John 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sa tapos sini, si Jesus nagtaklad pakadto sa Jerusalem para sa piesta sang mga Judio.

2Didto sa Jerusalem, malapit sa Pwerta sang Karnero may isa ka punong nga sa Hebreo ginatawag Betzata kag ini ginalibutan sang lima ka portico.

3Madamo nga mga masakiton ang nagahiligda sa portico—mga bulag, mga piang kag mga paralitiko.

5May isa ka tawo didto nga nagamasakit sa sulod sang trayntay otso ka tuig.

6Nakita sia ni Jesus nga nagahigda didto, kag nahibaluan niya nga ini nga tawo nagmasakit sa amo na nga kadugayon, gani nagpamangkot si Jesus sa iya, “Luyag ka bala mag-ayo?”

7Ang masakiton nagsabat, “Sir, wala sing tawo nga nagadala sa akon sa punong kon ang tubig ginatublag, samtang nagatinguha pa lang ako sa paglusong ginaunahan na ako sang iban.”

8Si Jesus nagsiling sa iya, “Bangon ka, dalha ang imo banig kag maglakat.”

9Sa gilayon nag-ayo ang tawo sa iya masakit, gindala niya ang iya banig kag naglakat. Nahanabo ini sang Adlaw nga Inugpahuway.

10Gani ang mga pangulo sang mga Judio nagsiling sa tawo nga gin-ayo, “Adlaw ini nga Inugpahuway, kag batok sa aton Kasugoan nga magdala ka sang imo banig.”

11Nagsabat sia, “Ang tawo nga nag-ayo sa akon nagsiling sa akon, ‘Dalha ang imo banig kag maglakat.’”

12Ginpamangkot nila sia, “Sin-o bala ang tawo nga nagsugo sa imo sa pagdala sang imo banig kag sa paglakat?”

13Pero ang tawo nga gin-ayo wala makakilala kon sin-o si Jesus tungod sang madamo nga mga tawo sa sadto nga lugar. Naghalin si Jesus nga wala mahibaloi.

14Sang ulihi nakita sia ni Jesus sa Templo kag nagsiling sa iya, “Kita mo, maayo ka na subong. Indi ka na magpakasala, kay basi malain pa gid ang mahanabo sa imo.”

15Ang tawo naglakat kag iya ginsugiran ang mga pangulo sang mga Judio nga si Jesus amo ang nag-ayo sa iya.

16Tungod sini nagsugod sila sa paghingabot kay Jesus, bangod kay nagpang-ayo sia sa Adlaw nga Inugpahuway.

17Pero si Jesus nagsabat sa ila, “Ang akon Amay wala nagauntat sa pagpangabudlay kag ako dapat man magpangabudlay.”

18Tungod sining ginhambal ni Jesus, nagtinguha sing labi pa gid ang mga pangulo sang mga Judio sa pagpatay sa iya, kay indi lamang nga ginlapas niya ang kasugoan sa Adlaw nga Inugpahuway, kundi nagsiling pa sia nga ang Dios amo gid ang iya kaugalingon nga Amay, kag tungod sini nagapakigtupong sia sa Dios.

19Gani si Jesus nagsabat sa ila, “Nagasiling ako sa inyo sang matuod: ang Anak wala gid sing ginahimo nga iyaiya lamang, kundi ang iya nakita nga ginahimo sang Amay amo lamang ang iya ginahimo. Ang ginahimo sang Amay amo man ang ginahimo sang Anak.

20Kay ang Amay nagahigugma sa Anak kag nagapakita sa Anak sang tanan nga iya mismo ginahimo. Mas dalagku pa gid sang sa sini nga mga buhat ang ipakita sang Amay sa Anak, agod kamo tanan matingala.

21Kay subong nga ang Amay nagabanhaw sang mga minatay kag nagahatag sa ila sing kabuhi, sa amo man nga bagay ang Anak nagahatag sing kabuhi sa ila nga iya luyag hatagan.

22Wala man nagahukom ang Amay bisan kay sin-o. Pero ginhatag niya sa Anak ang bug-os nga awtoridad sa paghukom,

23agod nga pasidunggan sang tanan ang Anak subong man sang ila pagpasidungog sa Amay. Ang wala nagapasidungog sa Anak, wala man nagapasidungog sa Amay nga nagpadala sa iya.

24“Nagasiling ako sa inyo sang matuod: ang bisan sin-o nga nagapamati sang akon pulong kag nagatuo sa nagpadala sa akon, may kabuhi nga wala sing katapusan. Indi na sia paghukman, kundi nakasaylo na sia halin sa kamatayon pakadto sa kabuhi.

25Nagasiling ako sa inyo sang matuod: ang tion magaabot, kag nag-abot na, nga ang mga patay makabati sang tingog sang Anak sang Dios, kag ang mga nakabati magakabuhi.

26Subong nga ang Amay gid amo ang ginahalinan sang kabuhi, sa amo man nga bagay ginhimo niya nga ang Anak pagagikanan sang kabuhi.

27Kag ginhatag niya sa Anak ang awtoridad sa paghukom, tungod kay sia amo ang Anak sang Tawo.

28Indi kamo matingala sini, kay magaabot ang tion nga ang tanan nga mga patay makabati sang iya tingog,

29kag magagwa sila sa ila mga lulobngan. Ang mga nakahimo sang maayo pagabanhawon kag magakabuhi, kag ang nakahimo sang malaut pagabanhawon kag pagasilutan.

30“Wala gid ako sing sarang mahimo kon ako lang. Nagahukom lang ako suno sa ginasiling sang Dios sa akon, gani nga ang akon paghukom matarong tungod kay wala ako nagahimo sang akon luyag, kundi ang luyag sang nagpadala sa akon.

31“Kon ako ang nagasaksi nahanungod sa akon kaugalingon, ang akon pagpanaksi indi mabaton nga matuod.

32Pero may isa nga nagasaksi nahanungod sa akon, kag akon nahibaluan nga ang iya pagpanaksi nahanungod sa akon matuod.

33Kamo may ginpadala nga mga mensahero kay Juan, kag sia nagsugid sang kamatuoran.

34Ako wala nagakinahanglan sang panaksi sang tawo, kundi ginahambal ko lamang ini agod nga maluwas kamo.

35Si Juan kaangay sang isa ka suga nga nasindihan kag nagasiga, kag kamo naluyag sa pagkalipay sa iya kapawa sa malip-ot nga tion.

36Pero may nagasaksi nahanungod sa akon nga mas labi pa sang sa panaksi nga ginhatag ni Juan: ang mga buhat nga ginhimo ko amo ang mga buhat nga ginhatag sang akon Amay nga himuon ko. Ini nagasaksi nahanungod sa akon kag nagapamatuod nga ang Amay nagpadala sa akon.

37Kag ang Amay mismo nga nagpadala sa akon nagasaksi man nahanungod sa akon. Wala gid ninyo mabatii ang iya tingog, wala man ninyo makita ang iya guya.

38Ang iya pulong wala nagapabilin sa inyo mga tagipusoon, tungod kay indi kamo magtuo sa iya ginpadala.

39Ginatun-an ninyo ang mga Kasulatan kay nagahunahuna kamo nga sa sini inyo masapwan ang kabuhi nga wala sing katapusan. Kag ini nga mga Kasulatan nagasaksi nahanungod sa akon!

40Pero indi kamo luyag magpalapit sa akon agod sa pag-angkon sang kabuhi.

41“Wala ako nagapangita nga dayawon ako sang mga tawo.

42Pero nakilala ko kon sin-o kamo, nahibaluan ko nga sa inyo mga tagipusoon wala kamo sing paghigugma sa Dios.

43Nag-abot ako sa awtoridad sang akon Amay, kag kamo wala magbaton sa akon, pero kon may iban nga mag-abot sa iya kaugalingon nga awtoridad, inyo sia pagabatunon.

44Paano bala kamo makatuo sa akon? Luyag kamo nga dayawon sang isa kag isa, pero wala kamo nagatinguha sa pag-agom sang pagdayaw gikan sa isa lamang ka Dios.

45Indi kamo maghunahuna nga ako ang magasumbong sa inyo sa akon Amay. Si Moises nga ginalauman ninyo amo ang magasumbong sa inyo.

46Kon nagtuo kamo kay Moises, kuntani nagtuo man kamo sa akon, kay nagsulat sia nahanungod sa akon.

47Pero kay wala kamo magtuo sang iya ginsulat, paano bala ang pagtuo ninyo sa akon mga pulong?”

← Chapter 4 Jump to: Chapter 6 →