John 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Sa tapos makapangamuyo si Jesus, naglakat sia upod sa iya mga gintuton-an kag nagtabok sa Sapa sang Kidron. May hardin sa sadto nga lugar, kag si Jesus nagsulod didto upod sa iya mga gintuton-an.

2Karon si Judas nga traidor nakatultol man sini nga lugar, tungod kay sa masunson si Jesus kag ang iya mga gintuton-an nagatipon didto.

3Gani, si Judas nagkadto sa hardin nga may upod nga grupo sang mga soldado nga Romanhon kag mga gwardya sa Templo nga ginpadala sang pangulo nga mga pari kag sang mga Fariseo. May mga hinganiban sila, kag nagbitbit sang mga parol kag mga sulo.

4Dayon si Jesus nga nakahibalo sang tanan nga mahanabo sa iya, nagpalapit sa ila kag nagpamangkot, “Sin-o bala ang ginapangita ninyo?”

5Nagsabat sila, “Si Jesus nga taga-Nazaret.” Nagsiling si Jesus, “Ako amo sia.” Si Judas nga traidor nagatindog didto kaupod nila.

6Sang pagsiling ni Jesus sa ila, “Ako amo sia,” nag-isol sila kag nagkalatumba sa duta.

7Ginpamangkot sila liwat ni Jesus, “Sin-o gid bala ang inyo ginapangita?” Nagsiling sila, “Si Jesus nga taga-Nazaret.”

8Si Jesus nagsiling, “Ginsingganan ko na kamo nga ako amo sia. Gani, kon ako ang inyo ginapangita, pabay-i lang ninyo nga makahalin ining akon mga gintuton-an.” (

9Ginhambal niya ini agod matuman ang iya ginsiling, “O Amay, wala ako sing may nadula bisan isa lang sang tanan nga imo ginhatag sa akon.”)

10Dayon si Simon Pedro nga may espada, naggabot sini kag ginlabo ang suloguon sang Pinakamataas nga Pari, kag nautas ang iya tuo nga dulonggan. Ang ngalan sang suloguon amo si Malco.

11Si Jesus nagsiling kay Pedro, “Itagob ang imo espada! Nagahunahuna ka bala nga indi ko pag-imnon ang kupa sang pag-antos nga ginhatag sang Amay sa akon?”

12Dayon ang grupo sang mga soldado nga Romanhon kag ang ila kapitan kaupod sang mga gwardya nga Judio nagdakop kay Jesus. Gingapos nila sia

13kag gindala anay kay Anas, ang ugangan ni Caifas nga amo ang Pinakamataas nga Pari sadto nga tuig.

14Si Caifas amo ang naglaygay sadto sa mga pangulo sang mga Judio nga mas maayo na lang nga may isa ka tawo nga mapatay para sa tanan nga mga tawo.

15Si Simon Pedro kag ang isa pa ka gintuton-an nagsunod kay Jesus. Yadto nga gintuton-an kilala gid sang Pinakamataas nga Pari, gani nag-upod sia kay Jesus sa sulod sang hardin sang palasyo sang Pinakamataas nga Pari,

16samtang si Pedro iya nagpabilin sa gwa, sa may pwerta. Dayon yadtong gintuton-an nga kilala sang Pinakamataas nga Pari nagbalik sa gwa, ginhambal ang babayi nga nagabantay sang pwerta, kag ginpasulod si Pedro.

17Ang babayi nga nagabantay sang pwerta nagsiling kay Pedro, “Indi bala isa man ikaw sang mga gintuton-an sina nga tawo?” Si Pedro nagsabat, “Indi.”

18Matugnaw sadto, gani ang mga suloguon kag ang mga gwardya nagdabok sing kalayo sa mga uling kag nagtindog sa palibot sini sa pagpainit-init. Si Pedro nagpalapit kag nagtindog man didto upod sa ila, kag nagpainit-init.

19Ginpamangkot si Jesus sang Pinakamataas nga Pari nahanungod sang iya mga gintuton-an kag sang iya pagtulon-an.

20Si Jesus nagsabat, “Pirme ako naghambal sing hayag sa tanan. Nagpanudlo ako sa mga sinagoga kag sa Templo sa diin ang tanan nga mga Judio nagatilipon. Wala ako sing may ginhambal sa tago.

21Ngaa bala ginausisa ninyo ako karon? Pamangkuta ninyo ang mga nakabati sa akon. Pamangkuta sila kon ano ang ginsiling ko sa ila kay nakahibalo sila kon ano ang akon ginpanghambal.”

22Sang makasiling sini si Jesus, gintampa sia sang isa sang mga gwardya nga malapit sa iya kag ginsingganan, “Amo bala ina ang panabat mo sa Pinakamataas nga Pari?”

23Nagsabat si Jesus sa iya, “Kon nakasayop gid man ako sa akon ginpanghambal, pamatud-i ini sa tanan nga yari diri. Pero kon husto ako sa akon ginsiling, ngaa bala nga gintampa mo ako?”

24Dayon si Jesus nga nagapos sa gihapon ginpadala ni Anas kay Caifas nga Pinakamataas nga Pari.

25Si Pedro nagatindog pa didto nga nagapainit-init sa tupad sang dabok. Gani ang iban didto nagsiling sa iya, “Indi bala ikaw isa man sang mga gintuton-an sina nga tawo?” Si Pedro nagpanghiwala kag nagsiling, “Indi.”

26Ang isa sang mga suloguon sang Pinakamataas nga Pari, nga pariente sang tawo nga ang iya dulonggan gin-utas ni Pedro, nagpamangkot, “Indi bala nga ikaw atong nakita ko upod sa iya didto sa hardin?”

27Liwat si Pedro nagsiling, “Indi.” Kag sa amo nga tion nagpamalo ang manok.

28Nagapamanagbanag na sadto sang gindala nila si Jesus halin sa balay ni Caifas pakadto sa palasyo sang Gobernador. Wala magsulod ang mga pangulo sang mga Judio sa palasyo tungod kay indi sila luyag nga madagtaan, agod nga makakaon sila sang panihapon sa Piesta sang Pascua.

29Gani si Pilato nga gobernador, naggwa sa pagpakigkita sa ila kag nagpamangkot, “Ano bala ang panumbongon ninyo batok sini nga tawo?”

30Nagsabat sila, “Kon wala sia sing may nahimo nga krimen, wala namon sia kuntani pagdalha sa imo.”

31Si Pilato nagsiling sa ila, “Ti kamo mismo ang magdala kag maghukom sa iya suno sa inyo kasugoan.” Ang mga Judio nagsabat, “Indi tugot sa amon ang pagpatay sang tawo.” (

32Ini nahanabo agod matuman ang ginsiling ni Jesus kon ano nga sahi sang kamatayon ang iya pagaagumon.)

33Si Pilato nagsulod liwat sa palasyo, ginpatawag niya si Jesus kag ginpamangkot, “Ikaw bala ang hari sang mga Judio?”

34Si Jesus nagsabat, “Imo gid bala ini nga pamangkot ukon ginsugiran ka lang sang iban nahanungod sa akon?”

35Si Pilato nagsabat, “Ano ang dumdom mo, Judio bala ako? Ang imo mga kasimanwa kag ang ila pangulo nga mga pari amo ang nagtugyan sa imo sa akon. Ano bala ang nahimo mo?”

36Si Jesus nagsabat, “Ang akon ginharian indi sa sining kalibutan. Kon ang akon ginharian yari sa sining kalibutan, ang akon mga sumolunod magapakig-away kuntani, agod nga indi ako matugyan sa mga pangulo sang mga Judio. Pero ang akon ginharian indi sa sining kalibutan!”

37Gani si Pilato nagpamangkot sa iya, “Kon amo gali, hari ikaw?” Si Jesus nagsabat, “Ikaw ang nagsiling nga ako isa ka hari. Tungod sini nagpakatawo ako kag nag-abot sa kalibutan sa pagsaksi sa kamatuoran. Ang bisan sin-o nga yara sa kamatuoran nagapamati sang akon tingog.”

38Si Pilato nagpamangkot, “Ano bala ang kamatuoran?” Sang makasiling sini si Pilato, naggwa sia liwat sa mga Judio kag nagsiling sa ila, “Wala ako sing may nakita nga kabangdanan sa pagkondenar sa iya.

39Pero suno sa inyo kinabatasan, sa tagsa ka Piesta sang Pascua, nagahilway ako sa inyo sang isa ka binilanggo. Karon luyag bala ninyo nga hilwayon ko sa inyo ang hari sang mga Judio?”

40Nagsinggit sila sa iya, “Indi sia, kundi si Barrabas!” (Si Barrabas isa ka buyong.)

← Chapter 17 Jump to: Chapter 19 →