Matthew 21

Guarani 2015 (Ñanderuete Ñe’ẽ Porã 2015)

← Chapter 20 Jump to: Chapter 22 →

1Ha oñemoag̃uivo hikuái Jerusaléngui, og̃uahẽ Betfagépe, pe olívo cérrope; ha upégui Hesu omondo mokõi hemimbo’épe, he’ívo ichupekuéra:

2Tapeho pe tava’i pene renondépe opytáva, ha upépe pejohúta peteĩ búrro kuña ha peteĩ búrro ra’y hendive; pejora ha pegueru chéve.

3Ha oĩ ramo he’íva peẽme oimeraẽ mba’e, peje ichupe: Ore Jára oikotevẽ hese. Ha ohejáta peẽme pegueru hag̃ua.

4Péicha ojehu, oiko hag̃ua pe proféta he’iva’ekue:

5Peje Sion rajýpe: Ma’ẽ, ne retã ruvichaguasu oñemomirĩ ha ipy’a porãva ou ne rendápe peteĩ búrro kuña memby ári, pe tymba sy mba’e pohýi guerojaha.

6Ha oho umi temimbo’e ha ojapo Hesu he’i haguéicha ichupekuéra.

7Ha ogueraha hikuái pe búrro kuña imemby reheve. Ha omoĩ hikuái hi’ári ijaokuéra, ha Hesu oguapy hi’ári.

8Ha heta hetãyguakuéra omyasãi joa ijaokuéra hape renonderãme ha oĩ avei oikytĩva yvyra rakã omyasãi hag̃ua haperãme.

9Ha umi ohóva henonderãme ha hapykuéri osapukaipa joa, he’ívo: David Ra’y, oresalvána ha toñemomba’eguasu Ñanderuete rérape oúva, yvatéguio ou pe salvacion.

10Ha Hesu oikévo Jerusalénpe, umi tavaygua ipy’andýi joa ha he’i: Máva piko kóva.

11Ha hetãyguakuéra he’i: Kóva ningo pe proféta Hesu, Nazaret, Galiléa pegua.

12Ha Hesu oike Ñanderuete rogaguasúpe, ha omosẽmba upégui umi oñemúva ha omba’ejoguávape, ha ombojaparo umi pirapire ocambiáva mesakuéra, ha umi pykasu rehe oñemúva guapyhakuéra.

13Ha he’i ichupekuéra: Ojehaipyre ningo Ñanderuete kuatiañe’ẽme: Che róga oñemboherava’erã ñembo’eha róga (Isaías 56,7), ha peẽ katu pejapo ichugui mondahakuéra róga (Isaías 56,7 Jeremías 7,11).

14Ha ou Hesu hendápe, hesatũva ha ikarẽva, ha Ha’e omonguerapa ichupekuéra.

15Ha umi pa’i ruvicha ha umi kuatia haihára ohechávo umi tembiapo techapyrã Ha’e ojapóva, ha umi mitã osapukaipáva: David Ra’y, oresalvána, ipochyeterei hikuái.

16Ha oporandu ichupe: Rehendúpa ko’ã he’íva. Ha Hesu he’i ichupekuéra: Ahendu. Ndapejohúi piko Ñanderuete kuatiañe’ẽme: Umi mitãmi ha umi okambúva juru omomba’eguasu ichupe (Salmokuéra 8,2).

17Ha Hesu oheja ichupekuéra ha osẽ Ñanderuete rogaguasúgui, ha oho Betániape, ha opyta oke upépe.

18Ha pyhareve oho jevykuévo, iñembyahýi.

19Ha Hesu ohecha peteĩ hígo máta pe tape yképe, oñemboja hese, ha ndojohúigui hese mba’eve, hoguémante, he’i ichupe: Araka’evéma nande’amo’ãvéi. Ha pe hígo máta ipiru.

20Ha hemimbo’ekuéra ohechávo péva ipy’andýi, ha he’i hikuái: Mba’éicha piko pya’ete ipiru ko hígo máta kóva.

21Hesu katu he’i ichupekuéra: Añetehápe ha’e peẽme, pejerovia añetete ramo ndapéicha añói pejapóta hígo máta rehe, avei ko cérrope peje ramo: Ejehekýi ha ejeity yguasúpe upéicha katuete oikova’erã.

22Opaite mba’e pejeruréva guive pene ñembo’épe, pejerovia ramo, pehupityva’erã katuete.

23Hesu og̃uahẽ Ñanderuete rogaguasúpe oporombo’e hag̃ua ha upejave ou hendápe pa’i ruvichakuéra ha karai ancianokuéra, ha oporandu ichupe: Mba’éichagua pu’aka rupi piko nde rejapo ko’ã mba’e, ha máva piko ome’ẽ ndéve ko pu’aka kóva.

24Ha Hesu he’i ichupekuéra: Che avei aporanduse peẽme; ha pembohovái ramo chéve, Che avei ha’éta peẽme mba’eichagua pu’aka rupípa ajapo ko’ã mba’e.

25Mamoguarépara’e Juan Bautísta bautísmo: Yvága guiguápa térãpa yvy ariguánte. Ha ha’ekuéra oñemongeta oñondive ha he’i: Ja’e ramo: Yvága guiguaha, Ha’e he’íta ñandéve: Ha aipórõ, mba’érehe piko ndapegueroviáira’e ichupe.

26Ha ja’e ramo yvy ariguaha, jakyhyje tetãyguakuéragui, ha’ekuéra ningo oguereko Juánpe peteĩ proféta ramo.

27Ha ombohovái Hesúpe: Ndoroikuaái. Upérõ Ha’e he’i ichupekuéra: Che avei nda’emo’ãi peẽme mba’eichagua pu’aka rupípa ajapo ko’ã mba’e.

28Ha mba’épa hi’ã peẽme. Peteĩ kuimba’e ita’ýra mokõi, ha oho pe ijypykue rendápe ha he’i ichupe: Ko árape tereho emba’apo chéve che parraltýpe.

29Ha ha’e he’i itúvape: Ndahaséi. Uperire katu oñembyasy ha oho omba’apo.

30Ha upéi oho ita’ýra mokõiha rendápe, ha he’i avei ichupe péicha. Ha kóva he’i: Néi, aháta, ha upéi ndohói.

31Mavaitépa ko’ã mokõivévagui ojapo itúva rembipota. Ha he’i hikuái: Pe tenondeguáva. Ha Hesu he’i ichupekuéra: Añetehápe ha’e peẽme umi impuésto mbyatyhára ha kuña heko vaíva ningo itenondeve pendehegui Ñanderuete retãguasúpe.

32Juan ningo ouva’ekue peẽme teko porã rapépe ha ndapegueroviái ichupe, impuésto mbyatyharakuéra ha kuña heko vaíva katu oguerovia ichupe. Peẽ pehecha upéva ha napeñembyasýi pene rembiapo vaígui peguerovia hag̃ua avei ichupe.

33Pehendumi ko ambue ñe’ẽ mbojoja: Oiko peteĩ kuimba’e óga jára ha oñotỹ peteĩ parralty, omongorapa, ojapo peteĩ yvykua oñami hag̃ua iparral’a, omopu’ã óga yvate, oheja imba’apohára pópe ha oho mombyry.

34Ha og̃uahẽvo ñemono’õha ára, ombou hembiguaikuéra imba’apohára rendápe, ogueraha hag̃ua imba’erepy.

35Ha imba’apohára oinupã vai peteĩva hembiguáipe ha ambuépe katu ojuka, ha ambuetevépe katu ojapipa itápe ha omano avei.

36Ha pe parralty jára ombou jevy ambue hembiguaikuérape, ha ojapo hesekuéra avei ojapo haguéicha ambuekuéra rehe.

37Ha ipahaitépe ombou hendapekuéra ita’yraitépe, he’ígui: Che ra’ýpe ningo omomba’eteva’erã hikuái.

38Ha imba’apoharakuéra ohechávo ita’ýrape, he’i ojupe hikuái: Kóva ningo ko yvy jararã; peju jajuka, ha japyta imba’e rãngue reheve.

39Ha oapresa hikuái ichupe ha ombotyryry ichupe pe parraltýgui oka gotýo ha ojuka ichupe hikuái upépe.

40Ha pe parralty jára ou vove, mba’épa ojapóne imba’apoharakuéra rehe.

41Ha he’i hikuái: Ojukapava’erã katuete umi tekove iñañávape, ha omoĩne iparralty ambue mba’apoharakuéra pópe, hi’árape oguerahaukava’erã ichupe imba’erãva.

42Ha Hesu oporandu ichupekuéra: Ndapejohúi piko Ñanderuete kuatiañe’ẽme: Pe itaguasu umi óga apoha omombova’ekue, upéva katu ojeporu pe óga yke ñepyrũmbyha akã ramo; kóva ningo Ñanderuetéguio ou, ha mba’e techapyrãva ñande resápe g̃uarã (Salmokuéra 118, 22).

43Upévare Che ha’e peẽme: Ñanderuete retãguasu ningo ojepe’áta pendehegui, ha oñeme’ẽta peteĩ tetã ombohi’ava’erãvape.

44Ha pe itaguasu péva omopẽmbava’erã, umi ho’áva guivépe hese, pe itaguasu ho’árõ hi’arikuéra katu omongu’ipava’erã ichupekuéra.

45Umi pa’i ruvicha ha fariseokuéra ohendúvo pe ñe’ẽ mbojoja péva ohechakuaa hikuái Hesu oñe’ẽha hesekuéra.

46Ha oheka hekave ramojepe oapresa hag̃ua ichupe, okyhyje katu hetãyguakuéragui, ha’ekuéra oguerekógui ichupe peteĩ proféta ramo.

← Chapter 20 Jump to: Chapter 22 →