichupe umi tetã ruvicha rembiguaiguasu: Mba’eve noñeme’ẽi ichupe.

4Upéramo tetã ruvicha he’i: Máva piko oike che korapýpe. Ha Aman ouhína tetã ruvicha róga korapýpe ojerure hag̃ua tetã ruvichápe oñemosãingo hag̃ua Mardoquéope, ijejuvyhaenda rehe, ha’e ombosako’imava’ekuére.

5Ha umi tetã ruvicha rembiguaikuéra he’i ichupe: Péina ápe Aman oĩ korapýpe. Ha tetã ruvicha he’i: Toike ha’e.

6Ha oikévo Aman, tetã ruvicha he’i ichupe: Mba’épa ojejapova’erã pe kuimba’e tetã ruvicha omomba’eguasusévape. Ha Aman he’i ipy’apýpe: Mávapepa tetã ruvicha omomba’eguasúne, ndachéinepa.

7Upérõ Aman he’i tetã ruvichápe:

8Tojegueru tetã ruvicha ao, tetã ruvicha kavaju ha tetã ruvicha akã jeguaka,

9ha toñeme’ẽmba ko’ã mba’e peteĩ mburuvichápe, ha’e tomonde pe ao ha pe akã jeguaka upe kuimba’e tetã ruvicha ombotuichaséva rehe ha upéi tohupi ichupe pe tetã ruvicha kavaju ári, ha pe mburuvicha toguata pe kavaju renondépe osapukáivo: Péicha ojejapo umi kuimba’ére tetã ruvicha ombotuichaséva rehe.

10Upémaramo tetã ruvicha he’i Amánpe: Eñembopya’etéke, egueru nde voi pe ao ha che kavaju, nde ere haguéicha, ha ejapopa hekoitépe pe Judaygua Mardoquéo rehe, oguapyvahína tetã ruvicha róga rokẽme; ha aníke nderesarái opaite mba’égui nde eremava’ekue guive chéve.

11Ha Aman ogueru tetã ruvicha ao ha omonde Mardoquéore, ha ogueroguata ichupe tetã ruvicha kavaju ári pe táva plázape, ha oguerosapukái henonderãme: Péicha ojejapova’erã pe tetã ruvicha omomba’eguasuséva rehe.

12Ha ko’ã mba’e rire Mardoquéo oho jevy pe tetã ruvicha róga rokẽme, ha Aman oñembopya’e pya’e jepy’apy ha ñeko’õi reheve oho hag̃ua hógape.

13Upéi Aman omombe’u hembireko Zeréspe ha hi’angirũnguérape opaite mba’e ojehumava’ekue ichupe, upémaramo he’i ichupe hi’angirũ iñarandúva, ha hembireko Zeres avei: Mardoquéo oime ramo Judayguakuéra ñemoñare apytépe avei, ha máva renondépe reñepyrũma re’a ha nandepu’akamo’ãi hese.

14Ha oñe’ẽ aja gueteri hína hikuái hendive, og̃uahẽ oúvo pya’e pya’e tetã ruvicha rembiguaikuéra ogueraha hag̃ua Amánpe pe karuguasu Ester ombosako’iva’ekuépe.

← Chapter 5 Jump to: Chapter 7 →