Micah 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Mga pumoluyo sang Jerusalem, tipuna ang inyo mga hangaway! Ginakibon kita! Ginasalakay nila ang pangulo sang Israel!

2Ang Ginoo nagasiling, “Betlehem Efrata, ikaw ang isa sang pinakadiutay nga mga banwa sang Juda. Pero gikan sa imo magadala ako sing isa ka pangulo para sa Israel nga ang iya mga katigulangan halin pa sang una nga mga panahon.”

3Gani ang Ginoo magatugyan sang iya mga tawo sa ila mga kaaway tubtob ang babayi nga amo ang magaanak makabata na sang isa ka lalaki. Dayon ang mga Israelinhon nga yadto didto sa pagkabihag magabalik sa ila kaugalingon nga mga kasimanwa.

4Kon mag-abot sia, pagagamhan niya ang iya mga tawo sang gahom nga nagagikan sa Ginoo, kag sang pagkahalangdon sang Ginoo nga iya Dios mismo. Ang iya mga tawo magaestar nga wala sing katalagman, tungod kay ang mga tawo sa bug-os nga duta magakilala sang iya pagkagamhanan,

5kag sia magapaluntad sang paghidait. Kon ang mga Asiriahanon maggubat sang aton pungsod kag magsalakay sang aton mga pamakod, ipadala naton ang aton labing isganan nga mga pangulo sa pagpakig-away sa ila.

6Kag paagi sa ila mga espada pagalutoson nila ang pungsod sang Asiria, ang duta ni Nimrod. Sila magaluwas sa aton gikan sa mga Asiriahanon kon maggubat sila sang aton duta.

7Ang mga Israelinhon nga mabilin manginkaangay sang mabugnaw nga tun-og nga ginpadala sang Ginoo para sa madamo nga mga pungsod, kaangay sang ulan sa nagatubo nga mga tanom. Magasalig sila sa Dios, kag indi sa tawo.

8Ang iban nga mga Israelinhon nga mabilin sa mga pungsod kaangay sang isa ka leon nga nagaluyong sa pagpangita sing kalan-on sa kagulangan ukon halalban: ginakadtuan niya ang mga karnero, ginadakop kag ginagus-ab sila—kag wala sing paglaom nga may makatabang sa ila.

9Ang Israel magalutos sang iya mga kaaway kag magapamatay sa ila tanan.

10Ang Ginoo nagasiling, “Sa sadto nga tion pagakuhaon ko ang imo mga kabayo kag gub-on ko ang imo mga karwahi.

11Gub-on ko ang mga siudad sang imo duta kag rumpagon ko ang imo mga pamakod.

12Papason ko ang imo mga manugbabaylan kag ang imo mga manugpakot.

13Laglagon ko ang imo mga diosdios kag ang balaan nga mga haligi nga imo ginasimba. Indi ka na magsimba sa mga butang nga imo ginhimo.

14Tumbahon ko ang mga estatwa sang diosa nga si Asera sa imo duta kag laglagon ko ang imo mga siudad.

15Kag sa akon daku nga kaakig magatimalos ako sa tanan nga mga pungsod nga wala magtuman sa akon.”

← Chapter 4 Jump to: Chapter 6 →