Hosea 7

Gussi (EBIBILIA ENCHENU) 2020

← Chapter 6 Jump to: Chapter 8 →

1“Ekero nganetie kogwenia Abaisraeli, ogosaria kw’Abaefraimu na ogokora okobe kw’Abasamaria nigo gokororekana maiso marore. Barabwo nigo bagokora ay’obong’ainereria; abaibi nigo bagotagora chinyomba basoa ime, na ebiombe bi’abauri nigo bikourereria isiko.

2Barabwo tibari korengereria ng’a inche nigo ng’inyorete ogokora kwabo gwonsi okobe. Bono ogokora okwo kwabo okobe kwabaetananire onsi nigo kore ase obosio bwane.

3“Nigo bakogokia omoruoti nogokora kwabo okobe, na kogokia abagambi nobong’ainereria bwabo.

4Abwo bonsi nigo bare abatomani. Nigo banga buna eriko ri’okogekera emegati riutire omorero, na omoroisia bw’emegati nigo agotiga koigereria omorero goika abe okonyire ribomba ri’obosie na ememera ebe yaribotirie.

5Ase rituko rinene ri’omoruoti oito abagambi bakanywa edivai endoro goika ekabarwaria, na ere omonyene akarambora okoboko kwaye, akabwatana nabanyacheche.

6Chinkoro chiabo nigo chiare gwoka nokogania okobe buna eriko rigwoka omorero. Ase obotuko bwonsi, okogania okwo nigo gokorara, na mambia kobwakire kwaba kogwoka buna omorero ekebemberi.

7“Abanto abwo bonsi nigo bagwoka buna omorero o riko, bagosiria abagambi babo b’ebina. Abaruoti babo bonsi bagure, na onde tari ase abwo okondangeria imokonye.

8“Abaefraimu bochoganire nabanto b’ebisaku. Nigo banga buna omogati otaonchoiri kogekeire.

9Abanto b’ebisaku ebigeni bakoorire chinguru chiaye, na ere tamanyeti amang’ana ayio; chimbuche chiamerire ase omotwe oye, nere tamanyeti ayio.

10Oboenenu bw’Abaisraeli bwababereire kirori. Nonya naboigo, tibari komoiranera Omonene, Nyasae obo, gose komorigia.

11Abaefraimu nigo banga buna riruma ririri, ritari nokomanya. Nigo bagosaba ogokonywa korwa Misiri, naende bagenda Asuri.

12Ekero barabe bakogendao, nindambore ekeonga kiane mbabwatere imeo buna chinyoni chikobwatwa. Nimbae egesusuro ase okobarongeyia, koreng’ana buna omosangererekano obo bworokererigwe.

13“Obobe nobwabo, ekiagera batamire korwa asende. Mbasirigwe, ekiagera basaririe asende bantigire. Nanga nabatooria, korende babeire bagokwana oborimo igoro yane.

14Tibari korera asende korwa ase chinkoro chiabo, korende nigo bakona‐kwerera ase amarere abo. Nigo bagosangererekana amo bachandekerete endagera na edivai, ekero bagendererete gosaria asende.

15Nonya naborokereretie na gokong’ia amaboko abo, nigo bagendererete koroberia amabe igoro yane.

16Barabwo nigo bakoonchoka, korende tari gochia ase Oyore Igoro Mono. Nigo banga buna obota bootokanete. Abagambi babo mbaitwe nemioro ase engencho y’obotindi bwe chimeme chiabo. Ring’ana erio ndigere ense ya Misiri ebasekerere na kobachaya.

← Chapter 6 Jump to: Chapter 8 →