Micah 1

Ilonggo (Maayong Balita nga Biblia (2012))

Jump to: Chapter 2 →

1Ang Ginoo naghatag sini nga mensahe kay Miqueas nga taga-Moreset, sa mga panahon sang paghari ni Jotam, ni Acaz, kag ni Ezequias sang Juda. Ang Ginoo nagpahayag kay Miqueas sini tanan nga mga butang nahanungod sang Samaria kag Jerusalem.

2Pamatii ninyo ini, tanan kamo nga mga kapungsoran, pamatii ninyo ini, tanan kamo nga nagaestar sa duta! Ang Ginoo nga Gamhanan magasaksi batok sa inyo. Pamatii ninyo! Nagahambal sia gikan sa iya templo sa langit.

3Ang Ginoo nagapadulong gikan sa iya balaan nga lugar, magapanaog sia kag magalakat sa putokputokan sang mga kabukiran.

4Dayon ang mga kabukiran matunaw sa idalom niya kaangay sang kandila sa kalayo. Magailig ini sa mga kapatagan kaangay sang tubig nga nagailig sa bakulod.

5Ini tanan mahanabo tungod kay ang mga tawo sang Israel nagpakasala kag nagbato sa Dios. Sin-o ang basulon tungod sang pagbato sang Israel? Ang mga tawo sang Samaria! Sin-o ang nakasala paagi sa pagsimba sa diosdios sa Juda? Ang mga tawo sang Jerusalem!

6Gani ang Ginoo nagasiling, “Himuon ko ang Samaria nga tinumpukan sang mga ginub-an didto sa wayang, ang lugar nga talamnan sang ubas. Iula ko sa mga kapatagan ang mga nagkalabuka nga mga bato sang siudad, agod maghawan ang mga sadsaran sang siudad.

7Ang tanan niya nga ginapakamahal nga mga diosdios magakalabuka kag ang tanan nga ginhatag sa mga babayi nga nagabaligya sang ila dungog sa templo pagasunogon sa kalayo, kag ang tanan nga mga estatwa manginmamingaw nga tinumpukan. Naangkon ini nga mga butang sang Samaria tungod sang iya mga pagsimba sa mga dios kag karon ang iya mga kaaway magadala sini sa bisan diin nga mga lugar para sa mga babayi nga nagabaligya sang ila dungog sa templo.”

8Dayon si Miqueas nagsiling, “Tungod sini magapangasubo ako kag magapanalambiton. Magadayandayan ako nga hublas kag magatiniil lamang sa pagpakita sang akon kasubo. Magauwang ako kaangay sang talunon nga ido kag magasiyak kaangay sang ostrit.

9Kay ang mga pilas sang Samaria indi na magpali. Si Juda madali na lang mag-antos sang amo man nga mga pilas kag ang kalaglagan yara na sa mga pwerta mismo sang Jerusalem, sa diin ang akon mga tawo nagaestar.”

10Indi pagsugiri ang aton mga kaaway sa Gat nahanungod sang aton pagkalutos. Indi pag-ipakita sa ila ang inyo paghibi. Mga taga-Bet-leapra ipakita ang inyo kasubo paagi sa pagligidligid sa yab-ok!

11Mga pumoluyo sang Safir, magpabihag kamo nga hublas kag nahuy-an. Ang mga nagaestar sa Zaanan indi gid magpangahas sa paggwa sa ila siudad. Kon inyo mabatian nga ang mga tawo sang Betezel nagapangalisod, mahibaluan ninyo nga wala sing dalangpan didto.

12Ang mga pumoluyo sang Marot nagahulat nga may pagkalangkag nga mag-ayo tungod kay ang Ginoo dali na gid lang magdala sing kalalat-an sa Jerusalem.

13Kamo nga nagaestar sa Lakis, takdi sing mga karwahi ang mga kabayo. Ginsunod ninyo ang mga sala nga nahimo sang Israel, gani kamo ang nanginkabangdanan sang pagpakasala sang Jerusalem.

14Kag karon, mga pumoluyo sang Juda, magpaalam na kamo sa banwa sang Moreset-gat. Ang mga hari sang Israel indi makakuha sing bulig sa banwa sang Aczib.

15Mga pumoluyo sang Maresa, ang Ginoo magatugyan sa inyo sa kaaway nga magaagaw sang inyo banwa. Ang mga pangulo sang Israel magapanago sa kweba sang Adulam.

16Mga pumoluyo sang Juda, magpakiskis kamo sang inyo mga ulo sa paglalaw sa mga kabataan nga inyo ginahigugma. Magpabulog kamo kaangay sang agila, tungod kay ang inyo mga kabataan pagakuhaon sa inyo kag pagabihagon.

Jump to: Chapter 2 →