John 21

Gussi (EBIBILIA ENCHENU) 2020

← Chapter 20 Jump to:

1Nyuma ase aya Yeso akeorokia naende ase aborokigwa baye ase enyancha ya Tiberia. Ayio nigo akorekanete iga:

2Simion Petero, na Tomas oyokorokwa Barongo, na Natanaeli o Kana ya Galili, na abamura ba Zebedi, na babere bande b’aborokigwa baye barenge amo.

3Simion Petero akabatebia, “Nkogenda nde koruba chinswe.” Bakamotebia, “Naintwe natogende amo naye.” Bagasoka, bakariina obwato ime, korende obotuko boria tibanyora gento.

4Goika bogachia gokia mambia, Yeso agatenena ase engegu, korende aborokigwa tibamanya ng’a n’Yeso.

5Erio Yeso akababoria, “Abana, more neki mokoria?” Bakamoiraneria, “Yaya.”

6Akabatebia, “Ruta ekeonga ensemo ya borio y’obwato, na inwe namonyore chinswe.” Erio bagakeruta, korende tibanyara gokeng’usa ase engencho y’obonge bwe chinswe.

7Omworokigwa oria Yeso anchete agatebia Petero, “Nere Omonene.” Erio Simion Petero, agachia koigwa ng’a n’Omonene, akeboyia eanga yaye (ekiagera arenge getirianda), akeruta enyancha ime.

8Korende aborokigwa bande bagacha ase obwato, bagakurura ekeonga geichire chinswe, ekiagera tibarenge are ase ense enyomo, ang’e chifuti amagana atato.

9Erio kobachia goika engegu, bakarora omorero bw’amakara aroro, na enswe ebekire igoro yaye, na omogati.

10Yeso akabatebia, “Renta aiga echinde chie chinswe echi mwarubire bono.”

11Erio Simion Petero akariina obwato ime, akang’usa ekeonga gochia engegu geichire chinswe chinene, rigana erimo, na emerongo etano, na isato; nonya chiarenge chinyinge buna iga, ekeonga tigiatandogete.

12Yeso akabatebia, “Inchuo morie!” Gose onde tarenge ase aborokigwa baria orenge na boremu komoboria, “Aye naye ng’o?” Ekiagera mbamanyete ng’a n’Omonene.

13Yeso akagenda akabogoria omogati, akabaa, ne chinswe boigo.

14Eke nekero kia gatato Yeso arorekanete ase aborokigwa baye nyuma y’okobokigwa korwa ase abakure.

15Erio kobakoorire koragera, Yeso akaboria Simion Petero, “Simion mosinto o Yohana, nonyanchete kobua aba?” Akamoiraneria, “Ee, Omonene, aye nomanyete ng’a ningwanchete.” Akamotebia, “Risia chimanwa chie ching’ondi chiane.”

16Akamoboria eria kabere, “Simion mosinto o Yohana, nonyanchete?” Akamoiraneria, “Ee, Omonene, aye nomanyete ng’a ningwanchete.” Akamotebia, “Risia ching’ondi chiane.”

17Akamoboria eria gatato, “Simion mosinto o Yohana, nonyanchete inche?” Petero agaichana ekiagera amoboretie eria gatato, “Nonyanchete?” Akamoiraneria, “Omonene, aye nomanyete onsi, nomanyete ng’a ningwanchete.” Yeso akamotebia, “Risia ching’ondi chiane.

18Ekeene, ekeene, nagotebirie: Ekero kwarenge omosae, nigo kwarenge kweboyia, kwagenda aase origetie, korende ekero orache koba omogaaka, norambore amaboko ao, na oyonde nagosibe, akoire aase otancheti.”

19(Agakwana eri ase okworokia imakweri ki aramotogie Nyasae). Erio gakoorire gokwana aya, akamotebia, “Ntunyana?”

20Petero akeonchora, akarora omworokigwa oria Yeso anchete okobatunyana; nere oria bweegegete egekuba kiaye ekero gi’okoria endagera ya mogoroba na gokwana, “Omonene, ning’o orakorue?”

21Petero agachia komorora oyio, akaboria Yeso, “Omonene, noyo rende?”

22Yeso akamoiraneria, “Kondarigie oyo abeo goika inchiche, inki ogwechandera ayio? Aye ntunyane inche.”

23Erio ring’ana eri rigasarera ase abamwabo ng’a omworokigwa oria tagokwa, korende Yeso tamotebetie ng’a tagokwa, otatiga, “Kondarigie abeo goika inchiche, inki ogwechandera ayio?”

24Oyo nomworokigwa oria oroche aya, na koyarika, naende twamanyire ng’a oborori bwaye nobw’ekeene.

25Nare naende ayande amange aya Yeso akorete; naro kararikwe erimo erimo, nigo ngokaga ng’a nonya nense yonsi tegoisana chibuku echiranyare korikwa chibekwe.

← Chapter 20 Jump to: