Zechariah 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Ñanderuete ñe’ẽ Israel rehe: Ñanderuete omyasãiva’ekue yvagakuéra ha omopyendava’ekue ko yvy, ha omoingoveva’ekue kuimba’e ha kuña py’apýpe pe pytu porã, péicha Ha’e voi he’i:

2Peikuaa porãke, Che amoĩ Jerusalen peteĩ váso omonga’úva ramo ivíno rupi umi tetã oĩvape Juda jerekuévo ha omongoráva Jerusalen.

3Ha upe ára upévape Che amoĩta Jerusalénpe ku ita pohýicha mayma tetãme g̃uarã, oimeraẽva ohupiséva ichupe oñehungáta (ojelastimáta), tetãnguéra oñembyatypa ramojepe oñemoĩ hag̃ua hese.

4Upe ára upévape, he’i pende Ruete, ambohasypáta kyhyjégui opaite kavaju, ha hi’ariguakuérape, itarovapáta hikuái, Che katu añangareko porãta Juda rogayguakuéra rehe ha umi ambue tetãme katu amohesatũta.

5Ha Juda retã ruvichakuéra he’iva’erã ipy’apýpe: Jerusalengua oguereko ipu’aka ángel atykuéra Jára rupi.

6Upe ára upévape Che amoĩta Juda ruvichakuérape ku tatapỹi ryrúicha jepe’a atýrape, ha tata’y rendýicha trígo apesã apytépe, umía ombokusuguepáta tetãnguéra oĩva ijakatúa ha ijasu gotýo, Jerusalen katu opytavéta hendaitépe.

7Ñanderuete oipytyvõta raẽ ojejapo hag̃ua Juda rogakuéra hymba pirekuégui ha opytáva mombyry Jerusaléngui, ani hag̃ua David rogaguasu ha Jerusalen oñembotuichave Juda róga hymba pirekue peguágui.

8Upe ára upéva Ñanderuete omo’ãta Jerusalenguápe, ha pe ikangyvéva upe árape imbaretéta Davídicha ha David rogaygua opytáta yvága rembiguáicha, ha ãva ohóta henonderãme (ñorãirõguasúpe).

9Ha upe ára upévape Che ahundipáta umi tetã oñemoĩva Jerusalen rehe.

10Ha Che añohẽta David ñemoñare ha Jerusalenguakuéra ári che Pytu jeporiahuvereko ha ñembo’e reheguáva, ha upéi oma’ẽva’erã hikuái cherehe, ha’ekuéra oikutuva’ekuépe, ha ojahe’ova’erã hikuái ku ta’ýra peteĩmi rehe ojejahe’o háicha (omano ramo) térã ombyasyva’erã ichupe ku ta’ýra ypykuére oñembyasy háicha.

11Upe ára upévape jahe’oguasu oikóta Jerusalénpe, ku jahe’oguasu ojejapóvaicha pe jára gua’u Hadad-rimon rehe Megído cérro pa’ũme.

12Upérõ opaite tetãygua ombyasyva’erã, oimeraẽva ogaguasu oñemboykéva oñembyasýta, upéicha David ñemoñarenguéra, hembirekokuéra ndive ojahe’óta ijeheguieténte; Natan ñemoñarenguéra, hembirekokuéra ndive ojahe’óta ijeheguieténte;

13ha Levi ñemoñarenguéra, hembirekokuéra ndive ojahe’óta ijeheguieténte; Simei ñemoñarenguéra, hembirekokuéra ndive ojahe’óta ijeheguieténte.

14Ha ambue ogaguasu ñemoñarenguéra, peteĩteĩ ojahe’óta ijeheguieténte, ha hembirekokuéra ndive ijeheguieténte ojahe’óta.

← Chapter 11 Jump to: Chapter 13 →