Hosea 11

Gussi (EBIBILIA ENCHENU) 2020

← Chapter 10 Jump to: Chapter 12 →

1“Ekero Israeli arenge omwana, nigo namwanchete, na korwa Misiri nkarangeria omwana one.

2Buna bagendererete korangerigwa, nabo bagendererete kona‐kwerusanania. Nigo babete bakorua ebing’wanso ase chinyasae Baali, na bagasamba ubani ase emegwekano barenge gosasima.

3Ninche norokereretie Abaefraimu gotaara, nkababogoria namaboko aane, korende abanto abwo tibamanyete ng’a nigo naganetie kobagwenia.

4Nigo nabang’usete ne chingori chinyororo, ee, ne chingori chi’obwanchani. Nigo nororobetie rikorogoto igoro ye chinsea chiabo, ngekumba gochia inse nkabarageria.”

5“Barabwo mbairane gochia ase ense ya Misiri, na Abaasuri mbabagambere, ekiagera bangire koirana gocha asende.

6Omoro nogwere emechie yabo nobotindi, nosarie emekorogoto y’ebiita biabo na gosaria kende gionsi ase engencho y’emeroberio yabo abanyene.

7Abanto baane nigo banchete gontiga, nonya bakorangerigwa gochia ase Oyore Igoro Mono, onde tari okomotogia, nonya noyomo.”

8“Inwe Abaefraimu, naki ndakore mbatige? Inwe Abaisraeli, naki ndakore mbatige morue asende? Naki ndakore mbatige buna natigete Adima? Naki ndakore mbakorere buna nakorerete Seboimu? Enkoro yane nigo egwoka, na amabera aane onsi abokire ime yane.

9Tinkobaa egesusuro konde nendamwamu egwoka, gose tingosiria Abaefraimu naende, ekiagera inche nigo inde Nyasae, tindi mwanyabanto. Inche nigo inde Omochenu imenyete ase egati yaino, na tingocha asemore inde nekeririanda.

10“Abanto abwo mbabwatie Omonene; ere narume buna endo, ee, narume, na abanto baye mbache korwa bosongo bakoiguswa.

11Mbairuruke buna chinyoni korwa Misiri, bache bakoiguswa, na buna amaruma korwa ase ense y’Asuri. Nimbabeke bamenye ase chinka chiabo.” Nabo Omonene atebire.

12Abaefraimu bang’etananire namang’ana ’oborimo, na Abaisraeli boigo namang’ana ’obong’ainereria; na Abayuda nigo bagendererete gosaria ase Nyasae, oria ore Omochenu na Omwegenwa.

← Chapter 10 Jump to: Chapter 12 →