Romans 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Batuna ninyo ang tawo nga maluya sa iya pagtuo, kag indi ninyo pagsuaya ang iya panghunahuna nga ginapabutyag.

2Ang pagtuo sang isa ka tawo nagatugot sa iya sa pagkaon sang bisan ano, pero ang tawo nga maluya sa iya pagtuo nagakaon sang utan lang.

3Ang tawo nga nagakaon sang bisan ano indi magtamay sa tawo nga wala nagakaon sang iban nga kalan-on. Kag ang nagakaon sang utan lang, indi magpakalain sa tawo nga nagakaon sang bisan ano, kay ang Dios nagbaton sa iya.

4Sin-o ka bala nga maghukom sang suloguon sang iban? Ang iya lamang Agalon amo ang magahukom kon bala ang iya ginahimo maayo ukon malain. Kag magahimo sia sing maayo, tungod kay ang Ginoo amo ang magabulig sa iya.

5Ang isa ka tawo nagakabig sang isa ka adlaw nga labi pa ka importante sang sa iban nga mga adlaw. Samtang ang isa ka tawo nagakabig nga palareho ang tanan nga mga adlaw. Ang tagsatagsa kinahanglan may human na nga panghunahuna.

6Ang nagapakamahal sang isa ka adlaw nagahimo sini sa pagpasidungog sa Ginoo. Ang nagakaon sang bisan ano nagahimo man sini sa pagpasidungog sa Ginoo, kay nagapasalamat sia sa Dios tungod sang iya ginakaon. Ang indi magkaon sang iban nga kalan-on nagahimo sini sa pagpasidungog sa Ginoo, kag nagapasalamat sia sa Dios.

7Kay wala sing bisan isa sa aton nga nagakabuhi ukon nagakamatay para sa iya kaugalingon lamang.

8Kon nagakabuhi kita, ini tungod kay nagakabuhi kita para sa Ginoo. Kag kon mapatay kita, ini tungod kay nagakamatay kita para sa Ginoo. Gani, bisan nagakabuhi kita ukon nagakamatay, iya kita sang Ginoo.

9Kay si Cristo napatay kag nabanhaw, agod nga mangin-Ginoo sia sang mga buhi kag sang mga patay.

10Gani, ikaw nga nagakaon sang utan lang, ngaa bala nga ginahukman mo ang imo utod? Kag ikaw man nga nagakaon sang bisan ano lang, ngaa bala ginatamay mo ang imo utod? Tanan kita magapangatubang sa Dios agod sa paghukom sa aton.

11Kay ang kasulatan nagasiling: “Siling sang Ginoo, samtang nagakabuhi ako, ang tagsatagsa magaluhod sa akon atubang, kag ang tagsatagsa magatuad nga ako amo ang Dios.”

12Gani, ang tagsatagsa sa aton magahatag sing husay sang iya kaugalingon sa Dios.

13Gani, untaton na naton ang paghukom sa isa kag isa. Sa baylo, amo ini ang aton himuon: indi kita maghimo sing bisan ano nga makapasandad kag makadala sang aton utod sa pagpakasala.

14Sa akon paghiusa kay Ginoong Jesus nakahibalo gid ako nga wala sing pagkaon nga sa iya kaugalingon indi matinlo. Pero kon ang isa ka tawo nagatuo nga ang iban nga pagkaon indi matinlo, ina indi manginmatinlo para sa iya.

15Kon bangod sang imo ginakaon, ginapilas mo ang balatyagon sang imo utod, ti wala ka nagaginawi suno sa paghigugma. Indi pagpabay-i nga ang pagkaon nga imo ginakaon, magalaglag sa tawo nga tungod sa iya si Cristo napatay!

16Indi ninyo paghatagi sing kahigayunan nga pakalainon sang iban ang inyo ginakabig nga maayo.

17Kay ang paghari sang Dios sa aton mga kabuhi wala sing kaangtanan sa pagkaon ukon sa ilimnon, kundi nahanungod sa pagkamatarong, paghidait kag kalipay nga ginahatag sang Espiritu Santo.

18Kag ang bisan sin-o nga nagaalagad kay Cristo sa sini nga paagi, ginakahamut-an sang Dios kag ginapakamaayo sang tawo.

19Gani, dapat naton tinguhaon sa gihapon ang mga butang nga nagadala sing paghidait kag nagabulig sa pagpalig-on sang tagsatagsa sa aton.

20Tungod lamang sang pagkaon, indi paglaglaga ang ginbuhat sang Dios. Sarang makaon ang tanan nga sahi sang pagkaon, pero indi maayo ang pagkaon sang bisan ano nga manginkabangdanan sang pagpakasala sang iban.

21Ang maayo nga butang nga himuon amo ang indi pagkaon sang karne ukon pag-inom sing bino, ukon ang paghimo sang bisan ano nga makapasandad sang imo utod.

22Gani, hupti sa imo kaugalingon kag sa Dios, ang imo ginatuohan nahanungod sini nga butang. Malipayon ang tawo nga sa iya kaugalingon wala nagabatyag nga sia nakasala, kon nagahimo sia sang iya ginapakamaayo nga himuon!

23Pero kon nagapangduhaduha sia nahanungod sang iya ginakaon, ang Dios nagakondenar sa iya kon ina iya ginakaon, tungod kay ang iya ginahimo wala napasad sa pagtuo. Kag ang bisan ano nga wala napasad sa pagtuo sala.

← Chapter 13 Jump to: Chapter 15 →