Nehemiah 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Upéramo heta Judaygua ñemyrõme oiko hetãygua mba’erepy rekohára ndive.

2Oĩkuri he’íva: Ore, ore ra’ykuéra ha ore rajykuéra, ore reta ningo; upévare rojerurékuri ha roiporu tembi’urã mba’e ra’ỹi rokaru hag̃ua ha roikove hag̃ua.

3Ha oĩkuri avei he’íva: Rome’ẽkuri mba’e jeporuka rehe ore yvy, ore parral ty ha ore róga, rojogua hag̃ua mba’e ra’ỹi, oreñembyahýigui.

4Ha oĩkuri avei umi he’íva: Roiporúkuri pirapire rome’ẽva’erãgui tetã ruvichápe ore impuésto, ore yvy ha ore parralty rehe.

5Ha péina ápe, ore ro’o ningo ore ryke’ykuéra ro’oichaguaiténte avei, ore ra’ykuéra ita’yrakueraichaiténte avei; ha péina ápe ore ningo rome’ẽkuri ore ra’ykuéra ha ore rajykuéra hembiguáirã, ha ore ndoroguerekói mba’éichapa ikatu rosalva jevy ichupekuéra ipoguýgui, ore yvy ha ore parraltykuéra imba’ekuérama avei.

6Ha chepochyetereíkuri ahendúvo oĩha ipyahẽ asýva ha opaite ko’ã mba’e he’íva rehe hikuái.

7Upémaramo ajepy’amongeta hese, ha aja’o mburuvichakuérape, ha ha’e ichupekuéra: Pejerure piko mba’e jeporukakue rehe pirapire pende ryke’ykuérape. Ha ahenoimba avei ichupekuéra peteĩ atyguasúpe.

8Ha ha’e ichupekuéra: Ore ningo ikatu háicha roñeha’ã rojogua jevy hag̃ua ñande ryke’ykuéra Judayguápe oñeme’ẽva’ekue pirapire rehe ambue tetãme, peẽ piko peñemu pende ryke’ykuéra rehe, ore rojogua jevy hag̃ua piko ore pirapire rupi pende pógui. Ha okirirĩmba hikuái, ndoguerekóigui mba’épa ombohovái hag̃ua.

9Ha che ha’eve ichupekuéra: Naiporãi umi mba’e pejapóva. Ndapekyhyjéi piko Ñanderuetégui, anive hag̃ua jaiko tetãnguéra ñanderehe ija’e’ỹva ñembohoryha ramo.

10Che ha che ryke’ykuéra roiporukákuri avei ichupekuéra pirapire ha mba’e ra’ỹi; jahejareína ichupekuéra ko mba’e pohýi kóva.

11Ajerure asy peẽme ko ára kóvape peme’ẽ jevy hag̃ua ichupekuéra ijyvy, iparralty, ijolivoty ha hogakuéra; ha peheja rei mba’e ra’ỹi, víno ha acéite, ha ani pejerure jevy mba’eve peiporuka haguére pende pirapire ichupekuéra.

12Ha he’i hikuái: Rome’ẽmba jevýta ichupekuéra imba’ekue, ha mba’eve ndorojeruremo’ãi ichupekuéra; rojapóta nde ere háicha. Upémaramo ahenói opaite pa’ikuérape, ha henondepekuéra amoñe’ẽme’ẽ ichupekuéra ojapotaha hikuái peichaite.

13Upéi che aityvyro che ao, ha ha’e ichupekuéra: Péicha Ñanderuete toityvyro hógagui ha imba’apohágui opaite kuimba’ekuéra ko’ã mba’e ndojaposéivape, ha péicha tojetyvyro ichupe ha tainandi ha’e. Ha opavave ijatýva guive ombohovái: Taupéicha, ha omomba’eguasuete hikuái Ñanderuetépe. Ha opaite tetãyguakuéra ojapopa hekópe he’i hagueichaite.

14Ha pe ára guive, tetã ruvicha he’i hague, che aiko hag̃ua tetã sãmbyhyhára ramo Juda retãme; péva ojehu tetã ruvicha Artajérjes oisãmbyhy jave 20 áño ha pe ára péva guive 12 áño aja, che ha che ryke’ykuéra noroguenohẽi tetã sãmbyhyhára rembiapo repy.

15Ha umi tetã sãmbyhyhára che mboyveguare oporomoingove asy ko tetãme, ha ojapyhy ichuguikuéra pan ha víno repyrã hetave 0,447 kílo óro morotĩgui opaite árape g̃uarã; ha che katu ndajapói upéicha, akyhyjégui Ñanderuetégui.

16Avei ko táva tápia rembiapo che rérape opytáva che voi amba’apo ha ajapouka opaite che rembiguaikuérape oĩva guive che poguýpe.

17Ha oĩ avei 150 Judaygua ha mburuvichakuéra, okarúva opaite árape che mesápe, ha hi’ári okaru avei che mesápe umi tetã ambueygua oreandúva.

18Ha ko’ẽ ko’ẽ rehe ajukauka peteĩ guéi ha 6 ovecha poravopyréva; ha heta guyrakuéra, ha heta víno; upeichavéramo jepe araka’eve naguenohẽi che retã sãmbyhyhára rembiapo repy, ipohyietereíguima ko’ã tetãyguakuérape ko tembiguái reko.

19Che Ruete nemandu’amína cherehe umi mba’e porã ajapóvare ko’ã che retãyguakuéra rehehápe.

← Chapter 4 Jump to: Chapter 6 →