Nehemiah 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Upéramo opu’ã pa’iguasu Eliasib ambue pa’ikuéra ndive, ha omopu’ã hikuái ovecha rokẽguasu, ha’ekuéra omyatyrõ pe tápia ha omopu’ã hokẽnguéra Haméa róga yvate (tórre) peve, ha upéi omopu’ãve hikuái pe Hananeel róga yvate peve.

2Ijykére Jericoygua kuimba’ekuéra omba’apo, ha upéi Zacur, Imri ra’y, omba’apo.

3Hasnaa ra’ykuéra omopu’ã pe pira rokẽ; omboyvyrapa hikuái, ha omopu’ãmba hokẽnguéra, iñembotyhakuéra reheve.

4Ijykére Meremot, Urías ra’y, Hacos ra’y omba’apo, ha ijykére Mesulam, Berequías ra’y, Mesezabeel ra’y omyatyrõ pe tápia, ijykére Sadoc, Baana ra’y omba’apo.

5Ijykére umi Tecoaygua omyatyrõ pe tápia; imburuvichakuéra katu noipytyvõi ichupekuéra.

6Joiada, Paséah ra’y, ha Mesulam, Besodías ra’y, omyatyrõ Jerusalen táva rokẽ tuja; omboyvyrapa hikuái, ha omopu’ãmba hokẽnguéra iñembotyhakuéra reheve.

7Ijykére omba’apo Melatías, peteĩ Gabaongua, ha Jadon, peteĩ Meronotgua, ha ambue Gabaonguakuéra ha Mizpayguakuéra oikova’ekue Éufrates ysyry mboypýri tetã sãmbyhyhára poguýpe.

8Ijykére omyatyrõ Uziel, Harhaía ra’y, omba’apóva óro rehe; ha ijykére omyatyrõ Hananías, mba’e ryakuã asy apoha ra’y. Ha péicha omyatyrõmba hikuái Jerusalen tápia ohupity peve Jerusalen tápia ipéva.

9Ijykére avei omyatyrõ Refaías, Hur ra’y, ha’e ningo Jerusalen táva mbytere sãmbyhyhára.

10Ha upéicha avei omyatyrõ ijypýpe ha hóga renondépe Jedaías, Harumaf ra’y; ha ijykére omyatyrõ Hatus, Hasabnías ra’y.

11Malquía, Harim ra’y, ha Hasub, Pahat-moab ra’y omyatyrõkuri ambue pa’ũme, pe óga yvate (tórre) peve, umi tatakua oĩháme.

12Ijykére omyatyrõ Salum, Halohes ra’y, pe ambue Jerusalen táva mbytere sãmbyhyhára, ha’e ha itajyrakuéra ndive.

13Pe okẽ cérro pa’ũ megua omyatyrõ Hanun, umi Zanoaygua ndive; omopu’ã pyahu jevýkuri hikuái, ha omopu’ã hokẽnguéra iñembotyhakuéra reheve ha 450 métro tápia, pe okẽ yty atýra peve.

14Malquía, Recab ra’y, Bet-haquérem departaménto sãmbyhyhára, omopu’ã pe okẽ yty atýra pegua iñembotyhakuéra reheve.

15Salum, Colhoze ra’y, Mizpa jerekue sãmbyhyhára, omyatyrõ jevy pe yvu rokẽ iñembotyhakuéra reheve, ha avei pe Siloe ypa táva tápia tetã ruvicha ka’avoty gotýo, David táva jejupiha peve.

16Ha’e rire Nehemías, Azbuc ra’y, pe Bet-sur mbytere sãmbyhyhára, omyatyrõ David oñeñotỹ hague rovái peve, ha pe ykua itaguasu ojejo’ova’ekue peve, ha umi ipy’aguasúva róga peve.

17Hapykuéri omyatyrõkuri Leviguakuéra, Rehum, Bani ra’y, ha ijypýpe omyatyrõkuri Hasabías, pe Keila mbytere sãmbyhyhára, hekoha gotýo.

18Ha’e rire omyatyrõkuri ityke’yrakuéra, Bavai, Henadad ra’y, pe ambue Keila mbytere sãmbyhyhára.

19Ijykére omyatyrõ Ezer, Jesúa ra’y, Mizpa sãmbyhyhára, ha pe pa’ũ hembýva gueteri ohupity peve pe óga oñeñongatuhápe umi ñorãirõ rembiporukuéra.

20Ha’e rire Baruc, Zabai ra’y, kyre’ỹpópe omyatyrõ ambue pa’ũ, pe tembiporu róga oñeñongatuhápe umi ñorãirõ rembiporu yke guive, pe pa’iguasu Eliasib róga rokẽ meve.

21Hapykuéri omyatyrõ Meremot, Urías ra’y, Hacos ra’yre, ambue pa’ũ, Eliasib róga ojeikeha guive hóga apýra peve.

22Ha’e rire pa’ikuéra Jordan ñu megua omyatyrõkuri.

23Ha’ekuéra rire Benjamin ha Hasub omyatyrõkuri pe tápia hogakuéra rovái; ha ko’ãva rire omyatyrõ Azarías, Maasías ra’y, Ananías ra’yre, hóga ypýpe.

24Ha’e rire omyatyrõ Binúi, Henadad ra’y ambue pa’ũ, Azarías róga guive pe tápia rakãmby omyatyrõkuri (ángulo), ha pe táva tápia ratĩ (esquína) meve.

25Palal, Uzai ra’y, omyatyrõ pe tápia ratĩ (esquína) rovái ha pe óga yvate peve osẽva tetã ruvicha rógagui, opytáva pe cárcel korapýpe. Ha’e rire, Pedaías, Paros ra’y, omyatyrõ.

26Ha Ñanderuete róga rembiguaikuéra, Ofélpe oikóva, omyatyrõkuri pe y rokẽ rovái peve, kuarahyresẽ gotýo opytáva, ha pe óga yvate ijapyrasẽva peve.

27Ijykére omyatyrõkuri ambue pa’ũ Tecoayguakuéra, pe ogayvateguasu ijapyrasẽva rovái, Ofel tápia peve.

28Pe kavajukuéra rokẽ guive omyatyrõkuri pa’ikuéra, peteĩteĩva hóga renondepekuéra.

29Ijykére omyatyrõkuri Sadoc, Imer ra’y, hóga rovái; uperire omyatyrõ Semaías, Secanías ra’y, pe kuarahyresẽ gotyogua okẽ ñangarekohára.

30Ijykére Hananías, Selemías ra’y, ha Hanun, Salaf ra’y 6-ha, omyatyrõkuri ambue pa’ũ. Uperire omyatyrõkuri Mesulam, Berequías ra’y, ikoty rovái.

31Ijykére omyatyrõ Malquías, óro morotĩ rehe omba’apokuaáva ra’y, Ñanderuete róga rembiguaikuéra ha ñemuhára (almacenéro) rogakuéra peve, mbojovakehára rovái peve, ha pe kotyguasu tápia yke pegua peve.

32Ha pe tápia yke pegua kotyguasu guive, ovechakuéra rokẽ meve, omyatyrõkuri umi pláta rehe omba’apóva ha ñemuharakuéra oñondive.

← Chapter 2 Jump to: Chapter 4 →