Esther 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Og̃uahẽvo pe jasy 12-hápe, péva hína Adar jasy (Márzo), pe ára 13-hápe, Asuéro omoha’ãnga haguépe Israel jejukaguasu kuatiañe’ẽme, Judayguakuéra rehe ija’e’ỹva oha’ãrõ pe araitépe ipu’aka hag̃ua Judayguakuéra rehe; upe oñeha’ãrõ’ỹva katu ojehu, umi Judaygua ipu’aka umi hesekuéra ija’e’ỹva rehe.

2Judayguakuéra oñembyatypa haguére itavakuérape, Pérsia retãguasu yvy guive, ha ojeity hesekuéra ojapo vaiseva’ekue guivépe, ha avave ndaikatúi oñemoĩvo hesekuéra, okyhyjepágui hikuái Israelguakuéragui.

3Ha opaite tetã ruvicha, isoldádo aty ruvicha ha ambue mburuvichakuéra, oipytyvõ porã Judayguakuérape, okyhyjégui hikuái Mardoquéogui.

4Mardoquéo rerakuã porã oñemosarambi tetã ruvicha rógape ha opaite tetãnguéra rupi; upéicha Mardoquéo rerakuã porã oñembohetave ohóvo.

5Ha Judayguakuéra ohundi opaite hesekuéra ija’e’ỹvape kyse puku rãimbekuépe, ojukapa ha ohundipa ha ojapo hikuái ojapose haichaitékuri umi hese ija’e’ỹva rehe.

6Súsa, pe tetã ruvicha tavaguasúpe, umi Judaygua ojuka ha ohundíkuri 500 kuimba’ekuérape.

7Ijapytépe ojukákuri hikuái Parsandata, Dalfon, Aspata,

8Porata, Adalías, Aridata,

9Parmasta, Arisai, Aridai ha Vaisatápe,

10ha Aman, Hamedata ra’y ra’yrekuéra, Judayguakuéra rehe ija’e’ỹva; ndokóikuri hikuái imba’erepykuéra rehe.

11Ha pe araitépe oñemombe’u tetã ruvichápe mboýpa ojejukava’ekue Súsape, pe táva tetã ruvicha oikohápe,

12ha pe tetã ruvicha he’i hembireko Estérpe: Súsape, pe tetã ruvicha tavaguasúpe, Judayguakuéra ojukáma 500 Susayguápe, ha 10 Aman ra’ykuérape. Ha mba’épa oiméne ojapóra’e hikuái ambue tetã ruvicha tava’ikuérape. Ha mba’épa rejerureve, ha oñeme’ẽta ndéve; térã mba’épa reipota ojejapove, ha ajapoukapáta.

13Ester ombohovái: Oĩ porã ramo tetã ruvichápe, tojeheja avei ko’ẽ ramo Judayguakuérape ko ára peguáicha ojukave hag̃ua Súsa ryepýpe umi hese oñemoĩvape; ha tomosãingo hikuái jejuvyhaenda rehe umi 10 Aman ra’ykuérape.

14Ha tetã ruvicha he’iuka ojejapo hag̃ua péicha. Ha ojejapopa Ester rembipota Súsape, ha omosãingo hikuái avei umi 10 Aman ra’ykuérape.

15Ha Judayguakuéra oikóva Súsape oñembyaty avei pe ára 14-hápe pe jasy Adar (Márzo) javépe, ha ojukave hikuái Súsape 300 kuimba’ekuérape; ndopokói katu hikuái imba’erepykuéra rehe.

16Ha ambue Judayguakuéra oikóva guive Pérsia retãguasu yvy rupi, oñembyaty avei hikuái oñorãirõ hag̃ua hesekuéra ija’e’ỹva ndive ha opytu’únte hikuái ojuka rire 75.000 tetãyguakuérape oñemoĩva’ekue hesekuéra, ndopokói katu imba’erepykuéra rehe.

17Ko’ã mba’e oikókuri pe ára 13-hápe, ha opytu’u hikuái pe ára 14-hápe; ha pe ára pévape Judayguakuéra ojapo karuguasu ha vy’aguasu.

18Ha umi Judaygua oikóva Súsape oñembyatypákuri pe ára 13 ha 14-hápe, pe jasy 12-hápe, pe ára 15-hápe katu opytu’u hikuái ha omoĩ pe ára péva karuguasu ha vy’aguasuha ára ramo.

19Upéicha umi Judaygua oikóva táva okára rupi omboarete jepi Adar jasýpe, pe ára 14-hápe vy’aguasu ha karuguasuha ára ramo, ha oguerahauka hag̃ua hóga ypy rupiguápe hembi’urãmi.

20Ha Mardoquéo ohai kuatia rehe ko’ã mba’e ha oguerahauka kuatiañe’ẽ opaite Judayguakuérape, umi oikóva guive tetã ruvicha Asuéro retãguasúpe, mombyrygua ha hi’ag̃uívape.

21He’ívo ichupekuéra omboarete jepi hag̃ua pe ára 14 ha 15-hápe Adar (Márzo) jasýpe cáda áñope.

22Umi Judayguakuéra omboarete umi ára umívape ojesalva haguére hesekuéra ija’e’ỹva pógui, ha pe jasy péva oiko rãngue ichupekuéra ñembyasy ramo oñemoambue vy’aha arakuéra ramo, ha ao vosa kue rãngue oñemoambue areteguasu ramo; ojapo hag̃ua hikuái ikaruguasu ha vy’aha ára ramo, ha oguerahauka joaite hag̃ua hóga ypy rupiguápe hi’upyrãmi ha jopói (regálo) imboriahuvévape.

23Ha opaite Judaygua oñembopy’apeteĩ ha he’i ojapopataha Mardoquéo he’iuka haguéicha ichupekuéra ikuatiañe’ẽ rupi.

24Aman, Hamedata ra’y ningo, peteĩ Agaggua pe ija’e’ỹva Judayguakuéra rehe oñeha’ãmbava’ekue ojukauka hag̃ua ichupekuéra, upévare ha’e oity pe “ pur”, he’iséva po’a jeporavo, ombokusuguepa ha ohundipa hag̃ua Judayguakuérape.

25Ha Ester ou ramoguare tetã ruvicha rendápe, ha’e he’iuka ikuatiañe’ẽ rupi pe tembiapo vaiete Aman ojaposeva’ekue Judayguakuéra rehe ho’a jevy hag̃ua iñakã ári; ha upévare oñemosãingo ichupe ha ita’yrakuérape ijejuvyhaenda rehe.

26Upéicha rupi ko’ã ára oñembohéra Purim, Pur réra rehehápe, ha Mardoquéo kuatiañe’ẽ rehehápe, omombe’úva opaite ko’ã mba’e, ha umi mba’e ha’ekuéra ohendu térã ohechava’ekue.

27Upéicha Judayguakuéra omoĩ hembiapoukapy ramo ichupekuéra ha iñemoñarenguérape g̃uarã omboarete hag̃ua ko’ã mokõi ára cáda áñope, Mardoquéo kuatiañe’ẽme he’i haichaite ha hi’araitépe;

28ha ko’ã mokõi ára ojegueromandu’ava’erãha ha oñemboareteva’erãha opaite iñemoñarenguéra apytépe, hekohápe, itávape térã hetãme; ha ã Purim ára omboareteva’erã katuete Judayguakuérava guive, ha iñemoñarenguéra araka’eve ndahesarairiva’erã ichugui.

29Ha tetã ruvicha rembireko Ester, Abihail rajy, ha pe Judaygua Mardoquéo, ohaiukapa ko kuatiañe’ẽ mokõiha, pe Purim reheguáva ha oikova’erãha katuete cáda áñope.

30Ha ojeguerahauka ko kuatiañe’ẽ kóva opaite Judayguakuérape oikóva guive Asuéro 127 retãnguéra apytépe, ñe’ẽ py’aguapy ha añetegua reheve.

31Ko kuatiañe’ẽ kóvape oje’e opaite Judayguakuéra omboarete hag̃ua katuete ko’ã Purim ára hi’araitépe ojehai hagueichaite, Mardoquéo ha tetã ruvicha rembireko Ester po rupi, ha’ekuéra omoĩ haguéicha hi’arikuéra ha iñemoñarenguéra ári, ha mba’éichapa ohasa okaru’ỹre ha mba’éichapa ojahe’o hikuái.

32Ha Ester omoĩ tembiapoukapy ramo ha omoañete ko’ã Purim arete, ha upéi ohaiuka ko tembiapoukapy kóva peteĩ kuatiañe’ẽme.

← Chapter 8 Jump to: Chapter 10 →