Matthew 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Ha Hesu ojupi peteĩ bárcope, ha ohasa yguasu mboypýri, oho hag̃ua itávape.

2Ha ogueru hikuái ichupe peteĩ ijapáva, ñenoháme, hupápe. Hesu ohechávo ijerovia, he’i pe hete kuruchĩmbávape: Eñemokyre’ỹke che ra’y, ne angaipakuéra oñeperdonámagui.

3Ha umi kuatia haihára he’i ipy’apýpe: Kóva oñe’ẽvai Ñanderuetére.

4Ha Hesu oikuaapáva voi ojepy’amongetáva hikuái, he’i ichupekuéra: Mba’érehe piko pepensa vai pende py’apýpe (ko’ã pehechávare).

5Mba’épa hasyve ja’e hag̃ua: Ne angaipakuéra oñeperdonáma térã epu’ã ha eguata.

6Peikuaa hag̃ua yvyarigua Ra’y oguerekoha pu’aka ko yvy ári operdona hag̃ua angaipa, he’i avei pe hete kuruchĩmbávape: Epu’ã, ejapyhy nde rupa, ha tereho nde rógape.

7Ha upevovete pe ijapava’ekue opu’ã ha oho hógape.

8Ohechávo péva hetãyguakuéra kyhyjepópe omomba’eguasuete Ñanderuetépe, ome’ẽ haguére peichagua pu’aka yvyariguakuérape.

9Hesu ohasa ohóvo, upégui ohecha peteĩ kuimba’e hérava Matéo, oguapyvahína impuésto oñembyatyhápe, ha he’i ichupe: Eju che rapykuéri. Ha ha’e opu’ã ha oho Hesu rapykuéri.

10Ha Hesu oĩ aja Matéo rógape heta impuésto mbyatyha ha angaipavóra ou ha oguapy avei imesápe, Hesu ha hemimbo’ekuéra ndive.

11Ha péva ohechávo fariseokuéra oporandu Hesu remimbo’ekuérape: Mba’érehe piko pene mbo’ehára okaru umi impuésto mbyatyha ha angaipavorakuéra ndive.

12Ha Hesu ohendúvo iñe’ẽ ombohovái ichupekuéra: Umi hesãiva noikotevẽi pohãnohára rehe, umi hasývante uvei.

13Tapeho ha peikuaa raẽ mba’épa he’ise ko ñe’ẽ kóva: Poriahuvereko aipota, ha ndaipotái peikuave’ẽ tymbakuérape; che ndajúi heko jojáva (ijústova) renóivo, aju ahenóivo angaipavorakuérape oñembyasy hag̃ua hi’angaipágui.

14Uperire Juan remimbo’ekuéra ou Hesu rendápe ha oporandu ichupe: Mba’érehepa ore ha umi fariséo remimbo’ekuéra roayuna, ha ne remimbo’ekuéra katu ndoayunái.

15Ha Hesu he’i ichupekuéra: Ikatu piko umi mendahápe oĩva oñembyasy pe ména oĩ aja hendivekuéra. Og̃uahẽva’erã katu pe ára ojepe’ataha ichuguikuéra pe ména, ha upépe ae oayunáta hikuái avei.

16Avave nombovyvýi ao pehẽngue pyahu ao tuja soro rehe, pe ipyahúva omyatã pe itujávape, omondoro tuichavétagui.

17Ha noñemoĩri víno pyahu víno ryru kavara pirekueguigua tujápe, upéicha ramo osoro pe víno ryru kavara pirekueguigua ha oñehẽmba pe víno ha oñembyaipa avei pe mba’yru kavara pirekueguigua. Oñemoĩva’erã pe víno pyahu víno ryru kavara pirekueguigua pyahúpe, ha mokõivéva noñembyaimo’ãi.

18Hesu he’i jave hína ko’ã mba’e ou peteĩ omyakãva Ñanderuete róga rembiapo (ñemomba’eguasu), oñesũ Hesu renondépe ha he’i ichupe: Che rajy ko’ag̃aite omano, ejumína emoĩ nde po hi’ári ha ha’e oikove jevýta.

19Upéi Hesu opu’ã ha oho hemimbo’ekuéra ndive.

20Ha peteĩ kuña 12 áñoma hasýva tuguyguasúgui, oñemboja hapykuéguio ha opoko ijao rembe’y rehe.

21He’ígui ipy’apýpe: Ijao rembe’ymi rehe jepe apoko ramo, akueraitéta.

22Hesu katu ojere ha ohechávo ichupe he’i: Evy’áke che rajy, nde jerovia ndesalváma. Ha pe kuña okueraite opytávo imba’asýgui.

23Hesu og̃uahẽvo pe karai rógape ha ohechávo umi mimby mbopuharakuérape, ha umi tapichakuéra ipy’a tarovapávape, he’i ichupekuéra:

24Pesẽmba, pe mitãkuña ningo nomanói, okentehína. Ha opukapa hese hikuái (ohendúvo iñe’ẽ).

25Osẽmba rire hikuái okápe, Hesu oike ha ipojái pe mitãkuña póre ha pe mitãkuña opu’ã.

26Ha umi mba’e ojehuva’ekue oñemyasãi pe tetã tuichakue javeve.

27Hesu osẽvo upégui, mokõi hesatũva oho hapykuéri ha sapukaipópe he’i ichupe: David Ra’y oreporiahuverekomína.

28Ha og̃uahẽvo pe ógape umi hesatũva oñemboja hendápe, ha Hesu oporandu ichupekuéra: Pegueroviápa che ikatuha pomonguera. Ha ha’ekuéra he’i ichupe: Roguerovia ore Jára.

29Upévo opoko hesakuéra rehe, ha he’i: Toiko peẽme pejerovia haichaite.

30Ha hesakuéra ojepe’a. Ha Hesu ñe’ẽ pohýi reheve he’i ichupekuéra: Peñeñangarekóke ani peikuaauka avavépe (ko’ã mba’e ajapóva penderéhe).

31Ha ha’ekuéra osẽvo upégui oikuaauka ko’ã mba’e pe tetã tuichakue javeve.

32Osẽvo upégui ojegueru ichupe peteĩ kuimba’e iñe’ẽngúva, oikóva mba’epochy poguýpe.

33Hesu omosẽvo pe mba’epochýpe iñe’ẽngúva retégui ha’e oñe’ẽ porã opytávo. Ha hetãyguakuéra ijurujái opytávo, ha he’i: Araka’eve ndorohechái koichagua mba’e Israel retãme.

34Fariseokuéra katu he’i: Aña ruvicha rupi ningo Ha’e omosẽ pe mba’epochýpe.

35Ha Hesu oguata ohóvo umi táva ha tava’ikuéra rupi, ombo’e Ñanderuete rogakuérape pe marandu porã (evangélio), ha omonguera opaichagua tetãygua hasývape,

36ha Hesu ohechávo hetãygua atýpe oiporiahuverekoite ichupekuéra, oikógui hikuái umi ovecha herekua’ỹvaicha oñemosarambipáva.

37Ha he’i hemimbo’ekuérape: Pe kokue ningo ituicha ha umi omba’apóva ipype katu imbovy.

38Pejerure pe kokue járape tombou umi omba’apova’erãva ikokuépe.

← Chapter 8 Jump to: Chapter 10 →