Hosea 13

Gussi (EBIBILIA ENCHENU) 2020

← Chapter 12 Jump to: Chapter 14 →

1Ekero Abaefraimu barenge gokwana, abanto nigo barenge koiguswa; nigo beimokereretie igoro ase egati y’Abaisraeli; korende bakarenta okomocha ase ogosasima enyasae Baali, na ase ayio bagakwa.

2Nigo bagendererete gokora ebibe goetania, bakaroisia emegwekano ye chifeta bagosasima, eyio babombete nobong’aini. Eyio yonsi nemeremo yaroisirie nabaroisia b’ebinto. Nigo bagoteba igoro y’abwo: “Abwo bakorua abanto baba ebing’wanso, nigo bakonyunyunta emegwekano eyio ye chimori.”

3Ase ayio abanto abwo nabasire buna ritaturi ria mambia, gose buna riime rigosira bwango, na buna omoiriro okoirurukigwa nomwaga korwa ase ekeooreri, gose buna erioki rigoetera ase ekebao riasira.

4“Inche ninche Omonene, Nyasae oino, korwa ekero mwarenge ase ense ya Misiri. Timwabete momanyete enyasae ende yonsi otatiga inche; omotooria onde tari otatiga inche.

5Ninche nabarendete ase erooro, ense eria enyomo pa egosamba.

6Korende ekero banyorete endagera eisaine, bakaria bakaigota, erio bakaenena na kweimokereria igoro; ase ayio bakanyeba.

7Ase engencho eyio nkaba buna endo asebare, nkababoera ase chinchera chiabo buna engo ekoboera.

8Nimbaumokere buna edubu yaurirwe chimanwa chiaye, mbatandore ebikuba biabo, erinde mbaite mbarie buna endo ekoria, ee, nimbe buna eng’iti y’orosana mbatandorane.

9“Inwe Abaisraeli mwesiririe inwe abanyene ase okoba mamincha yane, inche oyo narenge ogokonyeka kwaino.

10Bono ng’ai omoruoti oino are, erinde abatoorie ase emechie yaino yonsi? Ng’ai abagambi ebina baino bare, inwe abamwatebete: Toe omoruoti na abagambi batogambere?

11Nkabaa omoruoti inde nendamwamu, naende namorusirie inde nekeririanda.

12“Obobe bw’Abaefraimu nigo bosibire amo, na ebibe biabo nigo birikire bigachire.

13Obororo bonga buna obw’omokungu okobina aibore mbobachere, nigo bonga buna omwana otari nokomanya osinyirwe gosoka korwa ase enda ya ng’ina ekero engaki yaye yaikire.

14Nimbaboorie korwa ase okobua gw’aase abakure, na nimbatoorie korwa ase amakweri. Aye amakweri, amaako ao ng’ai are? Aye aase abakure, ng’ai ogosiria kwao kore? Ogweitia gwasirire korwa ase amaiso aane?

15Abaefraimu nabaisa koibora babuche ase egati y’abamwabo, omwaga korwa moocha noche, ee, omwaga bw’Omonene noche korwa ase erooro. Erio ebisima biabo bi’amache biome, ne chinsoko chiabo chikame. Omwaga oyio nosirie kegima chinibo chiabo banchete.

16Abanto ba Samaria mbaegwe egesusuro, ekiagera basaririe ase Nyasae obo, mbaitwe nemioro, na abana babo banachanwe ebing’ese. Abakungu babo bare barito mbatandorwe chinda.”

← Chapter 12 Jump to: Chapter 14 →