Romans 1

Ilonggo (Maayong Balita nga Biblia (2012))

Jump to: Chapter 2 →

1Ako si Pablo nga alagad ni Cristo Jesus, kag isa ka pinili nga apostol kag gintawag sang Dios sa pagwali sang iya Maayong Balita.

2Ining Maayong Balita ginsaad sang Dios sang una pa gid paagi sa iya mga propeta, kag nasulat sa Balaan nga mga Kasulatan.

3Nahanungod ini sa iya Anak, ang aton Ginoong Jesu-Cristo: kon nahanungod sa iya pagkatawo, kaliwat sia ni David,

4pero ang Espiritu Santo nagpamatuod nga si Jesus amo ang gamhanan nga Anak sang Dios tungod kay ginbanhaw sia gikan sa kamatayon.

5Paagi sa iya ginhatag sang Dios sa akon ang prebilihiyo nga mangin-isa ka apostol bangod lamang kay Cristo, agod nga matuytoyan ko ang mga tawo sa bug-os nga kalibutan sa pagtuo kag sa pagtuman.

6Ini nagalakip man sa inyo nga yara sa Roma nga ginatawag sang Dios agod mangin-iya ni Jesu-Cristo.

7Gani nagasulat ako sa inyo tanan nga yara sa Roma nga ginahigugma sang Dios kag gintawag nga mangin-iya kaugalingon nga katawhan: Kabay nga ang Dios nga aton Amay kag si Ginoong Jesu-Cristo magmanginmaayo sa inyo kag maghatag sa inyo sang paghidait.

8Una sa tanan, nagapasalamat ako sa akon Dios paagi kay Jesu-Cristo para sa inyo tanan, tungod kay ang inyo pagtuo ginabantog sa bug-os nga kalibutan.

9Ang Dios nga ginaalagad ko sa bug-os nga tagipusoon, paagi sa pagwali sang Maayong Balita nahanungod sa iya Anak, amo ang akon saksi nga ang akon ginasiling matuod. Nakahibalo gid sia nga akon kamo ginadumdom sa gihapon

10sa tagsa ko ka pagpangamuyo. Nagapangayo ako sa Dios nga sa iya pagbuot matigayon gid ang akon pagduaw karon sa inyo.

11Kay daku gid ang akon handom sa pagpakigkita sa inyo, agod mapaambit ko kamo sang bugay nga espirituhanon sa pagpalig-on sa inyo.

12Ang buot ko silingon nga kita magbinuligay. Pabakuron ko kamo paagi sa akon pagtuo kag subong man ako paagi sa inyo pagtuo.

13Mga utod, luyag ko nga mahibaluan ninyo ini, nga madamo nga beses nagplano ako sa pagduaw sa inyo, pero pirme lang ako may kasablagan. Luyag ko man nga ang mga tawo dira akon madaog para kay Cristo, subong sang akon ginhimo sa iban nga mga Hentil.

14Kay may katungdanan ako sa tanan nga mga tawo, sa mga Griego kag sa mga barbaro, sa mga edukado kag sa mga ignorante.

15Gani, daku ang akon handom sa pagwali sang Maayong Balita sa inyo man nga nagaestar sa Roma.

16Ang akon pagsalig sa Maayong Balita bug-os gid. Ini amo ang gahom sang Dios sa pagluwas sang tanan nga nagatuo, nahauna ang mga Judio kag dason ang mga Hentil.

17Kay ginapahayag sang Maayong Balita kon paano ginabaton sang Dios ang mga tawo nga may pagtuo, sila lamang nga nagatuo. Suno sa ginasiling sang kasulatan, “Ang mga tawo nga ginabaton sang Dios paagi sa pagtuo magakabuhi.”

18Ang kaakig sang Dios ginapahayag halin sa langit batok sa tanan nga kasal-anan kag kalautan sang mga tawo. Ang ila malaut nga mga pagginawi nagaupang sa pagkilala sang kamatuoran.

19Ginasilutan sila sang Dios, tungod kay ang sarang mahibaluan sang mga tawo nahanungod sa Dios maathag para sa ila. Ang Dios gid amo ang nagpaathag sini sa ila.

20Sugod pa gid sang pagtuga sang Dios sang kalibutan, ang iya wala sing katapusan nga gahom kag diosnon nga ugali, bisan indi makita, napahayag na sing maathag sa mga tawo paagi sa mga butang nga iya gintuga. Gani wala sila sing bisan ano nga ibalibad.

21Bisan nakilala nila ang Dios, wala sila nagapasidungog kag nagapasalamat sa iya. Sa baylo, nanginwalay pulos ang ila mga panghunahuna kag ang ila kalong nga mga ulo napuno sang kadudulman.

22Nagapakaalam sila, pero mga buangbuang.

23Sa baylo nga magsimba sila sa Dios nga di-mamalatyon, nagasimba sila sa mga imahen nga ginhimo kaangay sang mga tawo nga mamalatyon, mga pispis, mga sapat nga apat sing mga tiil ukon mga sapat nga nagakamang.

24Tungod sang pagkabuangbuang sang mga tawo, ginpabay-an sila sang Dios sa paghimo sing malaw-ay nga mga butang nga ginahandom sang ila mga tagipusoon, kag sa pagbuhat sang makahuloya nga mga butang sa pareho nila nga lalaki ukon babayi.

25Ginabayluhan nila sing kabutigan ang kamatuoran nahanungod sa Dios. Ginasimba kag ginaalagad nila ang mga tinuga sang Dios, kag indi ang Manunuga nga dalayawon sa gihapon! Kabay pa.

26Tungod kay ginahimo ini sang mga tawo, ginpabay-an sila sang Dios sa ila makahuloya nga mga balatyagon. Bisan pa ang mga babayi nagaginawi batok sa kinaugali, kay nagapakighilawas sila sa pareho nila nga babayi.

27Amo man ang mga lalaki, wala sila nagapakighilawas sa mga babayi, kay nagasilabo ang ila balatyagon sa pareho nila nga lalaki. Nagahimo sila sing makahuloya nga mga butang sa pareho nila nga lalaki, kag tungod sini nagabaton sila sa ila kaugalingon sang silot nga takos sa ila malain nga ginahimo.

28Tungod kay ang mga tawo indi magkilala sang kamatuoran nahanungod sa Dios, ginpabay-an niya sila sa ila mahigko nga mga panghunahuna, sa bagay nga ginahimo nila ang mga butang nga indi nila dapat himuon.

29Puno sila sang tanan nga sahi sang kalautan, kalainan, kadalok kag bisyo. Puno man sila sang kahisa, pagpamatay, pag-ilinaway, pagdinayaay kag mahigko mga panghunahuna. Nagapanglibak sila,

30nagabutangbutang, nagadumot sa Dios, nagapahambog, nagapabugal kag nagapalabilabi. Nagapangita sila sing iban pa gid nga paagi sa paghimo sing malaut. Wala sila nagatuman sa ila mga ginikanan,

31wala sila sing konsensya, wala nila ginatuman ang ila mga saad, kag wala sila nagapakita sing kaayo ukon kaluoy sa iban.

32Nakahibalo sila nga ang kasugoan sang Dios nagasiling nga ang mga katawhan nga nagakabuhi sing subong sini takos sang kamatayon. Wala sapayan sini, indi lamang sila nagapadayon sa paghimo sini nga mga butang, kundi ang malain pa gid, kay ginapakamaayo man nila ang mga nagahimo sini.

Jump to: Chapter 2 →

Recommended Reading

Commentary Romans Commentaries → Devotional Romans Devotional Guide → Get This Bible 2012 Study Bible →