Leviticus 5

Gussi (EBIBILIA ENCHENU) 2020

← Chapter 4 Jump to: Chapter 6 →

1“Onye omonto okorangerigwa abe kirori na gotiana, anyare koorokia aya aroche, gose aigwete, ko tayaorokia, ere goika abarerwe obobe boria bw’ogotaorokia.

2“Onye omonto ogokuna kende gionsi getachenegeti, korabe omobere okwete bw’eng’iti y’orosana etachenegeti, gose oyo bw’eng’iti etugire etachenegeti, gose oyo bw’akang’iti agake gatechenegeti, nonya amang’ana ayio abisekanete, ere nabe oyotachenegeti, abarerwe obobe bwaye.

3“Omonto aise gokuna egento kende gionsi kia mwanyabanto getachenegeti, go korabe ogotacheneka gwa kende gionsi keramokore abe oyotachenegeti, nonya amang’ana ayio abisekanete asare, ekero arayamanye, nabe nokomocha.

4“Omonto karabe omwango gotiana ase ogokora amabe gose amaya, ogotiana konde gwonsi abanto bakoba abaango gotiana batari korengereria, na ayio abe abisekanete ase omonto oyio, ekero arayamanye, nabe nokomocha ase amang’ana ayio.

5“Ekero omonto arabe nokomocha ase amang’ana goika aorokie ebibe ebio akorire.

6Naende andetere inche Omonene ekeng’wanso gi’okorongeyia okomocha kwaye ase engencho y’ebibe ebio akorire; arente eng’iti eaberi, eng’ondi gose embori, ebe ekeng’wanso ekio ki’ebibe, na omokuani akore okobwatanigwa ase omonto oria, na omonto oria naaberwe ebibe biaye.

7“Korende onye omonto oria takonyara konyora eng’ondi, gose embori, rirorio andetere inche Omonene amaruma abere, gose amage ’amaruma abere, abe ekeng’wanso gi’okorongeyia okomocha kwaye ase engencho y’ebibe akorire. Erimo ribe ekeng’wanso ki’ebibe, na erinde ekeng’wanso ki’ogosambwa.

8Arente amaruma ayio ase omokuani, nere arue ritang’ani riruma erimo ribe ekeng’wanso ki’ebibe, amine ebigoti bie riruma erio, korende tabutora omotwe korwa ase ebigoti.

9Erio anyororokerie amanyinga make ay’ekeng’wanso ekio ki’ebibe ase egesasimero ensemo. Amanyinga agotigara ayanyititorere agwo inse ase egesasimero. Ekio nekeng’wanso ki’ebibe.

10Naende arue riruma ria kabere ribe ekeng’wanso ki’ogosambwa, koreng’ana buna achikire. Ase enchera eyio omokuani akore okobwatanigwa ase omonto oria ase engencho y’ebibe ebi akorire, na omonto oria naaberwe.

11“Korende onye omonto oria takonyara konyora amaruma abere, gose amage ’amaruma abere, rirorio arente obosie obonuke ebimunu bibere bobe okoruegwa kw’ebibe biaye. Tabeka amaguta, gose ubani, ase okoruegwa okwo, ekiagera nokoruegwa kw’ebibe.

12Arente obosie obwo ase omokuani, na omokuani aimokie obosie obwo boichire rce bobe ekemanyererio ng’a okoruegwa okwo kwarurwe asende inche Omonene, erio abosambere ase egesasimero, igoro ase ebing’wanso bigosamberwa nomorero asende. Okwo nokoruegwa gw’okorusia ebibe.

13Ase enchera eyio omokuani akore okobwatanigwa ase omonto oria ase engencho y’ebibe akorire ase ring’ana rinde rionsi ri’ayio, na omonto oria naaberwe. Oboratigare bobe obw’omokuani, buna obw’okoruegwa kw’endagera bokoba obwaye.”

14Omonene agakwana na Musa, akamotebia,

15“Monto onde bwensi karasarie na akore ebibe mosiabano atancheti ase ogotarua ebinto biatananirwe na gochenwa asende, goika andetere emingichi etari na kemocho ase omobere oye, ayerusie korwa ase riicho riaye ebe ekeng’wanso gi’okorongeyia okomocha kwaye. Naye oyekorere rigori rireng’aine eri’esekeli egokorerwa ase Obomenyo Obochenu.

16Omonto oria naakane egento keria egechenu ataruete, naende goika amente ensemo ya isano ye rigori ri’egento ekio, ayee omokuani. Erio omokuani arue emingichi eyio y’ekeng’wanso gi’okomocha na akore okobwatanigwa ase omonto oria, na omonto oria naaberwe.

17“Monto onde bwensi aise gokora gento ase amang’ana ayio inche Omonene nakanete ng’a takorwa, nonya tamanyeti ng’a ayio akorire nokomocha, ere omochire, goika abarerwe okomocha okwo.

18Ase ayio arente korwa ase riicho riaye emingichi etari na kemocho ase omobere oye ebe ekeng’wanso gi’okomocha. Naye oyekorere rigori. Ase enchera eyio omokuani akore okobwatanigwa ase omonto oria ase engencho y’okomocha koria akorire mosiabano atancheti, na omonto oria naaberwe.

19Ekio nekeng’wanso gi’okomocha. Omonto oria nigo arenge nokomocha ase obosio bw’Omonene.”

← Chapter 4 Jump to: Chapter 6 →