Zechariah 8

Guarani 2015 (Ñanderuete Ñe’ẽ Porã 2015)

← Chapter 7 Jump to: Chapter 9 →

1Ángel atykuéra Jára ñe’ẽ ou chéve ha he’i:

2Péicha he’i pende Ruete: Cherakate’ỹ Jerusalen rehe, cherakate’ỹ hese pochy reheve.

3Péicha he’i pende Ruete: Che amyatyrõ jevýta Sion, ha aikóta Jerusalen mbytépe, ha Jerusalen oñembohérata táva jeroviaha ha pende Ruete cérro oñemboheráta cérro oñemboykéva Ñanderuetépe g̃uarã.

4Péicha he’i ángel atykuéra Jára: Jerusalen rapekuéra rehe oikóta gueteri kuimba’e tuja ha kuña ig̃uaig̃uíva, peteĩteĩva ijejokoha reheve, oikoháre heta áñoma.

5Ha pe táva korapy henyhẽta mitãkuimba’e ha mitãkuña oñembosaráivagui.

6Péicha he’i ángel atykuéra Jára: Umi milágro ituicha ramojepe Israel retãygua hembýva resápe g̃uarã, ndaupéichai katu pende Ruetépe g̃uarã, he’i ángel atykuéra Jára.

7Péicha he’i ángel atykuéra Jára: Che ambyaty jevýta che retã kuarahyresẽ ha kuarahyreike retãnguéragui,

8ha aguerúta ichupekuéra oiko jevy hag̃ua hikuái Jerusalen ryepýpe, oikóta hikuái che retã ramo, ha Che aikóta Ijára añeteguáva ramo ha mbojovakehára hekoite peguáva ramo.

9Péicha he’i ángel atykuéra Jára: Peñemokyre’ỹke peẽ pehendúva ko ñe’ẽ ko’ã proféta jurúgui, oñepyrũvo omopu’ãrõ guáicha Ñanderuete rogaguasu.

10Ko’ã ára mboyve kuimba’ekuéra omba’apo rei ha tymbakuéra oñemoña rei ndaipórigui py’aguapy umi osẽva térã oikévape g̃uarã ko tavaguasu kóvape, ha Che ahejágui tetãyguakuéra oñemoĩ hag̃ua ojuehe.

11Ha ág̃a ndajapomo’ãvéi ko tetã rembyre rehe ajapo haguéicha umi ára ohasava’ekuépe, he’i ángel atykuéra Jára.

12Py’aguapýpe oñeñotỹta iparral, ha ikogakuéra hi’a porãta, pe ára ome’ẽ porãgui ysapy. Ko’ã mba’e ko’ãva ajapopáta che retãygua rembyrépe g̃uarã.

13Ha ojehuva’erã: Peẽ Israel ha Juda róga peiko haguéicha maldicion poguýpe ambue tetãnguéra apytépe, upeichaite ko’ág̃a peikóta jehovasa ramo ichupekuéra g̃uarã, Che poipytyvõ porãgui. Ani pekyhyjétei, peñemokyre’ỹ katu chehegui.

14Péicha he’i ángel atykuéra Jára: Hi’ãite haguéicha chéve ajapo vai hague pende rukuéra rehe chembopochy haguére, ha noñembyasýikuri hikuái;

15ko’ã árape hi’ãite chéve ajapo porã Jerusalen ha Juda róga rehe, upévare ani pekyhyjétei.

16Ko’ã tembiapoukapy pejapova’erã: Peñe’ẽ pe añetegua peteĩteĩ pende rapichakuéra ndive, peñembojovake hekoitépe oĩ hag̃ua py’aguapy pene ñembojovake rendápe.

17Ha avei avave pende apytépe ani ojepy’amongeta mba’evai ipy’apýpe hapicha rehe, ha ani pehayhútei ñe’ẽme’ẽ japu rei reheguáva, opaite ko’ã mba’e ko’ãva chembopochy, he’i pende Ruete.

18Ou chéve Ñanderuete ñe’ẽ ha he’i:

19Péicha he’i ángel atykuéra Jára: Pe karu’ỹ pe jasy irundy, 5, 7 ha 10-hápe, oguerúta Juda rógape g̃uarã vy’a tuicha, upévare pehayhúke pe añetegua ha pe py’aguapy.

20Péicha he’i ángel atykuéra Jára: Oikoveva’erã avei heta tetãygua ha tavayguakuéra.

21Ha umi tavaygua oútava peteĩ távagui og̃uahẽvo he’iva’erã ambue tavayguakuérape: Jaha ñamboguemive ángel atykuéra Jára pochy kuave’ẽmby rupi, ha jaheka ichupe.

22Ha upéicha heta tetã ha tetã imbaretéva ouva’erã Jerusalénpe oheka hag̃ua Ñanderuetépe ombogue hag̃ua Ñanderuete pochy.

23Péicha he’i ángel atykuéra Jára: Umi ára umívape ojehuva’erã 10 kuimba’e tetã ambueyguágui he’iva’erã peteĩ Judayguápe ipojáivo ijao apýra rehe: Ore rohose nendive, rohendúgui Ñanderuete oĩha penendive.

← Chapter 7 Jump to: Chapter 9 →