Zechariah 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Pe jasy 8-hápe, pe áño mokõiháme, Darío oñepyrũ hague oisãmbyhy tetã ruvicha ramo, ou Ñanderuete ñe’ẽ pe proféta Zacaríaspe, Berequías ra’y, Iddo ra’yrépe, ha he’i:

2Che chepochy pende rukuéra ndive.

3Upévare ere ichupekuéra: Péicha he’i ángel atykuéra Jára: Pejevy che rendápe, ha Che ajevýta pene rendápe, kóva ningo ángel atykuéra Jára ñe’ẽ peẽme g̃uarã.

4Ani peikótei pende rukueráicha, umi proféta tenondeve ouva’ekue oavisa porã hag̃ua ichupekuéra ha he’i: Péicha he’i ángel atykuéra Jára, pejevy ko’ág̃a pende rape vaígui ha pepoi pene angaipágui. Ha’ekuéra katu nopenái, ha nacherendúi, he’i pende Ruete.

5Pende rukuéra moõpa oimemba ko’ág̃a, ha umi proféta, oikovénepa tapia g̃uarã.

6Ha che ñe’ẽ ha che rembiapoukapykuéra ha’eva’ekue che rembiguái profetakuérape, ndohupitýipara’e pende rukuérape. Upévare ojevýkuri hikuái ha he’i: Ñanderuete ningo ojapopa hekoitépe, he’i haguéicha ñanderehe, ñande rapekuéra ha ñane rembiapokuéra rehe.

7Pe ára 24-hápe, pe jasy 11-hápe, péva hína pe jasy Sebat (Enéro), Darío oisãmbyhyhína jave pe áño mokõiháme, ou Ñanderuete ñe’ẽ proféta Zacarías, Berequías ra’y, Iddo ra’yrépe, ha he’i:

8Pyharekuépe ojehechauka chéve che payetépe (visiónpe) peteĩ kuimba’e oikóva peteĩ kavaju pytãva ári, ha ha’e oñembo’yhína peteĩ ñúme mírto yvyrakuéra apytépe ha hapykuépe oĩkuri hetave kavaju pytãva, ipara ha morotĩva.

9Upéramo aporandu: Mba’éiko he’ise ko’ã mba’e, che jára. Ha pe yvága rembiguái oñe’ẽvahína chendive he’i: Che aikuaaukáta ndéve mba’épa he’ise ko’ã mba’e.

10Ha upe kuimba’e oĩvahína umi mírto yvyrakuéra apytépe, ombohovái ha he’i: Ko’ãva umi Ñanderuete ombouvahína oguata hag̃ua yvy ape rehe.

11Ha umi kavaju arigua oñe’ẽ hikuái Ñanderuete yvága rembiguáipe oĩvahína umi mírto yvyrakuéra apytépe, ha he’i hikuái: Roguatapáma ko yvy jerekuévo, ha péina ápe pe yvy tuichakue opytu’uhína ha oiko py’aguapýpe.

12Ha Ñanderuete yvága rembiguái oporandu ha he’i: Ángel atykuéra Jára, araka’épa reiporiahuvereko jevýta Jerusalen ha umi Juda távape, nde pochy hi’aréma 70 áño.

13Upérõ Ñanderuete, ombohovái ichupe ñe’ẽ iporãva ha omoangapyhýva reheve.

14Ha pe yvága rembiguái he’i chéve emombe’u, péicha he’i pende Ruete: Cherakate’ỹeterei Jerusalen ha Sion rehe.

15Chepochy umi tetã Che voi aiporavomava’ekue ndive, ohavira hag̃ua Israel retãme, ha’ekuéra katu ojopyeterei ichupekuéra.

16Upévare pende Ruete he’i: Che ajere jevýta Jerusalénpe, che poriahuvereko reheve, ipype oñemopu’ã jevýta che rogaguasu, he’i ángel atykuéra Jára, ha pe óga mopu’ãhára rembiporu sã (albañil plomáda) ojepysóta Jerusalen ári.

17Emombe’u ha ere: Péicha he’i pende Ruete, che tavakuéra henyhẽmbáta mba’e porãitágui, ha pende Ruete omoangapyhy jevýta Siónpe, ha oiporavo jevýta Jerusalénpe itáva ramo.

18Upéi ajesaupi ha ama’ẽ porãvo ojehechauka chéve irundy tatĩ.

19Ha aporandu pe yvága rembiguáipe, chendive oñe’ẽvape: Mba’éiko he’ise ko’ã mba’e. Ha ha’e he’i chéve: Ko’ãva hína umi tatĩ, he’iséva tetã imbaretéva omosarambipamava’ekue Judápe, Israélpe ha Jerusalénpe.

20Upéi Ñanderuete ohechauka chéve irundy herréro omba’apóva hiérro rehe.

21Ha aporandu: Ma’erã piko ko’ãva ou. Ha ha’e ombohovái chéve, he’ívo: Ko’ã irundy herréro ou oñemoĩ hag̃ua umi tetã rehe omosarambiva’ekue umi Judayguakuérape ha ko’ág̃a ou oipe’a hag̃ua hatĩnguéra, oiporu vaieterei haguére ipu’aka Juda retã rehe ha omosarambipa haguére ichupekuéra hetãgui.

Jump to: Chapter 2 →