Matthew 27 — Guarani 2015 (Ñanderuete Ñe’ẽ Porã 2015)

1Ko’ẽ rire, umi pa’i ruvicha ha karai ancianokuéra oñembyaty ha oñomongeta mba’éichapa ojukaukáta Hesúpe.

2Ha ogueraha ichupe ñapytĩháme, ha omoĩ pe tetã sãmbyhyhára Póncio Piláto pópe.

3Upéramo Júdas, pe otraicionava’ekue ichupe, ohechávo ojejukataha Hesúpe, oñembyasyetereígui ogueraha jevy umi 2.000.000 guarani rupi pa’i ruvicha ha karai ancianokuéra rendápe, ha he’i:

4Che ningo añemoangaipa amoĩvo pende pópe pe heko potĩva ruguy. Ha’ekuéra katu he’i ichupe: Mba’evete ningo oréve upéva, ejehechána nde ndejeheve.

5Upémaramo Júdas omombo umi 2.000.000 guarani Ñanderuete rogaguasúpe ha osẽ upégui ha oho ojejuvy.

6Ha umi pa’i ruvicha ojapyhy umi 2.000.000 guarani, ha he’i: Naiporãi ningo ñamoĩ umi kuave’ẽmby ryrúpe, tuguy repykuégui péva.

7Oñemongeta rire hikuái oñondive, ojogua hese pe tenda hérava Ñay’ũ Mba’apohára ñu, tetã ambueyguakuéra omanóva ñeñotỹha rendag̃ua (cementério).

8Upévare, pe tenda ko’ág̃a peve oñembohéra: Tuguy Ñu.

9Péicha ojehu oiko hag̃ua proféta Jeremías he’imava’ekue: Ojapyhy hikuái umi 2.000.000 guarani (= 30 pláta akytã) péva ningo pe ñu repykue, Israel ra’ykuéra ombohepyva’ekue, (Jeremías 32,6)

10ha ome’ẽ pe Ñay’ũ Mba’apohára Ñu rehe, Ñanderuete he’i haguéicha chéve ajapo hag̃ua, (Zacarías 11,12-13).

11Ha Hesu oĩhína ñembo’yhápe, Piláto, pe tetã sãmbyhyhára renondépe, ha ha’e oporandu Hesúpe: Nde piko Judayguakuéra retã ruvicha. Ha Hesu he’i ichupe: Añete, Che ha’e.

12Ha umi pa’i ruvicha ha umi karai ancianokuéra oñe’ẽ vaiete ramojepe hese, Ha’e mba’evete nombohováiri ichupekuéra.

13Upémaramo Piláto oporandu ichupe: Nerehendúipa mba’evaieta he’íva hikuái nderehe.

14Hesu katu nombohováiri ichupe ha nde’íri mba’evete, upévare pe tetã ruvicha ohecharamoiterei péva.

15Pe tetã sãmbyhyhára ojepokuaa opoi peteĩ ojeapresávagui páscua aretépe, Judayguakuéra voi oiporavóva.

16Upéramo Piláto oguereko cárcelpe peteĩ jukahára herakuãitéva, hérava Barrabas.

17Ha oĩmbágui hikuái ñembyatyhápe, Piláto oporandu ichupekuéra: Mavaitéguipa peipota apoi peẽme, Barrabásgui térãpa Hesúgui, hérava Crísto.

18Piláto oikuaa porãgui py’arasy reíguinte (envídia) oapresauka hague hikuái Hesúpe.

19Ha Piláto oguapy aja hína pe oporombojovakeha guapyhápe, hembireko he’iuka ichupe: Aníke rejapo mba’eve ivaíva ko heko potĩva rehe, hesehápe ningo ahasa asýkuri ange pyhare.

20Ha umi pa’i ruvicha ha karai ancianokuéra ohekombo’e ijatýva guivépe ojerure hag̃ua Barrabas rehe, ha ojukauka hag̃ua Hesúpe.

21Ha pe tetã sãmbyhyhára oporandu jevy: Mokõivéva apytégui mavaitépa peipota apoi peẽme, ha ha’ekuéra he’i: Epoi Barrabásgui.

22Ha Piláto he’i ichupekuéra: Ha mba’e piko ajapóta Hesúgui, hérava Crísto. Ha osapukái joa hikuái he’ívo: Emosãingo ichupe kurusu rehe.

23Ha Piláto oporandu: Mba’eichagua tembiapo vai piko ojapo. Ha’ekuéra katu osapukái hatãve: Toñemosãingo ichupe kurusu rehe.

24Ha Piláto ohechávo, mba’eve nosẽi hague ha’e oipota háicha, ha apañuãi oikotaha, ogueruka y ha ojepohéi tetãyguakuéra renondépe, ha he’i: Che ánga ipotĩ ko heko potĩva ruguýgui. Pejehecha peẽ pendejehe.

25Ha umi tetãyguakuéra katu ombohovái: Huguykue to’a ore’ári ha ore ra’ykuéra ári.

26Upémaramo Piláto opoi Barrabásgui; ha oinupãuka rire Hesúpe, ome’ẽ ichupe oñemosãingo hag̃ua kurusu rehe.

27Uperire pe tetã sãmbyhyhára tahachikuéra ogueraha Hesúpe isoldádo ruvicha rogaguasúpe, ha upépe ombyatypa ijerekuévo pe soldádo aty.

28Ha omboi ichugui hikuái ijao, ha omoĩ ijati’ýre peteĩ ahoja pytãitéva,

29ha oñopẽ peteĩ coróna ñuatĩguiguáva ha omoĩ iñakã rehe, ha peteĩ takuára pehẽngue ipo akatúape, ha oñesũ hikuái henondépe ha ñembohoryhápe hese he’i ichupe hikuái: Maitei, Judayguakuéra retã ruvicha,

30ha ondyvu hese hikuái, ojapyhy pe takuára pehẽngue ha oinupã ipype iñakã rupi.

31Ha heta oñembohory asy rire hese hikuái oipe’a pe ahoja pytãitéva ijapégui ha omonde jevy hese ijao imba’etéva. Upéi ogueraha Hesúpe omosãingo hag̃ua kurusu rehe.

32Osẽvo hikuái ohug̃uaitĩ peteĩ kuimba’e Cireneyguápe, hérava Simon, ha oguerahauka ichupe Hesu kurusu.

33Og̃uahẽvo peteĩ tenda hérava Golgotápe, he’iséva Akãngue Renda,

34ho’uka ichupe hikuái víno hái ojehe’apyréva hielkue (mba’e iroetereíva) rehe, ha Hesu oha’ã rire ndo’úi.

35Ha omosãingo rire Hesúpe kurusu rehe oñemboja’o hikuái ijaokue rehe po’a jeporavo rupive, (Salmokuéra 22,19).

36Ha oguapy hikuái upépe oñangareko hag̃ua hese.

37Ha iñakã ári ojehai mba’érehepa ojejuka ichupe: Kóva ha’e Hesu, Judayguakuéra retã ruvicha.

38Ha oñemosãingo avei hendive kurusu rehe mokõi mondaha, peteĩ ijakatúa gotýo ha ambue ijasu gotýo.

39Ha umi upérupi ohasáva oñe’ẽvai joa hese ha oñeakãmbovavávo hese he’i hikuái:

40Nde reitýva Ñanderuete rogaguasu ha mbohapy ára haguépe remopu’ã jevýtava, ejesalvána nde voi; oime ramo nde Ñanderuete Ra’y, ha eguejy pe kurusúgui.

41Ha umi pa’i ruvichakuéra, umi kuatia haihára ha karai ancianokuéra oñembohory joa avei hese ha he’i hikuái:

42Ambuépe osalva, ha Ha’e voi ndaikatúi ojesalva: Oime ramo ha’e Israel Retã Ruvicha, toguejy ko’ag̃aite voi ikurusúgui ha rojeroviáta hese.

43Ha’e ningo ojeroviaitékuri Ñanderuete rehe, oime ramo Ha’e ohayhu ichupe tosalva ichupe; he’i voi ningo ha’e: Che, Ñanderuete Ra’y.

44Ha avei umi mondaha oñemosãingóva hendive pe kurusu rehe oñembohory avei hese.

45Ha asajete guive (las 12 hóra) ka’aru mbyte peve (las 3) iñypytũmba yvy ape ári.

46Pe hóra 3-ha rupi Hesu osapukái hatã, ha he’i: Eli, Eli lama sabactáni. Péva he’ise: Che Jára, che Jára mba’érehepa repoi chehegui.

47Ha umi upépe oĩva, ohendúvo péva he’i: Elíaspe ningo ohenói.

48Ha upévo peteĩva oñani ha ojapyhy peteĩ espónja (mba’e oipytéva y) ha omyakỹ víno háipe ha omoĩ peteĩ takuára puku apýra rehe, ha ho’uka ichupe.

49Ha oĩ he’íva ichupe: Ehejána, jahecha oúpa Elías osalva hag̃ua ichupe.

50Hesu katu osapukái hatã jevývo, ome’ẽ ipytu porã ha omano.

51Upévo Ñanderuete rogaguasu aosãingo osoro mbyte rupi, yvate guive yvy peve; ha pe yvy oryrýi, ha umi itaguasu ojeka;

52ha umi tyvy (sepultúra) ojepe’a, ha heta tapicha heko potĩva retekue okemava’ekue opu’ã jevy;

53ha osẽ rire hikuái ityvýgui, Ñanderuete omoingove rire ichupekuéra, oho hikuái Jerusalénpe (pe táva ojeporavóvape) ha ojehechauka hetápe.

54Ha pe soldádo ruvicha ha umi soldádo oñangarekóva Hesu rehe, ohechávo pe yvy ryrýi ha umi ambue mba’e ojehúva, okyhyjeiterei hikuái ha he’i: Añetehápe kóva ningo Ñanderuete Ra’y.

55Ha oĩkuri upépe heta kuña, mombyry guive oma’ẽvahína, umíva ouva’ekue Hesu rapykuéri Galiléa guive, oservi hag̃ua ichupe.

56Hendivekuéra oĩ María Magdaléna, María, Jacóbo ha Jose sy, ha Zebedéo ra’ykuéra sy.

57Ka’aru pytũvo ou peteĩ kuimba’e, Arimateaygua ipirapire hetáva, hérava Jose, Hesu remimbo’e ningo avei.

58Ha’e oho Piláto rendápe ha ojerure ichupe Hesu retekue rehe. Ha Piláto ome’ẽuka ichupe.

59Ha Jose ombyapakua (ojokua) Hesu retekue ha olia peteĩ savana potĩ porãme.

60Omoĩ Hesu retekue ityvy (isepultúra) pyahúpe ojo’oukava’ekue itaguasukuápe, imba’erã ramo; ha ombyapajeréi peteĩ itaguasu omboty hag̃ua pe tyvy juru.

61Ha oĩ upépe oguapyhápe María Magdaléna, ha ambue María, pe tyvy rovái.

62Uperiregua árape, pe ñembosako’iha ára (sábado), umi pa’i ruvicha ha fariseokuéra oñembyaty, ha oho Piláto rendápe.

63Ha he’i ichupe hikuái: Karai, oremandu’a ningo, pe oporombotavýva oikove ramoguare gueteri he’i hague: Mbohapy ára rire aikove jevýta.

64Eréna, oñangareko porã hag̃ua ityvy rehe ohasapa peve umi mbohapy ára, ani hag̃ua hemimbo’ekuéra ou omonda hetekue, ha upéi he’i tetãyguakuérape: Oikove jevyha omanomava’ekue apytégui, ha pe japu paha ivaietevéta pe iñepyrũmbyrégui.

65Ha Piláto he’i ichupekuéra: Ame’ẽta peẽme umi tahachi ha tapeho peñangarekouka ityvy rehe peẽ peikuaa háicha.

66Ha oho hikuái ha omoĩ umi tahachikuérape oñangareko hag̃ua Hesu tyvy rehe, pe itaguasu rehe (ombotýva ityvy juru) ha omoha’ãnga hese imárca (iséllo, ani hag̃ua avave oipe’a ichupe).