Zechariah 11

Guarani 2015 (Ñanderuete Ñe’ẽ Porã 2015)

← Chapter 10 Jump to: Chapter 12 →

1Ha nde, Líbano, eipe’ána ne rokẽnguéra, ha pe tata tohundi nde cedrokuéra.

2Nde, yvyra cipres, nerasẽke, pe cédro ho’a haguére, umi yvyra iporãvéva ojeitypa haguére. Penepyahẽke peẽ, Basan pegua yvyra encína, ojeitypágui pe ka’aguy porãite.

3Umi ovecha rerekua ipyahẽ asy oñehundígui pe kapi’i rovyũ, ha umi leõ ra’yrusu okororõ oñehundígui avei ka’aguy porã oĩva’ekue ysyry Jordan rembe’ýpe.

4Ñanderuete, che Jára he’i chéve: Eñangareko umi ovecha ojejukátava rehe,

5ha umi ojoguáva ko’ã ovecha ojuka ichupekuéra oñembyasy’ỹre ha ovende rire he’i: Grácias Ñanderuetépe, ahupitýgui heta pirapire, iñangarekohára jepeve ndoiporiahuverekói ichupekuéra.

6Upévare Che ndaiporiahuverekomo’ãvéi avei Judayguakuérape oikóva ko tetãme, he’i pende Ruete, péina ápe Che voi amoĩta Judayguakuéra iñirũ poguýpe ha hetã ruvicha poguýpe, ha’ekuéra ombyai hag̃ua ko tetãme ha Che naguenohẽmo’ãi ichupekuéra ipoguikuéra.

7Upéicha Che añangareko umi ovecha ojejukátava rehe, ko’ã ovecha iporiahuvévape pe atýgui. Ha aiporavo che mba’erã ramo mokõi yvyra po’i: Peteĩme ambohéra Poriahuvereko ha ambuépe Py’aguapy, ha umía reheve añangarekóta che ovechakuéra rehe.

8Ha peteĩ jasýpe amosẽ mbohapy ovecha rerekua chembopochývape, oñemoĩ haguére cherehe.

9Ha ha’ékuri: Nañangarekomo’ãvéima penderehe, tomano umi omanótava, ha toñehundi umi oñehundítava, ha umi hembýva, peteĩteĩ to’u hapicha ro’o.

10Upéi ahupi che yvyra po’i Poriahuvereko ha amopẽ, ambyai hag̃ua che ñembopy’apeteĩ ajapova’ekue tetãnguéra ndive.

11Ha upe ára upévape ambyai che ñe’ẽme’ẽ, upérõ ae umi ovecha joguahára ohechakuaa péva ningo ha’eha Yvága Jára ñe’ẽ.

12Ha ha’e ichupekuéra: Oĩ porã ramo peẽme, peme’ẽ chéve che rembiapo repykue, ha nahániri ramo, pehejánte. Ha oha’ã hikuái che rembiapo repykue ramo 30 pláta akytãmi (monéda).

13Ha he’i chéve Ñanderuete: Eñongatu ko’ã 30 pláta akytãmi che rembiapo repy, ambue pláta oñeñongatuhápe che rogaguasúpe. Ha añongatu ko pláta Ñanderuete rogaguasúpe, oĩháme ambue mba’erepy.

14Ha upéi amopẽ ambue yvyra po’i hérava Py’aguapy, oñembyai hag̃ua avei pe mborayhu Juda ha Israel apytépe.

15Ha he’i chéve Ñanderuete: Egueru avei umi tembiporu peteĩ ovecha rerekua tavy oiporúva.

16Eikuaa porãke, Che voi amopu’ã tetãpýpe peteĩ ovecha rerekua oheka’ỹva umi ovechakuéra okañyva’ekuépe, ha noipohãnomo’ãiva hetyma opẽháme, ha ndohupimo’ãiva umi ikane’õvape, ho’úta uvei pe ovecha ikyravéva ro’okue, hemby’ỹre ipysãpẽnte jepe.

17Angái, peẽ ovecha rerekua pituva peheja reipáva pene rymbakuéra, kyse puku toikutu ijyva ha hesa akatúape, toñembopiru ichugui ijyva, ha hesa taiñypytũ.

← Chapter 10 Jump to: Chapter 12 →