Esther 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Og̃uahẽvo pe ára mbohapyha Ester oñemonde tetã ruvicha rembireko aópe, ha oike tetã ruvicha róga korapy ryepýpe, pe tetã ruvicha koty rováipe; ha tetã ruvicha oguapyhína iguapyhaguasúpe, ikoty rokẽ rovái.

2Ha tetã ruvicha ohechávo hembireko Estérpe oĩha ikorapýpe, ha’e ohechauka ipy’a porãha hendive, ha tetã ruvicha oipyso Ester gotýo ijyvyra po’i oroguiguáva, ipópe oĩva. Upémaramo Ester oñemboja ha opoko ijyvyra po’i apýra rehe.

3Ha tetã ruvicha he’i ichupe: Mba’épa ojehu ndéve, Ester, ha mba’épa rejerure, che retãguasu mbytere peve oñeme’ẽkuaa ndéve.

4Ha Ester ombohovái ichupe: Ombohory ramo tetã ruvichápe, eg̃uahẽmína nde ha Aman che karuguasuhápe ambosako’iva’ekue tetã ruvichápe g̃uarã.

5Ha tetã ruvicha he’i: Pya’éke, pehenói Amánpe, ojejapo hag̃ua Ester he’íva guive. Upéicha tetã ruvicha ha Aman oho pe karuguasúpe Ester ombosako’ihápe.

6Ha tetã ruvicha he’i Estérpe okaru ha ho’u jave víno: Mba’épa nde rejerure ha katuete ame’ẽta ndéve. Mba’épa reipota ojejapo ndéve g̃uarã. Pe tetãguasu mbytere jepeve oñeme’ẽkuaa ndéve.

7Upérõ Ester oñe’ẽ he’ívo: Kóa ningo che mba’ejerure:

8Oime ramo ajohu mba’eporã tetã ruvicha resa renondépe, ha tetã ruvicha ome’ẽse ramo chéve che ajeruréva, tetã ruvicha tou jevy ko’ẽ ramo Aman ndive ambue karuguasu ambosako’ítavape, ha upérõ ha’éta pe aipotáva.

9Ha Aman osẽ pe ára pévape vy’a ha py’a rory reheve, ha ohechávo Mardoquéope tetã ruvicha rogaguasu rokẽme, opu’ã’ỹre ni oñemongu’e’ỹre hendágui, ipochyeterei Mardoquéo ndive.

10Aman ojejoko katu og̃uahẽ meve hógape, upérõ ohenoiuka hi’angirũnguérape (iñamigokuérape) ha hembireko Zeréspe,

11ha Aman omombe’u ichupekuéra imba’erepyetaha, heta ita’yraha, tetã ruvicha omomba’eguasuha ichupe, ha omomba’eguasuveha ichupe opaite tetã ruvicha rembiguaikuéra ha imburuvichakuéragui.

12Ha Aman he’ive: Ko ára kóvape tetã ruvicha rembireko Ester, ombosako’i peteĩ karuguasu tetã ruvicha ha chéve g̃uarãnte; ha ko’ẽ ramog̃uarã ha’e oipota che aha jevy tetã ruvicha ndive hendápe.

13Ha opaite ko’ã mba’e ndaha’éi chéve g̃uarã mba’evete ahechávo pe Judaygua Mardoquéope, oguapy reíva tetã ruvicha rokẽme ha nachemomba’eguasuséiva.

14Ha hembireko Zeres he’i ichupe ha opaite hi’angirũnguérape: Embosako’i peteĩ jejuvyhaenda ijyvatéva 22 métro, ha ko’ẽ ramo ere tetã ruvichápe toñemosãingo hese Mardoquéope. Ko ñe’ẽ kóva ombohory Amánpe ha ha’e ombosako’iuka pe jejuvyhaenda.

← Chapter 4 Jump to: Chapter 6 →