Matthew 18

Guarani 2015 (Ñanderuete Ñe’ẽ Porã 2015)

← Chapter 17 Jump to: Chapter 19 →

1Upejave Hesu remimbo’ekuéra og̃uahẽ hendápe ha oporandu ichupe: Máva piko pe ituichavéva Ñanderuete retãguasúpe.

2Ha Hesu ohenói peteĩ mitãme ha omoĩ ijapytepekuéra,

3ha he’i: Añetehápe Che ha’e peẽme, napeñemomitãi jevy ramo, mba’evéicharamo ndapeikemo’ãi Ñanderuete retãguasúpe.

4Upe oñembohekomirĩva ku mitãicha, upéva ningo mba’eguasuvéva Ñanderuete retãguasúpe.

5Ha upe omog̃uahẽva koichagua mitãme, chéve chemog̃uahẽ.

6Oimeraẽva omoñepysãnga ha oitýva angaipápe cherehe ojeroviaramóvape (mitãme), iporãveva’erãmo’ã oñemosãingo rire peteĩ itaguasu ijajúra rehe, ojeporúva molínope, ha ojeity ichupe yguasu ruguápe.

7Angái ko múndo umi ñepysãnga rehe, oĩva’erã voínte ningo umi ñepysãngaha, angái katu upe kuimba’e térã kuña oporomoñepysãngáva ha oitýva ko’ã mitãme angaipápe.

8Upévare nde po térã nde py ndegueraha ramo tembiapo vaípe (angaipápe) eikytĩ ha emombo mombyry ndehegui, iporãve ningo ndéve reike po’ỹrehe térã py’ỹrehe pe tekove tapia g̃uarãvape, anítei nde po mokõi reheve térã nde py mokõive reheve reñemombo tata rendy opa’ỹvape (aña retãme).

9Ha nde resa peteĩva ndegueraha ramo tembiapo vaípe eipe’a ha emombo okápe, iporãve ningo reike pe tekove tapia g̃uarãvape nde resa peteĩ reheve, ha ani nde resa mokõive reheve reñemombo tata rendýpe, aña retãme.

10Cháke, ani pejapo’i ko’ã ojeroviaramóvape, Che ningo ha’e peẽme ijyvága rembiguaikuéra (angelkuéra) tapiaite ohecha che Ruete rova.

11Yvyarigua Ra’y ningo ou osalva hag̃ua umi oñehundívape.

12Mba’épa hi’ã peẽme, peteĩ kuimba’e oguereko ramo 100 ovecha, ha peteĩ okañy ramo ichugui, ndohejaichénepa cérrope umi 99 oho hag̃ua pe okañyva’ekue rekávo,

13ojohu peve ichupe, añetehápe Che ha’e peẽme, ovy’aveva’erãha pévarehe umi 99 nokañyiva’ekuégui.

14Upéicha pende Ruete yvága pegua ndoipotái oñehundi peteĩnte jepe ko’ã ojeroviaramóva apytégui.

15Ne hermáno ojapo vai ramo nderehe, tereho ha eñe’ẽ hendive, nde ha ha’e, pene añoháme; ha ha’e nerendu ramo nde reganáma ne hermánope Ñanderuetépe g̃uarã.

16Ha nanerendúi ramo katu, egueraha nendive peteĩ térã mokõi hermánope, ikatu hag̃uáicha mokõi térã mbohapy techahare rupive ojekuaa opaite mba’e oje’eva’ekue guive.

17Ha nohendúi ramo avei ichupekuéra, emombe’u iglesiayguakuéra apytépe; ha nohendúi ramo iglesiaygua atýpe avei, eguereko ichupe peteĩ pene hermano’ỹva ramo guáicha.

18Añetehápe Che ha’e peẽme, oimeraẽva peẽ peñapytĩva guive ko yvy ári, oñeñapytĩva’erã avei yvágape, ha oimeraẽvape peẽ pejoráva guive ko yvy ári, ojejorava’erã avei yvágape.

19Añetehápe Che ha’e peẽme, mokõi pende apytépe oñemoĩ ramo oñoñe’ẽme ko yvy ári ojerurévo Ñanderuetépe oimeraẽ mba’e rehe, katuete Ha’e ohenduva’erã.

20Oñembyatyhápe mokõi térã mbohapy che rérape, ijapytepekuéra aĩta Che avei.

21Ha upérõ Pédro oñemboja ijypýpe ha oporandu: Che Jára, mboy jevy pevépa aperdonava’erã che hermáno oñemoangaipávape chendive. Ovaléma piko 7 jevy.

22Ha Hesu he’i ichupe: Nda’éi ndéve 7 jevy peve, 70 jevy 7 jevy peve uvei (he’ise 490 veces térã opaite ára peve).

23Upévare ningo Ñanderuete retãguasu ojoguaite peteĩ tetã ruvichaguasúpe oikuaa porãséva hembiguaikuéra cuénta,

24ha ohenóivo opaite hembiguaikuérape, ojegueru ichupe peteĩ odevéva tetã ruvichápe 300.000 vaka repy.

25Ha pe tembiguái péva ndoguerekóigui ome’ẽ jevy hag̃ua ichupe, pe tetã ruvicha he’i oñeñemu hag̃ua hese, hembireko ha ita’yrakuéra rehe, ha opaite mba’erepy oguerekóva guive rehe, ohupity peve pe pirapire (pláta) pe tembiguái odevéva ichupe.

26Upémaramo pe tembiguái oñesũ ha tĩndyhápe ojerure asy ichupe, he’ívo: Chera’ãrõvéna michĩmi ha che ame’ẽmbáta ndéve pe adevéva guive.

27Ha pe tembiguái jára oiporiahuvereko ichupe, opoi ichugui ha oheja rei opaite pirapire odevéva guive ichupe.

28Ha pe tembiguái osẽvo pe tetã ruvicha guasu rendágui ojohu peteĩ hapicha odevéva ichupe peteĩ vaka repýnte ha ha’e opo ijajúra rehe ojuvy hag̃uáicha ha he’i ichupe: Reme’ẽtapa ko’ag̃aite chéve pe pirapire redevéva.

29Upévo hapicha ojeity ipy renondépe, ha ojerure asy ichupe, he’ívo: Chera’ãrõ mivéna michĩmi ha che ame’ẽmbáta ndéve adevéva guive.

30Ha’e katu ndoikuaaséi mba’eve, ogueraha uvei ichupe omoingeuka hag̃ua cárcelpe, ome’ẽmba peve ichupe pe odevéva.

31Ha ambue hapichakuéra ohechávo pe ojehúva, ombyasyeterei hikuái ha oho omombe’u ijárape opaite mba’e ojehuva’ekue guive.

32Upémaramo ijára ohenoiuka jevy ichupe ha he’i: Nde, tembiguái ñaña, remba’ejerure asýgui chéve che aheja rei ndéve pe pirapire redeveva’ekue chéve.

33Ha nde reiporiahuverekova’erãmo’ã avei nde rapicha tembiguáipe, che roiporiahuvereko haguéicha ndéve.

34Ha ipochyeterei ijára, ha omoĩ umi oporonupãva pópe ome’ẽmba peve odevéva ichupe.

35Peichaite avei che Ruete yvága pegua ojapóta penderehe, peteĩteĩva napeperdonái ramo pende rapichápe pende py’aite guive.

← Chapter 17 Jump to: Chapter 19 →