Leviticus 24

hadiyya

← Chapter 23 Jump to: Chapter 25 →

1Waa'im Muse'ena

2«kworonne yoo caakki hundi ammanem caakkukkuuyyi hee'oo'isa issimmina ciinsamaa mararammaakkoo muccur wee'l zayta kiina eebbona Isra'ee'l minaadaba ijaaje.

3Aaroon hiimiinsi uulli soodeebe'e Keesammi Dukkaa'n woronne yoo Hidi'l Sagar yoo Saaxi'n illagenne yoo du'm eddechchiinsi biireen i illagenne gudisona. Oohim heer heerina ki'nnuwwi shumo'ina ihoo seer ihona.

4Aaroon oo caakki muccur worqiinsi baxamaakkoo caakka dissakkam mu'utanne i illagenne hundi ammanem caakkoo'isa egerookko.

5«Tommoo lam kiilo'i danaam qamaa massitaa tommoo lam qorosho'oo sare.

6Ee qorosho'om i illagenne yoo worqa goolabakko'oo xaraphpheezanne lohoo mat kollonne gatu lohoo odim mulli kollonne lam ogoranne disse.

7Iina hincaakkoo keesamaakkoo qorosho'i ihukkisa tiirakkamisina muccur aduruusa lamem ogorannem disse.

8Aaroon Isra'ee'l minaadaba bikkaa ee qorosho'o hundi ammanem saantina saantina Usheexxaxxi ballanne i illagenne dissona; kukim Isra'ee'l minaadab heer heerina egerimmi hasisoo hidi'l sagara.

9Oo qorosho'i Aarooninaa ixxi shumo'inaa sharada; ixxuwwim eekka keesamaakkoo beyyonne ittona; oohim iina lobakata keesamaakkoo shokkoo kitim ihaa hincaa lasage qeessuwwina annanni ihaakkoo hundi amma'n sharad ihookko» yukko.

10Anninnee Gibxichcho amannee mat Isra'ee'l manchi hee'ukko; ixxi amam Daan sulliinsi Xiibir landichcho Saaloomiitette hee'llo'o. Oo manchi Isra'ee'l lambe'enne aagaa mat Isra'ee'l manchinne wocamukko; ee wocanchi lambe'ennem Waa'ika summa duumu bikkina Muse'e beyyo eebbo'o.

12Ixxonne issitam luwwa Waa'i ixxuwwina caakkiiseebe'e waardiyyinne egeramoo'isa issito'o.

13Waa'i Muse'ena «Ee mancho wiiddaniinsi tochchonne fisse; duumukkuuyyi macceesso'i manni hundim oo manchi hawwodaakkoohan ihukkisa naqqasimmina annannichchim ee manchonne ixxuwwi anga issitona. Ee lasage Isra'ee'l minaadab hundim kininne aphphissa'a shitona.

15Isra'ee'l oosina ‹Ayyi manchim ixxi Waa'a duumulas baaxiilo baxu bikkina guzumo'amookko.

16I summa duumookkok ayyim lehona; minaadab hundim ixxo kininne aphphissa'a shitona; Isra'ee'l manniinsim ihukko waaraaniinsi i summa duumookkok lehona.

17« ‹Manna shoo manchi ayyim lehona.

18Mulli mannika fooraam diinate shukkok masalo'o uwwona; kido'i gatti ogorim foorina foo'l masalo'o yimma.

19Ayyi manchim mulli manchonne afisu hawwojji ixxonnem afona.

20Mulli manchika miqe iiqulas ixxi miqim iiqamona; mulli manchika ille fissulas ixxi illim firona; inqe iiqukkaannikim inqi iiqamona. Mulli mannanne mah hawwojjam afisulas eekka laboo hawwojji ixxonnem afona.

21Fooraam diinate shookkok shukkaanni qaxa miqona; ihukkaarem manna shookkok ixxi gagim lehona.

22Ku seer ki'nnuwwina Isra'ee'l minaadabinam ihukko ki'nnuwwinne hee'oo waaraanina awwaadoohan ihookko. An Waa'i ki'nnuwwina Moollanna› yihe» yukko.

23Muse'e ka hundam minaadabina kuraa gullaa lasage ee mancho amba'iinsi tochchonne fissita'a kininne aphphissa'a shito'o; ee'isinne Isra'ee'l minaadab Waa'i Muse'e ijaajukkisanne issito'o.

← Chapter 23 Jump to: Chapter 25 →