Ephesians 5

Hausa Arabic 2020 (أَتَّوْرَتْ دَ أَنَّبَاوَا)

← Chapter 4 Jump to: Chapter 6 →

1تُنْدَيَكٜىٰ كُنْ ذَمَ یَیَ وَطَنْدَ اللَّهْ يَكٜىٰ ڧَوْنَ، سَيْ كُطَوْكِ مِصَالِ دَغَ وُرِنْ اللَّهْ عَثِكِنْ ذَمَنْكُ؞

2كُيِ ذَمَنْ ڧَوْنَ كَمَرْ يَدَّ أَلْمَسِيحُ يَڧَوْنَثٜىٰمُ، يَكُمَ بَادَ كَنْسَ دُواْمِنْمُ، بَيْكُواْ مَيْ ڧَنْشِ، هَدَايَ كُمَ غَ اللَّهْ ؞

3كَدَ مَا عَكُواْ عَمْبَثِ إِسْكَنْثِ دَ كُواْوَنٜىٰ إِرِنْ عَيْكِنْ لَلَتَ كُواْ ݣُوطَيِ أَڟَكَانِنْكُ، دُواْمِنْ كُوَ بَيْ دَاثٜىٰ دَ ڟَرْكَكَابَ؞

4حَكَ مَا دَ ڧَظَامَرْ مَغَنَ دَ ذَنْثٜىٰنْ بَنْظَ دَ وَوَنْثِ، غَمَا بَسُ دَاثٜىٰ دَكُوبَ؞ أَ مَيْمَكُوانْ حَكَ كُدِنْ‌غَ غُواْدٜىٰ وَ اللَّهْ ؞

5كُدَيْ سَنِ ثٜىٰوَ مَيْيِنْ إِسْكَنْثِ، كُواْ مَيْ عَيْكِنْ لَلَتَ، كُواْ مَيْ ݣُوطَيِ، وَنْدَ شِ دَ مَيْ بَوْتَرْ غُمَكَ طَيَنٜىٰ، بَاسُدَ رَبُوانْ غَادُواْ أَمُلْكٍ أَلْمَسِيحُ دَ اللَّهْ كُواْ كَطَنْ؞

6كَدَ وَنِ كُوَ يَرُوطٜىٰكُ دَ مَغَنَرْ وُاْڢِ؞ أَيْ، سَبُواْدَ وَطَنَّنْ ذُنُبَيْ نٜىٰ ڢُشِنْ اللَّهْ يَكٜىٰ ذُوَا عَكَنْ مَاسُ رَشِنْ بِيَيَّ؞

7سَبُواْدَ حَكَ كَدَ كُهَطَكَيْ دَسُو؞

8دُواْمِنْ دَا كُنَ أَدُهُ، عَمَّا عَيَنْظُ، كُنْ سَامِ حَصْكٜىٰ تَوُرِنْ عُبَنْ‌غِجِ ؞ كُيِ ذَمَنْ مُتَنٜىٰنْ حَصْكٜىٰ،

9دُواْمِنْ حَصْكٜىٰ يَكٜىٰ حَيْڢَرْ دَ أَيُّكَ مَاسُ ݣَوْ دَ ذَمَنْ أَدَلْثِے دَ مَغَنَرْ غَسْكِيَ؞

10كُتَبَّتَرْ ثٜىٰوَ كُنْ كُواْيِ أَبِنْدَ ذَيْ غَمْشِ عُبَنْ‌غِجِ ؞

11كُرَبُ دَ أَيُّكَنْ دُهُ مَرَسَ أَمْڢَانِ، أَمَيْمَكُوانْ حَكَ كُتُواْنَسُ؞

12غَمَا أَبِنْ كُنْيَا نٜىٰ أَ مَا ڢَطَا أَبُبُوَنْ دَسُكٜىٰيِ عَٻُواْيٜىٰ؞

13سَعَدَّ عَكَ كَٰوُاْ دُكَنْ أَبُ أَغَبَنْ حَصْكٜىٰ، ذَاعَ سَنْ عَيْنِحِنْ يَدَّ سُكٜىٰ؞

14شِيَسَا عَكَثٜىٰ، «تَاشِ، كَيْ دَ كَكٜىٰ بَرْثِ! كَتَاشِ دَغَ مَتَتُّو! أَلْمَسِيحُ كُوَ ذَيْ حَصْكَكَاكَ؞»

15سَبُواْدَ حَكَ سَيْ كُمَيْدَ حَنْكَلِ ڨُورَيْ غَ ذَمَنْكُ؞ كَدَ كُذَمَ كَمَرْ وَوَيٜىٰ، سَيْدَيْ كَمَرْ مَاسُ حِكِمَ؞

16كُيِ أَمْڢَانِ دَ كُواْوَنٜىٰ ظَرَڢِ نَيِنْ كِرْكِ، غَمَا ݣُونَكِنْ دَمُكٜىٰ ثِكِ يَنْذُ مُوغَيٜىٰ نٜىٰ؞

17سَبُواْدَ حَكَ كَدَ كُذَمَ وَوَيٜىٰ، سَيْدَيْ كُڢَهِمْثِ كُواْ مٜىٰنٜىٰنٜىٰ نُڢِنْ عُبَنْ‌غِجِ ؞

18كَدَ كُمَ كُبُغُ دَ ضُوً إِنَبِے، وَنْدَ ذَيْ كَيْكُ غَ نٜىٰمَنْ جِنْ دَاطِے نَرَشِنْ كُنْيَا؞ أَ مَيْمَكُوانْ حَكَ كُثِكَ دَ رُوحُ ،

19كُيِ مَغَنَ دَ جُونَ دَ كَلْمُواْمِنْ زَبُورَا دَ وَاڧُواْڧِنْ يَبُواْ دَ وَاڧُواْڧِ نَرُوحَنِيَ؞ كُيِ تَرٜىٰرَ وَاڧُواْڧِ دَ زَبُورَا غَ عُبَنْ‌غِجِ دَ دُكَنْ ظُكَاتَنْكُ؞

20كُلُّمْ كُدِنْ‌غَ غُواْدٜىٰ وَ اللَّهْ عُبَادَ سُونَنْ عُبَنْ‌غِجِنْمُ عِيسَىٰ أَلْمَسِيحُ عَكَنْ دُكَنْ كُواْمٜىٰ؞

21كُمِيڧَ كَنْكُ غَ جُونَ ثِكِنْ ڟُواْرُوانْ أَلْمَسِيحُ ؞

22كُو مَاتَانْ عَوْرٜىٰ، كُمِيڧَ كَنْكُ غَ مَذَنْكُ، كَمَرْ يَدَّ كُكٜىٰيِ وَ عُبَنْ‌غِجِ ؞

23غَمَا مِجِ شِينٜىٰ كَنْ مَاتَرْسَ، كَمَرْ يَدَّ أَلْمَسِيحُ يَكٜىٰ كَنْ جَمَعَرْ مَاسُبِے وَتُواْ، جِكِنْسَ؞ شِے كَنْسَ كُمَ شِينٜىٰ مَيْ ثٜىٰتُوانْ جِكِنْ؞

24كَمَرْ يَدَّ جَمَعَرْ مَاسُبِے تَكٜىٰ مِيڧَ كَنْتَ غَ أَلْمَسِيحُ ، حَكَكُمَ مَتَ سُمِيڧَ كَنْسُ غَ مَذَنْسُ تَكُواْوَنٜىٰ حَلِ؞

25كُو مَظَا كُڧَوْنَثِ مَاتَنْكُ كَمَرْ يَدَّ أَلْمَسِيحُ يَڧَوْنَثِ جَمَعَرْ مَاسُبِے حَرْ يَبَادَ كَنْسَ دُواْمِنْتَ،

26دُواْمِنْ يَكٜىٰٻٜىٰتَ دَ ڟَرْكِے غَ اللَّهْ تَوُرِنْ مَغَنَرْسَ بَايَنْدَ يَڟَبْتَثٜىٰتَ تَوُرِنْ وَنْكٜىٰتَ دَ ضُوَ؞

27يَيِ وَنَّنْ دُواْمِنْ أَ سَعَدَّ ذَيْ مِيڧَا وَكَنْسَ جَمَعَرْ مَاسُبِے، تَذَمَ دَ دَرَجَ سُواْسَيْ بَاتَرٜىٰدَ وَنِ تَبُواْ كُواْ وَتَ عَلَمَرْ رَشِنْ ݣَنْ غَنِ بَ، تَكُمَ ذَمَ دَ ڟَرْكِے، مَرَرْ لَيْڢِے كُمَ؞

28تَهَكَ يَا كَمَاتَ مَظَا سُڧَوْنَثِ مَاتَنْسُ كَمَرْ يَدَّ سُكٜىٰ ڧَوْنَرْ جِكِنْسُ؞ أَيْ، وَنْدَ يَڧَوْنَثِ مَاتَرْسَ، يَڧَوْنَثِ كَنْسَ كٜىٰنَنْ؞

29دُواْمِنْ بَاوَنْدَ يَتَٻَ ڧِنْ جِكِنْسَ، سَيْدَيْ يَثِيَرْ دَشِ يَكُلَ دَشِ سُواْسَيْ كَمَرْ يَدَّ أَلْمَسِيحُ يَكٜىٰ كُلَدَ جَمَعَرْ مَاسُبِنْسَ؞

30غَمَا مُو غَٻُواْٻِنْ جِكِنْسَ نٜىٰ؞

31كَمَرْ يَدَّ يَكٜىٰ أَرُبُوثٜىٰ ثٜىٰوَ «سَبُواْدَ حَكَ مُتُمْ ذَيْ بَرْ مَامَرْسَ دَ بَابَنْسَ، يَمَنّٜىٰوَ مَاتَرْسَ، سُو بِيُ سُذَمَ جِكِے طَيَ؞»

32وَنَّنْ أَسِيرِ نٜىٰ مَيْ ظُرْڢِ؞ نِے كُوَ إِنَ نُڢِنْ أَلْمَسِيحُ دَ جَمَعَرْ مَاسُبِينٜىٰ؞

33دُكْدَهَكَ دَيْ، مَغَنَرْ تَا شَاڢٜىٰكُ، كُو مَا؞ بَرِ كُواْوَنٜىٰ طَيَنْكُ يَڧَوْنَثِ مَاتَرْسَ كَمَرْ كَنْسَ، عِتَ مَاتَرْ كُوَ تَغِرْمَمَ مِجِنْتَ؞

← Chapter 4 Jump to: Chapter 6 →