Leviticus 23

Gussi (EBIBILIA ENCHENU) 2020

← Chapter 22 Jump to: Chapter 24 →

1Omonene agakwana na Musa, akamotebia

2“Kwana n’Abaisraeli, obatebie: Morarie Amatuko Amanene ay’Omonene, na mobe nemesangererekano yaatananirwe ase ogosasima.

3Ase amatuko atano na rimo mokore emeremo yaino, korende ase rituko ria gatano na kabere n’Esabato, rituko ri’ogotimoka, rituko ri’omosangererekano bwatananirwe ase ogosasima. Timobaisa gokora meremo ende yonsi. Erio nerituko ri’Esabato ri’Omonene, aande onsi ase moramenye.

4“Naende nareo Amatuko ande Amanene ay’Omonene, mobe nomosangererekano bwatananire ase ogosasima, moyararie ase engaki yachikire.

5“Rituko ria ikomi na kane ri’omotienyi bwe ritang’ani, chinsa chia mogoroba, nario Epasaka y’Omonene.

6Na ase rituko ria ikomi na gatano ri’omotienyi oyio ne Rituko Rinene ri’Omonene, rituko ri’Emegati etabekiri memera; inamorie emegati etabekiri memera ase engaki y’amatuko atano na abere.

7Ase rituko rie ritang’ani mobe nomosangererekano bwatananire ase ogosasima, na timobaisa gokora emeremo ya kera rituko,

8korende namorue okoruegwa kw’endagera kogosambwa nomorero ase Omonene ase engaki y’amatuko atano na abere. Ase rituko ria gatano na kabere namobe nomosangererekano bwatananire ase ogosasima. Timokora emeremo ya kera rituko.”

9Omonene agakwana na Musa, akamotebia,

10“Kwana n’Abaisraeli, obatebie: Ekero moraike ase ense eria Omonene arabae, na mokogesa okwama kwaino, morente riboa ri’ogotongora kwe rigesa riaino ase omokuani.

11Ase rituko rigotunyana eri’Esabato ere asungusie riboa erio ase obosio bwane, erio monyore ogwancherwa.

12Ase rituko riria riboa erio rigosungusigwa inamorue boigo emanwa emingichi yakoorire omwaka oyomo, etari na kemocho ase omobere oye, ebe ekeng’wanso ki’ogosambwa asende.

13Amo nekeng’wanso ekio morue obosie ebimunu bine bwochoganirie namaguta, bibe okoruegwa kw’endagera kogosambwa nomorero ase Omonene, kore ne rimisu rigiya rikomogwenera. Amo nokwo morue edivai egetuba ekemo ebe okoruegwa gw’ekenyugwa.

14Timobaisa koria okwama okwo okoyia: Ebigara ebibese, gose ebikarangire, gose ebiaroisigwe emegati, ekero motararentera Nyasae oino okoruegwa kwaino kw’ogotongora. Ogochika okwo nigo koragenderere asemore ebiaare ase ebiaare, aande onsi ase moramenye.

15“Mobare chichuma isano na ibere korwa ase rituko rigotunyana eri’Esabato, rituko riria mokorentera Omonene riboa ri’ogotongora rigosungusigwa.

16Rituko ri’emerongo etano, nario rituko nyuma y’Esabato ya gatano na kabere, erio morentere Omonene okoruegwa konde kw’endagera enyia.

17Korwa ase kera enka morente emegati ebere eroisirie korwa ase obosie obonuke ebimunu bine amo nememera erabe okoruegwa kw’endagera entang’ani y’okwama, kogosungusigwa ase Omonene.

18Amo nokoruegwa okwo morente ching’ondi isano na ibere echiakoorire omwaka oyomo, na eeri ensae, ne chimingichi ibere, chionsi chitari na kemocho ase emebere yabo, chibe ekeng’wanso ki’ogosambwa ase Omonene, amo nokoruegwa kw’endagera na okw’ebinyugwa okwo gochikire amo. Okwo nokoruegwa kogosambwa nomorero ase Omonene, kore ne rimisu rigiya rikomogwenera.

19Naboigo morue egoree eyemo ebe ekeng’wanso ki’ebibe, ne chimanwa ibere chie ching’ondi, chiakoorire omwaka oyomo, chibe ekeng’wanso ki’omorembe.

20Erio omokuani asungusie omogati bw’ogotongora amo ne chimanwa chie ching’ondi echio ibere ase obosio bw’Omonene. Ebinto ebio biatananwe bibe ebichenu ase Omonene, bibe endagera y’omokuani.

21Rituko erio goika morarie na mobe nomosangererekano bwatananire ase ogosasima; timokora emeremo yaino ya kera rituko. Okwo nogochika koragenderere asemore ebiaare ase ebiaare, aande onsi ase moramenye.

22“Ekero mokogesa emegondo yaino, timogesa moikie ase chingito kegima, gose timoirana gochora ebitigari ase emegondo yaino; eyio motigere abataka na abamenyi. Inche ninche Omonene, Nyasae oino.”

23Omonene agakwana na Musa, akamotebia,

24“Batebie Abaisraeli ng’a rituko rie ritang’ani ri’omotienyi o gatano na kabere batimoke, batige emeremo kegima. Rituko erio naribe Rituko Rinene ri’Ekeinyorio, rirarigwe ase okobugigwa kw’ebiroria, babe nomosangererekano bwatananire ase ogosasima.

25Tibakora emeremo yabo ya kera rituko, nabanduere inche Omonene ekeng’wanso kegosambwa nomorero.”

26Naende Omonene agakwana na Musa, akamotebia,

27“Rituko ria ikomi ri’omotienyi oyio o gatano na kabere, erio nario Rituko ri’Okobwatanigwa, mobe nomosangererekano bwatananire ase ogosasima, na inwe inamobe mokweng’ata na gweitia, na mondetere inche Omonene ekeng’wanso kegosambwa nomorero.

28Ase rituko erio timokora emeremo ende yonsi; rituko erio nario Rituko ri’Okobwatanigwa ekero okobwatanigwa kogokorwa asemore, ase obosio bwane inche Omonene, Nyasae oino.

29Omonto onde bwensi oteng’ate na gweitia ase rituko erio naatananwe korwa ase abanto baye.

30Na monto onde bwensi orakore emeremo ende yonsi ase rituko erio, oyio inche Omonene nimosirie korwa ase abanto baye.

31Timokora emeremo ende yonsi. Okwo nogochika koragenderere asemore, ebiaare ase ebiaare aande onsi ase moramenye.

32Rituko erio naribe asemore rituko ri’Esabato, rituko ri’ogotimoka kegima, na inwe namweng’ate na gweitia. Ase rituko ria kianda ase omotienyi oyio, chinsa chia mogoroba, mochake korenda Esabato yaino, na mogenderere goika omogoroba onde.”

33Naende Omonene agatebia Musa,

34“Batebie Abaisraeli: Rituko ria ikomi na gatano ri’omotienyi oyio o gatano na kabere nario Rituko Rinene ri’ogochaka Amatuko Amanene ase Omonene. Amatuko ’Ebigutu agenderere ase engaki y’amatuko atano na abere.

35Ase rituko rie ritang’ani timogokora emeremo ende yonsi ya kera rituko, korende nigo morabe nomosangererekano bwatananire ase ogosasima.

36Kera rituko ase engaki y’amatuko atano na abere namobe mokoruera Omonene ekeng’wanso kegosambwa nomorero. Ase rituko ria gatano na gatato mobe nomosangererekano bwatananire ase ogosasima moruere Omonene ekeng’wanso kegosambwa nomorero. Oyio nomosangererekano bw’engencho enene bwatananire ase ogosasima; timokora emeremo yaino ya kera rituko.

37“Aya naro Amatuko Amanene ase Omonene; moyararie, mobe nomosangererekano bwatananire ase ogosasima. Ase amatuko ayio momoruere Omonene ekeng’wanso kegosambwa nomorero, na ebing’wanso bi’ogosambwa, na okoruegwa kw’endagera, na ebing’wanso binde, na okoruegwa kw’ebinyugwa, kera ekemo ase rituko riaye richikire.

38Amatuko aya Amanene nigo amentirwe ase Chisabato chiane chia botambe, naende amentirwe ase ebiegwa biaino, na ase ebing’wanso bie chiira mwariete, na ebi’ogwancha, mokomoruera Omonene.

39“Ase rituko ria ikomi na gatano ri’omotienyi o gatano na kabere, ekero mwakoorire rigesa ri’emegondo yaino, namorende Amatuko Amanene atano na abere ase Omonene. Rituko rie ritang’ani naribe rituko ri’Esabato, rituko ri’ogotimoka kegima, naboigo nase rituko ria gatano na gatato.

40Ase rituko rie ritang’ani namoimokie amatunda amaya korwa ase emete yaino emiya, ne chinsagia chi’emekendo, ne chinsagia chibwate amato amange, na echi’emete enga buna emesobeti, na inwe namobe nomochengo ase obosio bw’Omonene, Nyasae oino, ase engaki y’amatuko atano na abere.

41Amatuko atano na abere ase kera omwaka morende Amatuko ayio Amanene ase Omonene. Okwo nogochika koragenderere botambe asemore, ebiaare ase ebiaare. Ase omotienyi o gatano na kabere namoyarende.

42Abanto bonsi abare ababiare b’Abaisraeli nabamenye ase ebigutu ase engaki y’amatuko atano na abere.

43Erio chinderia chiaino inachimanye ng’a Omonene nabamenyetie inwe Abaisraeli ase ebigutu ekero nabang’anyetie korwa ase ense ya Misiri. Inche ninche Omonene, Nyasae oino.”

44Naboigo Musa akaba ogokwana n’Abaisraeli igoro y’Amatuko amanene ay’Omonene.

← Chapter 22 Jump to: Chapter 24 →