Hosea 10

Gussi (EBIBILIA ENCHENU) 2020

← Chapter 9 Jump to: Chapter 11 →

1Abaisraeli nigo banga buna omosabibu okororekana ore omuya mono okwama amasabibu. Buna koreng’ana okwama kwabo kwamentekanete, naboigo bagendererete koagacha ebisasimero ebinge; na buna bagendererete gotenenka, naboigo bagendererete gotenenia chisiiro bagosasima.

2Nigo bare abang’ainereria ase chinkoro chiabo; ase ayio goika baegwe egesusuro gi’okomocha kwabo. Omonene natagore ebisasimero biabo, atagore ne chisiiro chiabo bagosasima.

3Erio abanto abwo mbatebe, “Titobwati omoruoti, ekiagera titomoirogeti Omonene. Inee! Toraba nomoruoti, ngento ki aratokorere?”

4Nigo bagokwana amang’ana atari nengencho, naende betiania ase oborimo ekero bagokora okobwatana kw’ogotianania; ase igo ekina nigo gekobachera buna ekemeri kere nobosongo ase emetaro ya mogondo.

5Abanto bamenyete Samaria mbatengechigwe ase engencho y’omogwekano bw’emori bagosasima agwo Beti‐Aveni. Abwo bakoyosasima mbarere, na abakuani baye mbeng’ererie, ekiagera obonene bwaye bwasirigwe.

6Omogwekano oyio noirwe Asuri, oegwe omoruoti Yarebu buna ekeegwa. Abaefraimu mbabe nobosooku, na Abaisraeli mbasookigwe boigo ase engencho y’emeroberio yabo abanyene.

7Omoruoti o Samaria nasirigwe arueo buna riuro rigosira korwa ase amache igoro.

8Aase aimokererete igoro agosasimerwa agwo Aveni, ase Abaisraeli bakoreire ebibe, nasirigwe. Amagwa na amageri mbimere ase ebisasimero biabo; erio abanto abwo batebie ebitunwa: “Totube”, na ebigoro: “Togwere”.

9“Inwe Abaisraeli, nigo mwagendererete gokora ebibe korwa ase amatuko aria mwarenge Gibea, na goika bono nigo mogendererete gokora bo. Inee! Esegi y’okorusia egesiomba igoro y’abakori amabe tiyababuete agwo Gibea?

10Ekero ndaganie, nimbae egesusuro gi’okobarongeyia, erio abanto b’ebisaku ebiaao mbasangererekane amo, babachere amo babae egesusuro ase engencho y’ebibe biabo bibere.

11“Abaefraimu nigo barenge buna ritororo riorokereretigwe buya, rianchete koora, inche nigo nabegete rikorogoto ase ebigoti biabo ebiya. Bono nimbekere Abaefraimu rikorogoto, nonya n’Abayuda goika babe bakorema, na aba Yakobo goika babe bakobosa.

12Ebusurere oboronge, mogese ayare ay’obwanchani, eremere chimbuna chiaino, ekiagera eye nero engaki y’okomorigia Omonene, erinde ache abatwerie oboronge buna embura egotwa.

13Mwasimekire ayare amabe, mwagesire aya atari ay’oboronge, mwarire ayare okwama kw’oborimo. “Nigo mwasemeretie ogokora kwaino, na obonge bw’abarwani esegi baino chituoni.

14Ase ayio eriomana rie chisegi ndibe ase egati y’abanto baino, ne chiburi chiaino chisarigwe, buna omoruoti Salimani asaretie Beti‐Aribeli ase rituko riria ri’esegi, abang’ina amo nabana babo banachanetwe bakaba ebing’ese.

15Naboigo na abanto ba Beteli barabakore ase engencho y’obobe bwaino obonene. Kobogokiamoka omoruoti bw’Abaisraeli naitwe akwe.”

← Chapter 9 Jump to: Chapter 11 →