Micah 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Magpamati kamo, mga pangulo sang Israel! Kamo kuntani ang dapat magpaluntad sang katarungan,

2pero ginadumtan ninyo ang maayo kag ginahigugma ang malaut. Ginapanitan ninyo nga buhi ang akon mga tawo kag ginaak-ak ninyo ang unod sa ila mga tul-an.

3Ginausap ninyo ang akon mga tawo. Ginapanitan ninyo sila, ginabalbag ninyo ang ila mga tul-an, kag ginalasa sila kaangay sang karne nga lalagaon.

4Ang tion magaabot nga kamo magapanawag sa Ginoo, pero indi sia magsabat sa inyo. Indi sia magpamati sa inyo mga pangamuyo, kay naghimo kamo sing malaut.

5Ang akon mga tawo gindayaan sang mga propeta nga nagsaad sing paghidait sa mga nagbayad sa ila, pero nagpamahog nga magaabot ang inaway sa mga wala magbayad sa ila. Sa sini nga mga propeta ang Ginoo nagasiling,

6“Tungod kay ginapatalang ninyo ang akon mga tawo, indi na kamo makakita sing mga palanan-awon, kag indi na kamo makahibalo sang palaabuton. Mga propeta, ang inyo mga inadlaw dali na lang matapos, nagahinunod na ang adlaw para sa inyo.”

7Ang mga nagatagna sang palaabuton mahuy-an kay mapaslawan sila. Mahuy-an sila tungod kay ang Dios wala nagahatag sa ila sang ila mga ginapangayo.

8Pero nahanungod sa akon, ang Ginoo nagapuno sa akon sang iya Espiritu kag gahom, kag nagahatag sa akon sing nagakaigo nga paghukom kag kaisog sa pagsugid sa mga tawo sang Israel kon ano ang ila mga sala.

9Pamati kamo, mga pangulo sang Israel, kamo nga nagadumot sang katarungan kag nagahimo sang matarong nga malaut.

10Ginapatindog ninyo ang siudad sang Dios, ang Jerusalem, sa sadsaran sang pagpamatay kag pagkadi-matarong.

11Ang mga pangulo sang siudad nagadumala tungod sa mga hamham, ang mga pari nagasaysay sang Kasugoan tungod sang bayad, ang mga propeta nagawali tungod sa kwarta—kag tanan sila nagasiling nga ang Ginoo kaupod nila. Nagasiling sila, “Indi bala ang Ginoo kaupod naton? Wala sing malain nga magaabot sa aton.”

12Gani, tungod sa inyo, ang Sion pagaaraduhon kaangay sang talamnan, ang Jerusalem mangintinumpokan sang ginub-an, kag ang bukid sa diin yara ang Templo manginkagulangan.

← Chapter 2 Jump to: Chapter 4 →