Nehemiah 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Ha Sanbalat ohendúvo, ore romopu’ãharoína pe táva tápia, ipochyeterei, ha oñembohory Judayguakuérare.

2Ha oñe’ẽ hyke’ykuéra renondépe ha Samária soldádo aty renondépe, ha he’i: Mba’éiko ojapo ko’ã Judaygua kangy, ojeheja jevytaiko ichupekuéra oikuave’ẽ ikuave’ẽmbynguéra. Oikopánepa peteĩ árape hembiapokuéra. Omoingove jevýnepa yvytimbo atýragui umi ita ojehapypava’ekue.

3Ha oĩkuri hendive Tobías, peteĩ Amongua, ha upéva he’i: Itáva tápia ikangyeterei, ojupi mba’e ramo peteĩ aguara oitypa jevyva’erã ichuguikuéra.

4Ehendumína Nde, ore Jára, he’i Nehemías, mba’eichaitépa oñembohory hikuái, ha embou jevy iñe’ẽvai iñakã ári, ha toiko hikuái tembiguái ramo jepokuapy mamo ojeguerahahápe.

5Aníkena remo’ãtei iñaña reko, ha hembiapo vai ani oguétei ne renondégui, ipochy haguérehe hikuái óga mopu’ãharakuéra ndive.

6Ore katu romopu’ã pe tápia, ha pe táva tápia oñemopu’ãmbaite ijyvatekue mbyte peve, ikyre’ỹgui umi tetãygua omba’apóva hese.

7Ha ojehúkuri ohendúvo Sanbalat ha Tobías, umi Arabiaygua, umi Amongua ha umi Asdodgua, pe Jerusalen táva tápia oñemyatyrõmbaha ohóvo ha umi ikuaha oñembotypa ohóvo, ipochyetereive hikuái,

8ha opavave oñemoĩ peteĩ ñe’ẽme oupa hag̃ua hikuái Jerusalen ári ombyaipa jevy hag̃ua Judayguakuéra rembiapo.

9Upémaramo ore roñembo’e ore Ruetépe, ha romoĩ umi oñangarekóva ára ha pyhare pukukue oreavisa hag̃ua ou vove hikuái.

10Ha Judayguakuéra he’i katu: Umi mba’e rerojahára ikangypáma, ha ogakue ita atýra hetaiterei gueteri, ha ndaikatúi romopu’ãve pe táva tápia.

11Ha umi orerehe ija’e’ỹva he’íkuri: Aníke oikuaátei hikuái, ha ani ohechátei hikuái, jaike peve ijapytepekuéra ha jajuka ichupekuéra, upéicha jajoko hembiapokuéra.

12Ha ojehu ningo umi Judaygua oikóva ijapytepekuéra rupi ou hikuái, ha oiméne 10 jevy he’i: Mamo pejereháguio, ho’áta hikuái pendeári.

13Upémaramo, amohenda umi tetãygua hogayguakuéra rupi, ikyse pukukuéra reheve, ijyvyra puku akuakuéra reheve ha iguyrapakuéra reheve pe yvy ikarapeveha rupi ha pe yvy inandiha rupi, pe táva tápia kupépe.

14Ama’ẽmba rire apu’ã ha ha’e mburuvicha ha opaite tetãyguakuérape: Aníke pekyhyjétei henondepekuéra, penemandu’áke uvei Ñanderuete rehe, tuichaite ha oporomongyhyjévare, peñorãirõ pende ryke’yrakuéra rehehápe, pende ra’ykuéra ha pende rajykuéra rehehápe, pene rembireko ha pende rogayguakuéra rehehápe.

15Ha ohendúvo umi orerehe ija’e’ỹva ore roikuaapamaha ojaposéva guive hikuái, ha Ñanderuete omboyke hague hekombo’ekuéra, ore rohopaite jevy pe táva tápia rembiapópe.

16Pe ára péva guive, che rembiguaikuéra apytégui peteĩ aty mbytere omba’apo táva tápia rembiapópe, ha ambue aty mbytere oñangareko ijyvyra puku akua, imo’ãha, iguyrapa ha hetemo’ãha reheve; ha umi mburuvicha Juda róga reheguáva oipytyvõ porã ichupekuéra.

17Umi omopu’ãva pe táva tápia, umi omba’ererojáva, umi omba’erupíva, peteĩ ipópe ojapo hembiapo ha ambue ipópe ojoko iñorãirõ rembiporu.

18Ha umi omba’apóva táva tápia ñemopu’ãme oguerekókuri iku’a rehe ikyse puku omba’apo aja ha pe turu mbopuhára oĩkuri che ypýpe, (pya’e oporoavisapa hag̃ua, oñekotevẽ ramo).

19Ha che ha’ékuri mburuvichakuérape ha opaite tetãyguakuérape: Pe tembiapo ituicha ha ipuku gueteri, ha ñande ningo mombyry ojuehegui.

20Upévare pehendu ramo turupu, upépe peñembyatýta orendive; ha Ñanderuete katuete oñorãirõta ñanderehehápe.

21Upéicha ore romba’apo joa pe tembiapo pévape; peteĩ aty mbytere oguereko ijyvyra puku akua ko’ẽtĩ mboyvemi guive osẽ meve mbyjakuéra.

22Ha che ha’ékuri avei opaite tetãyguakuérape: Peteĩteĩva hembiguái reheve opytava’erã Jerusalenpýpe, pyharekuépe toñangareko ha arakuépe tomba’apo.

23Che avei, che ryke’ykuéra, ha chendivegua mitãrusukuéra, ha umi ñangarekohára oikóva guive che rapykuéri, ndoroipe’ái orejehegui ore aokuéra; peteĩteĩva roñemboi, rojahu hag̃ua añoiténte.

← Chapter 3 Jump to: Chapter 5 →