Micah 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Pamatii ninyo ang ginasumbong sang Ginoo batok sa Israel. Magtindog ka, O Ginoo, kag ihambal ang imo panumbongon. Pabatia ang mga kabukiran kag kabakuloran sang imo ginahambal.

2Mga bukid, kamo nga mga sadsaran sang duta sa walay katubtoban, pamatii ninyo ang panumbongon sang Ginoo! Ang Ginoo may panumbongon batok sa iya mga tawo. Isumbong niya ang Israel.

3Ang Ginoo nagasiling, “Mga tawo ko, ano bala ang nahimo ko sa inyo? Paano bala ako nanginpalas-anon ninyo? Sabta ninyo ako.

4Gindala ko kamo paggwa halin sa Ehipto. Ginluwas ko kamo sa pagkaulipon. Ginpadala ko si Moises, si Aaron kag si Miriam sa pagpangulo sa inyo.

5Mga tawo ko, dumdoma ninyo kon ano ang ginplano ni Haring Balak nga taga-Moab nga himuon sa inyo, kag kon ano ang ginsabat sa iya ni Balaam nga anak ni Beor. Dumdoma ang nagkahanabo sa dalanon halin sa kampo sang Akasya tubtob sa Gilgal. Dumdoma ninyo ini nga mga butang agod matalupangdan ninyo kon ano ang ginhimo ko sa pagluwas sa inyo.”

6Ano bala ang dalhon ko sa Ginoo, ang Dios sang langit, kon magkadto ako sa pagsimba sa iya? Magadala bala ako sang labing matambok nga mga tinday sang baka nga sunogon subong mga halad sa iya?

7Malipay bala ang Ginoo kon dalhan ko sia sing linibo nga mga karnero, ukon wala nagauntat nga pag-ilig sang lana sang olivo? Ihalad ko bala sa iya ang akon panganay nga anak sa pagbayad sang akon mga sala?

8Indi, ang Ginoo nagsiling sa aton kon ano ang maayo. Amo ini ang ginapangayo niya sa aton: sa paghimo sang matarong, sa pagpakita sang malig-on nga paghigugma, kag sa pagkabuhi nga nagatuman sa gihapon sang kabubot-on sang Dios.

9Maayo ang magtahod sa Ginoo. Nagapanawag sia sa siudad, “Pamati kamo, mga tawo nga nagatipon sa siudad.

10Sa mga balay sang malaut nga mga tawo may mga manggad nga ila nakuha sa indi husto nga paagi. Nagagamit sila sang indi husto nga mga sulokban, ang butang nga akon ginakaakigan.

11Mapatawad ko bala ang mga tawo nga nagagamit sang indi husto nga mga talaksan kag timbangan?

12Ang manggaranon nga mga tawo sang siudad nagapamintaha sa mga imol, kag tanan kamo mga butigon.

13Gani karon sugoran ko na ang paglaglag sa inyo tungod sang inyo mga sala.

14Magakaon kamo, pero indi kamo mabusog. Ang matuod gutom pa kamo gihapon. Magadala kamo sang mga pagkabutang agod indi ini maano, pero mapierde man ini sa gihapon. Ang bisan ano nga supton ninyo pagalaglagon ko sa inaway.

15Magasab-og kamo, sang binhi pero indi makaani. Magalana kamo sing olivo, pero indi kamo makagamit sini. Magahimo kamo sing bino, pero indi kamo makainom sini.

16Ginsunod ninyo ang malaut nga ginpanghimo ni Haring Omri kag ni Haring Acab nga iya anak. Ginpadayon ninyo ang ila mga pagsulondan, gani pagalaglagon ko kamo, kag ang tanan ninyo nga mga tawo mangintalamayon. Ang mga katawhan bisan diin magatamay sa inyo.”

← Chapter 5 Jump to: Chapter 7 →