Esther 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Heta ára ohasa rire ha tetã ruvicha Asuéro pochy opave jave ohóvo imandu’a Vásti rehe ha ha’e naiñe’ẽrendúi haguére ichupe.

2Upérõ umi mburuvicha ha umi tembiguaiguasu he’i Asuérope: Tojeheka tetã ruvichápe g̃uarã kuñataĩ imarã’ỹva ha iporãitéva.

3Tetã ruvicha tohenoiuka opaite hetãguasúgui opaite kuñataĩ imarã’ỹva ha iporãitévape Súsape, tetã ruvicha tavaguasúpe, ha tojegueraha kuña rógape, oĩva pe tetã ruvicha rembiguaiguasu Hegái, pe oñekytĩ’oitéva poguýpe, ha’e voi ningo oñangarekohína umi kuña rehe ha toñeme’ẽ umi kuñataĩme opaite mba’e oñekotevẽva guive oñemoporã hag̃ua;

4ha upe kuñataĩ imarã’ỹva ho’a porãvéva tetã ruvicha resa renondépe, toiko tetã ruvicha rembireko ramo. Ko ñe’ẽ kóva oĩ porã tetã ruvicha resa renondépe, ha ha’e ojapouka péicha.

5Ha Súsape, tetã ruvicha távape, oiko peteĩ kuimba’e Judaygua, hérava Mardoquéo, Jair ra’y, Simei ra’yre, Cis ra’yre, peteĩ Benjamin ñemoñaréva.

6Péva ojegueruva’ekue Jerusaléngui umi jepokuahakuéra apytépe, ichupe ojegueruva’ekue avei Juda retã ruvicha Jeconías ndive, Babilónia retã ruvicha, Nabucodonosor, oguerukava’ekue ko Jeconíaspe Babilóniape.

7Mardoquéo omongakuaa Hadasápe, hérava avei Ester, kóva Mardoquéo, itio rajy, ha’e ityre’ỹva. Pe kuñataĩ hete ha hova iporãite. Omano rire itúva ha isy, Mardoquéo oguereko ichupe itajýra anga ramo.

8Ha ojehu oñemoherakuãma ramo tetã ruvicha ñe’ẽ ha hembiapoukapy, ha oñembyatýma ramo heta kuñataĩkuéra Súsape, pe tetã ruvicha oikohápe, Hegái poguýpe, ojegueraha avei Estérpe tetã ruvicha rógape, Hegái oñangareko hag̃ua umíva rehe.

9Ha Ester ho’a porã Hegái resa renondépe, ha ha’e ipy’a porã hendive, ha upévagui pya’e ome’ẽuka ichupe opaite mba’e oikotevẽva guive oñemoporãve hag̃ua ha hembi’urã, ome’ẽ avei ichupe 7 kuñataĩ iporavopyréva pe tetã ruvicha rógagui oipytyvõ hag̃ua ichupe opaite mba’épe, ha ogueraha Estérpe umi ambue kuñataĩ iporãvéva apytépe, pe óga oĩháme tetã ruvicha kuñakuéra iporãvéva.

10Ester nde’íri avavépe ha’e peteĩ Israelguaha, Mardoquéo he’ígui ichupe ani hag̃ua omombe’u avavépe.

11Ha ko’ẽ ko’ẽ rehe Mardoquéo ou oguatávo umi kuña róga korapy rovái, oikuaa hag̃ua mba’eichaitépa Ester oñeñandu, ha oikuaa hag̃ua oiko porãpa ambue kuñataĩkuéra apytépe.

12Ha og̃uahẽvo pe ára, peteĩteĩ kuñataĩ ojehechauka hag̃ua tetã ruvicha Asuéro renondépe ha oñepohãno rire hete pirére 12 jasy pukukue; 6 jasy pukukue aja ojepichy hetekuéra rehe peteĩ acéite hyakuã porãva ojejapóva mírra gui, ha ambue 6 jasy pukukue aja ojepichy ambue mba’e ryakuã asýva, hetére kuñakuéra oiporúva,

13ha uperire ae, ha’ekuéra oñemoporã rire, pe tembiapoukapy ojerure háicha, ou hikuái tetã ruvicha rendápe. Opaite mba’e ojeruréva guive oñeme’ẽva’erã ichupekuéra oñembojeguakapa hag̃ua umi kuñakuéra róga guive pe tetã ruvicha róga peve.

14Ouva’erã hikuái ka’aruete, ha ambue ko’ẽme oho jevyva’erã kuñakuéra róga mokõiháme, oĩva pe tetã ruvicha rembiguái Saasgaz poguýpe, ha’e voi ningo oñangareko tetã ruvicha kuñakuéra rehe; ha ndouvéima tetã ruvicha rendápe, pe tetã ruvicha ohayhu mba’e ramómante térã héra rupi oñehenói jevy ramo.

15Og̃uahẽvo pe ára Ester oho hag̃ua tetã ruvicha rendápe, ha’e ningo Abiháil rajy, ha Abiháil, Mardoquéo tio, Mardoquéo ogueraha Estérpe itajýra anga ramo. Ester ndojerurevéi pe tetã ruvicha rembiguái oñangarekóvape hese mba’evete, ha’e he’íva guive añónte; ha opaite ohecháva guive Estérpe oguerohory ichupe.

16Ha ojegueraha Estérpe tetã ruvicha Asuéro rógape pe jasy 10-hápe, péva hína Tebet (Enéro), ha’e oisãmbyhy aja pe áño 7-hápe.

17Ha pe tetã ruvicha ohayhuve Estérpe ambue kuñakuéragui, ha Ester ojohuve py’aporã ha mborayhu henondépe opaite ambue kuñataĩkuéragui; ha omoĩ iñakã rehe pe akã jeguaka (coróna) mburuvicha reko reheguáva, ha Asuéro oiporavo ichupe tetã ruvicha rembireko ramo, Vásti rendaguépe.

18Upéi pe tetã ruvicha ojapo peteĩ karuguasu opaite mburuvicha ha hembiguaikuérape, ko karuguasu Ester rehehápe; ha ombovevuive umi impuésto tetãnguérape g̃uarã ha ome’ẽ ichupekuéra jopói iporãva, pe tetã ruvicha ipy’a porãgui.

19Oñembyaty jevy ramo ambue kuñataĩ aty, Mardoquéo oguapyhína pe tetã ruvicha róga rokẽme.

20Ha Ester nomombe’úi gueteri avavépe ha’e peteĩ Israelguaha, Mardoquéo he’i haguéicha ichupe; Ester ojapo voi opaite mba’e Mardoquéo he’íva guive ichupe, ku ohekombo’e ramoguaréicha ichupe.

21Umi ára umívape Mardoquéo oguapy jave pe tetã ruvicha rokẽme, Bigtan ha Teres, mokõi tetã ruvicha rembiguaiguasu oikóva, hóga rokẽ ñangarekohára ramo ipochyete tetã ruvicha ndive, ha omopu’ãse ipokuéra tetã ruvicha Asuéro rehe.

22Ha Mardoquéo ohechakuaávo ko’ã mba’e, omombe’u tetã ruvicha rembireko Estérpe; ha Ester he’i jevy tetã ruvichápe Mardoquéo ñe’ẽ.

23Oitypeka (oheka) porã ko’ã mba’e ha oñemoañete rire péva oñemosãingo peteĩ jejuvyhaenda rehe mokõive tetã ruvicha rembiguáiguasúpe. Ha pe mba’e ojehuva’ekue ojehai tetã ruvichakuéra rembiapokue kuatiañe’ẽme.

← Chapter 1 Jump to: Chapter 3 →

Recommended Reading

Commentary Esther Commentaries → Devotional Esther Devotional Guide → Get This Bible Guarani (Ñanderuete Ñe’ẽ Porã ) Study Bible →