Hosea 5

Gussi (EBIBILIA ENCHENU) 2020

← Chapter 4 Jump to: Chapter 6 →

1“Inwe abakuani, igwa ring’ana eri! Inwe Abaisraeli, tegerera moigwe! Inwe ab’enyomba y’omoruoti, tegerera moigwe! Ekina kianachirwe igoro yaino, ekiagera mwabeire oboreba agwo Misipa, na ekeonga getegire agwo ase Tabori igoro.

2Abasaria nigo bagendererete komenta obobe bwabo, korende bonsi nimbae egesusuro.

3Nimbamanyete Abaefraimu, na Abaisraeli tibakonyara kwebisa korwa asende. Inwe Abaefraimu mwakorire ay’obonyaka, ee, Abaisraeli besoirie ase ogotacheneka.

4“Ogokora kwabo kwabatangire tibairanera Nyasae obo. Omoika bw’obotomani nigo ore ime yabo, tibamomanyeti Omonene.

5Oboenenu bw’Abaisraeli nigo bobaberete kirori. Abaisraeli na Abaefraimu mbagochwe bagwe ase engencho y’ebibe biabo, na Abayuda mbagwe amo nabarabwo.

6Mbaire amaicho e chitugo chiabo bagende korigia Omonene, korende tibakomonyora, ekiagera nabe bweatananirie korwa asebare.

7Barabwo tibabete abegenwa ase Omonene. Nigo baiborete abana batari abaye. Ase ayio, emeyega y’Omotienyi Omoyia nebasirie amo nemeganda yabo.

8“Bugia ebitureri bi’esegi agwo Gibea, na mobugie ebirombeta agwo Rama! Aka eriogi ri’ogotabobora agwo Beti‐Aveni! Inwe abanto ba Benjamin, ababisa nkobabwatia bare.

9Abaefraimu mbasirigwe kegima ase rituko riria ri’egesusuro. Ase egati y’ebisaku bi’Abaisraeli inche nararirie, ayarache goikeranigwa ekeene.

10“Abagambi b’Abayuda nigo babeire buna abwo bagotumana chimbebe; ase ayio nimbaumorere ekeririanda kiane buna amache.

11Abaefraimu baregirwe na gotiringerwa inse ase ekina, ekiagera beruete ase okobwatia emeroberio ya bosa.

12Ase ayio nimbe buna ekegwankwa kegosaria ase Abaefraimu, na buna obogundo ase Abayuda.

13“Abaefraimu mbaroche oborwaire bwabo, na Abayuda amagumba abo. Ase ayio Abaefraimu bakagenda ase Abaasuri, bakarangeria omoruoti Yarebu. Korende omoruoti oyio takonyara kobagwenia korwa ase oborwaire bwaino, gose amagumba aino,

14Nimbe buna endo ase Abaefraimu, na buna endo ensae ase Abayuda. Inche omonyene nimbwate eke natwarire nkeire; ee, nkeire, na onde tari oragetoorie.

15“Ning’irane ngende ase obomenyo bwane, goika babe bamanyire okomocha kwabo, erinde bache kondigia. Ee, ekero bare nemechando mbaayerere gocha kondigia.”

← Chapter 4 Jump to: Chapter 6 →