John 21

Ilonggo (Maayong Balita nga Biblia (2012))

← Chapter 20 Jump to:

1Sa tapos sini, si Jesus nagpakita liwat sa iya mga gintuton-an didto sa Linaw sang Tiberias. Amo ini ang paagi sang iya pagpakita.

2Naghiliupod si Simon Pedro, si Tomas (nga gintawag ang Kapid), si Natanael (nga taga-Cana sa Galilea), ang mga anak ni Zebedeo, kag ang duha pa gid ka mga gintuton-an ni Jesus.

3Si Simon Pedro nagsiling sa ila, “Mangisda ako.” Nagsiling sila sa iya, “Maupod kami sa imo.” Gani naglakat sila kag nagsakay sa sakayan, pero sa sadto nga gab-i wala gid sila sing may nakuha.

4Sang nagabutlak na ang adlaw, si Jesus nagatindog sa baybayon, pero ang mga gintuton-an wala makakilala nga si Jesus yadto.

5Dayon nagpamangkot sia sa ila, “Mga abyan, may kuha bala kamo?” “Wala gid,” sabat nila.

6Nagsiling sia sa ila, “Iladlad ninyo ang inyo pukot sa tuo nayon sang sakayan, kag may makuha kamo.” Gani ginladlad nila ang pukot kag karon indi na sila makasarang sa pagbatak sini tungod kay sa pagkadamo sang ila nakuha nga isda.

7Ang gintuton-an nga hinigugma ni Jesus nagsiling sa kay Pedro, “Ang Ginoo ini!” Sang pagkabati ni Simon Pedro nga ang Ginoo yadto, gintampi niya ang iya bayu (kay gin-uba niya ini samtang nagaobra sia) kag naglumpat sa tubig.

8Pero ang iban nga mga gintuton-an nga yadto sa sakayan nagdungka nga nagabutong sang pukot nga puno sang mga isda, kay ang ila kalayuon sa baybayon mga singkwenta man lang ka dupa.

9Sang nakatakas sila, nakita nila ang nagatumpok nga baga didto nga may ginasugba nga isda, kag may pila ka tinapay.

10Dayon si Jesus nagsiling sa ila, “Dala kamo diri sang isda nga bag-o lang ninyo nakuha.”

11Gani si Simon Pedro nagsaka sa sakayan kag ginbutong niya ang pukot pa higad nga puno sang dalagku nga mga isda nga ang kadamuon 153 ka bilog. Wala magisi ang pukot bisan tama ini kadamo.

12Si Jesus nagsiling sa ila, “Dali kamo kag magpamahaw.” Karon wala gid sing isa sang mga gintuton-an nga nangahas sa pagpamangkot sa iya, “Sin-o bala ikaw?” tungod kay nakilala nila nga sia amo ang Ginoo.

13Gani nagpalapit si Jesus, nagkuha sang tinapay, kag ginhatagan sila. Amo man ang ginhimo niya sa isda.

14Ikatlo na ini nga tion sang pagpakita ni Jesus sa iya mga gintuton-an sa tapos sia mabanhaw.

15Sang nakapamahaw na sila, nagsiling si Jesus kay Simon Pedro, “Simon, anak ni Juan, ginahigugma mo bala ako sing labi pa sini sa ila?” Nagsabat sia, “Huo, Ginoo, nakahibalo gid ikaw nga ako nagahigugma sa imo.” Si Jesus nagsiling sa iya, “Tatapa ang akon mga kordero.”

16Sa ikaduha nga tion si Jesus nagsiling sa iya, “Simon, anak ni Juan, ginahigugma mo bala ako?” Nagsabat sia, “Huo, Ginoo, nakahibalo gid ikaw nga ako nagahigugma sa imo.” Si Jesus nagsiling sa iya, “Tatapa ang akon mga karnero.”

17Sa ikatlo nga tion nagsiling si Jesus sa iya, “Simon, anak ni Juan, ginahigugma mo bala ako?” Si Pedro nagkasubo tungod kay katatlo na sia pamangkuton ni Jesus, “Ginahigugma mo bala ako?” Kag nagsiling si Pedro sa iya, “Ginoo, ikaw nakahibalo sang tanan, kag ikaw nakahibalo gid nga ako nagahigugma sa imo!” Si Jesus nagsiling sa iya, “Tatapa ang akon mga karnero.

18Nagasiling ako sa imo sing matuod: sang ikaw bataon pa, nagailis ka sang imo bayu kag nagakadto sa bisan diin nga luyag mo, pero kon tigulang ka na, untayon mo ang imo mga kamot, kag iban na ang magapailis sa imo kag magadala sa imo sa diin indi ka luyag magkadto.”

19(Ginsiling ini ni Jesus sa pagpahayag kon sa ano nga paagi mapatay si Pedro, kag magapasidungog sa Dios.) Dayon nagsiling si Jesus sa iya, “Sunod ka sa akon!”

20Nagliso si Pedro kag iya nakita nga nagasunod sa ila ang hinigugma nga gintuton-an ni Jesus, sia nga nakasandiay gid sa iya sang sila nagapanihapon. Nagpamangkot sia kay Jesus, “Ginoo, sin-o bala ang magaluib sa imo?”

21Sang pagkakita ni Pedro sa iya, nagpamangkot sia kay Jesus, “Ginoo, ano bala ang madangatan sini nga tawo?”

22Si Jesus nagsabat sa iya, “Kon luyag ko nga magpabilin sia nga buhi tubtob sa akon pagbalik, ano bala ina sa imo? Sunod ka sa akon!”

23Gani naglapnag ang balita sa mga sumolunod ni Jesus nga yadtong gintuton-an indi mapatay. Pero si Jesus wala magsiling sa iya nga indi sia mapatay, kundi nagsiling sia, “Kon luyag ko nga magpabilin sia nga buhi tubtob sa akon pagbalik, ano bala ina sa imo?”

24Ini sia amo ang gintuton-an nga nagpamatuod kag nagsulat sini nga mga butang, kag amon nahibaluan nga ang iya ginasiling matuod.

25Karon, may madamo pa nga mga butang nga ginhimo si Jesus. Kon isaisahon sila tanan sulat, ginabanta ko nga indi mag-igo sa bug-os nga kalibutan ang mga libro nga pagasulaton.

← Chapter 20 Jump to: