John 8

Gussi (EBIBILIA ENCHENU) 2020

← Chapter 7 Jump to: Chapter 9 →

1Korende Yeso akagenda ase egetunwa ki’Emezeituni.

2Mambia chuni agasoa naende Hekalu ime. Abanto bonsi bakamochiera, na ere agaikaransa, akaborokereria.

3Aborokia b’amariko na Abafarisai bakarenta omokungu obwatetwe ase obotomani. Kabamobekire gati‐gati,

4bakamotebia, “Omworokia, omokungu oyo nigo abwatwa kagokora obotomani.

5Nabo ase amachiko Musa atochigete kobaaka amagena abakungu banga buna oyo, naki aye ogoteba igoro asare?”

6Bagateba ring’ana eri ase okomoteema, banyore enchera bakomosoera. Korende Yeso agekumba, akarika nekiara kiaye inse.

7Barabwo kobamentire komoboria, akagororoka, akabatebia, “Ere oyotari nebibe ase egati yaino abe oyo bwe ritang’ani komoruta rigena.”

8Agekumba naende, akarika nekiara kiaye inse.

9Barabwo bagachia koyaigwa, bagasoka oyomo oyomo, abagaaka nabwo bachagete. Yeso bweka agatigara, na omokungu oria oteneine gati‐gati.

10Yeso akagororoka tarora monto onde otatiga omokungu oria, akamoboria, “Omokungu, ng’ai abagosoeri bao bare? Onde tari ogokogambia?”

11Akamoiraneria, “Onde tari, Omonene.” Yeso akamotebia, “Na inche tingokogambia. Genda, korende tokora ebibe naende.”]

12Yeso agakwana nabarabwo naende, akabora, “Inche nomobaso bw’ense; oyogontunyana takogenda ase omosunte, korende nabe nomobaso bw’obogima.”

13Erio Abafarisai bakamotebia, “Aye nigo okwebera kirori omonyene, na oborori bwao tibori obw’ekeene.”

14Yeso akairaneria, “Nonya ngwekwana inche omonyene, oborori bwane nobw’ekeene, ekiagera namanyire aase narure, na aase nkogenda; korende inwe timomanyeti aase narure, gose aase ngochia.

15Inwe nigo mokogambia ase okobwatia amang’ana a mwanyabanto; inche tindi kogambia omonto.

16Naende ninsa kogamba, okogamba kwane nogw’ekeene, ekiagera tari inche bweka nkogamba, korende ninche na Tata oyontomete.

17Naende ase amachiko aino nigo arikire ng’a oborori bw’abanto babere nobw’ekeene,

18Inche ninche nkweorokia omonyene, nere Tata oyontomete nigo akong’orokia.”

19Erio bakamoboria, “Ng’ai Iso are?” Yeso akairaneria, “Timokomanya inche, nonya n’Tata timokomomanya, onye momanyete inche, anga mwamomanyire na Tata one.”

20Amang’ana aya Yeso nigo ayakwanete, gakworokereria ase Hekalu, ase enyomba y’ekebekerero gi’esadaka; omonto tari omobwatete, ekiagera ensa yaye konya teraika.

21Yeso akabatebia naende, “Inche nkogenda nde, na inwe namondigie, namokwe ase ebibe biaino; aase nkogenda inche, timokonyara gochao.”

22Abayahudi bakabora, “Inee! Nigo areite, ekiagera akobora: Aase nkogenda inche, timokonyara gochao?”

23Akabatebia, “Inwe naba inse; inche noyo o igoro; inwe nab’ense eye; inche tindi oyo bw’ense eye.

24Ase ayio nabatebia ng’a namokwe ase ebibe biaino. Onye timokwegena ng’a inche nere, namokwe ase ebibe biaino.”

25Nabo bakamoboria, “Naye ng’o?” Yeso akabairaneria, “Nonya nayio nabatebirie inwe korwa omochakano.

26Ninde namange ngokwana na kogamba ase engencho yaino, korende ere oyontomete noyo bw’ekeene; na inche aya naigwete korwa asare, naro nkoorokia ase ense.”

27Tibamanya ng’a nigo are gokwana asebare aya Ise.

28Erio Yeso akabatebia, “Ekero mwakoorire koimokereria igoro Omwana‐o‐mwanya‐banto, erio namomanye ng’a ninche ere, naende tindi gokora kende ase okobua kwane omonyene, korende buna Tata anyorokereretie, nabo ngokwana.

29Ere oyontomete nigo are amo nainche, tantigeti inche bweka, ekiagera botambe nigo ngokora ayakomogwenera.”

30Gakwanire aya, abange bakamwegena.

31Nabo Yeso agatebia Abayahudi baria bamwegenete, “Komoramenye ase ring’ana riane, nigo more aborokigwa baane b’ekeene,

32naende namomanye ekeene, na kerokio nakebasibore.”

33Bakamoiraneria, “Igo tore oroiboro rwa Ibrahimu, na titoraba abasomba b’omonto kero kende gionsi, naki rende ogoteba: Namokorwe abasibore?”

34Yeso akabairaneria, “Ekeene, ekeene, nabatebirie: Onde bwensi ogokora ebibe, oyio nomosomba bw’ebibe,

35naende omosomba tari komenya nyomba botambe, korende omobiare nigo akomenya botambe.

36Gaki Omwana karabasibore, namobe abasibore kegima.

37Namanyire ng’a nigo more oroiboro rwa Ibrahimu; korerende nigo mokorigia kong’ita, ekiagera ring’ana riane tirinyoreti ibaga ime yaino.

38Aya narorire ase Tata naro ngokwana; nainwe naboigo ayamwarorire ase iso oino, naro mogokora.”

39Bakamoiraneria, “Tata oito nere Ibrahimu.” Yeso akabatebia, “Onye nabana ba Ibrahimu mware, anga mwakora emeremo ya Ibrahimu.

40Korende bono morigetie kong’ita, ninche oyo nabatebirie ekeene keria naigure korwa ase Nyasae. Ibrahimu takorete igo.

41Inwe nigo mogokora emeremo ya iso oino.” Bakamotebia, “Intwe titoiboiri ase obonyaka; nigo tore na Tata oyomo, nere Nyasae.”

42Yeso akabatebia, “Onye Nyasae n’Iso oino are, anga monyanchete inche; naki narure ase Nyasae, na igo nachire; gose tinyerenteti inche omonyene, korende nere ontomire.

43Naki motamanyeti amang’ana aane aya ngokwana? Nekiagera motancheti koigwa ring’ana riane.

44Inwe naba iso oino Saitani, na ogwancha kwaino nogokora okogania gwa iso. Ere nigo arenge omoiti korwa omochakano, gose tatenenete ase ekeene, ekiagera ekeene tikeri ime yaye. Kagokwana oborimo, nigo agokwana ayare ayaye omonyene, ekiagera nomonyaborimo, na ise bw’oborimo.

45Ekiagera inche ngokwana ekeene, timori konyegena.

46Ning’o ase egati yaino okong’orokia ng’a ninde nebibe? Kongokwana ekeene, naki inwe motakonyegena?

47Oyore o Nyasae nigo akoigwa amang’ana a Nyasae; nakio gekogera inwe motari koyaigwa: nekiagera motari aba Nyasae.”

48Abayahudi bakamoiraneria, “Titori gokwana boronge ng’a aye nigo ore Omosamaria, naende nigo obwatire nekerecha?”

49Yeso akairaneria, “Inche timbwatiri nekerecha, korende nigo nsigete Tata one, na inwe timonsigeti.

50Inche tindi korigia obonene bwane; nare oyomo oyokoborigia, nere orabe omogambi.

51Ekeene, ekeene, nabatebirie: Omonto karabwate ring’ana riane, takorora amakweri nonya ng’ake.”

52Nabo Abayahudi bakamotebia, “Bono twamanyire ng’a nigo obwatire nekerecha, Ibrahimu okure, na ababani, na aye nigo ogoteba: Omonto karabwate ring’ana riane, takoigwa amakweri nonya ng’ake.

53Aye nomonene kobua sokoro yaito Ibrahimu, oyokure? Naende nababani bakure. Naye kogwekora obe ng’o?”

54Yeso akairaneria, “Kondetogie inche omonyene, obonene bwane tibori gento; oyogontogia n’Tata one, oyo mogoteba ng’a nere Nyasae oino.

55Na inwe timomomanyeti, korende inche nimomanyete. Kondatebe ng’a timomanyeti nimbe omonyaborimo buna inwe, korende nimomanyete, naende ring’ana riaye nindibwatete.

56Ibrahimu sokoro yaino nigo agogete ng’a nanyare korora rituko riane; akarirora, akagoka.”

57Erio Abayahudi bakamotebia, “Torakoora emiaka emerongo etano, na Ibrahimu kwamororire?”

58Yeso akabatebia, “Ekeene, ekeene, nabatebirie: Ritang’ani Ibrahimu atarabao, inche nao naare.”

59Erio bakaimokia amagena bamorute, korende Yeso akebisa, agasoka korwa ase Hekalu.

← Chapter 7 Jump to: Chapter 9 →

Recommended Reading

Commentary John Commentaries → Devotional John Devotional Guide → Get This Bible Gussi (EBIBILIA ENCHENU) Study Bible →