Romans 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Gani, ano bala ang bintaha sang mga Judio sa mga Hentil? Ukon ano bala ang pulos sang pagkatinuli para sa mga Judio?

2Madamo kaayo sa tanan nga bagay! Una sa tanan, gintugyan sang Dios ang iya mga mensahe sa mga Judio.

3Ano karon, kon ang iban sa ila indi matutom? Nagakahulogan bala nga ini ang kabangdanan nga ang Dios indi man magmatutom sa ila?

4Indi ina mahimo! Ang Dios masaligan sa gihapon sa iya mga pulong, bisan pa nga ang tanan nga mga tawo butigon, subong sang ginasiling sang kasulatan: “Agod mapamatud-an nga matarong ka sa imo mga ginahambal, dapat magdaog ka sa akusasyon batok sa imo, kon dalhon ka sa hukmanan.”

5Pero ano karon kon ang aton paghimo sing malain nagapakita pa gid sing maathag sa mga tawo nga ang Dios nagahimo sing matarong? Ano ang sarang naton masiling? Indi bala matarong ang ginahimo sang Dios kon iya kita ginasilutan? (Nagahambal ako subong tawo lamang.)

6Indi ina mahimo! Kon ang Dios indi matarong, paano bala ang paghukom niya sang kalibutan?

7Pero ano karon kon ang akon pagbutig nagapakita lamang sing maathag sang kamatuoran sang Dios agod mapasidunggan sia? Ngaa kondenahon pa gid ako subong isa ka makasasala?

8Karon, ngaa indi na lang kita magsiling, “Dali, mahimo kita sing malaut agod may maggwa nga maayo”? Bisan pa may mga tawo nga nagahambal nga amo ini ang akon ginsiling. Pero ang Dios matarong kag magahukom man sa ila.

9Karon, kita nga mga Judio mas maayo pa bala sang sa mga Hentil? Indi! Napahayag ko na nga ang mga Judio kag ang mga Hentil palareho lang nga yara sa idalom sang gahom sang sala.

10Kay ang mga Kasulatan nagasiling: “Wala gid sing bisan isa nga matarong,

11wala gid sing bisan isa nga nakahangop, ukon nagapangita sa Dios.

12Ang tanan nga mga tawo nagbiya sa Dios, nagsayop sila tanan. Wala sing may nagahimo sing maayo, wala gid bisan isa.

13Ang ila mga pulong napun-an sang makamamatay nga pagdaya, malaut nga mga kabutigan ang nagagwa sa ila mga dila, kag makatalagam nga mga pamahog: ang nagakawas sa ila mga bibig subong dalit sang man-og,

14puno sing mapait nga mga pagpakamalaut ang ila mga baba.

15Maabtik sila sa pagpanakit kag sa pagpamatay;

16bisan diin sila magkadto, kalaglagan kag kamusmosan ang ila ginabilin.

17Wala nila mahibal-i ang dalan sang paghidait,

18kag wala man sila nakatuon sa pagkahadlok sa Dios.”

19Karon nakahibalo kita nga ang bug-os nga Kasugoan para lamang sa mga nagakabuhi sa idalom sang Kasugoan, agod nga wala na sing ibalibad ang mga tawo, kag ang bug-os nga kalibutan madala sa idalom sang paghukom sang Dios.

20Kay wala sing tawo nga ginabaton sang Dios tungod sang iya pagtuman sang Kasugoan. Ang ginahimo sang Kasugoan amo ang pagpakilala sa tawo nga sia nakasala.

21Pero karon ang paagi sang Dios sa pagbaton sa mga tawo ginpahayag na, kag wala gid ini sing kaangtanan sa kasugoan, bisan pa ang Kasugoan ni Moises kag ang mga propeta nagapamatuod sini.

22Ginabaton sang Dios ang mga tawo paagi sa ila pagtuo kay Jesu-Cristo. Ginahimo ini sang Dios sa tanan nga nagatuo kay Cristo, tungod kay palareho lang ang tanan nga mga tawo:

23nagpakasala sila tanan kag malayo sa Dios nga nagaluwas.

24Pero tungod sang kaayo sang Dios ginabaton sila tanan paagi kay Cristo Jesus nga nagatubos sa ila, kag ini isa ka regalo sang Dios.

25Ginhalad sia sang Dios agod nga tungod sa iya dugo mapatawad ang mga sala sang mga tawo, paagi sa ila pagtuo sa iya. Ginhimo ini sang Dios agod sa pagpakita sang iya pagkamatarong. Sang una anay ang Dios nagpaumod kag wala magsapak sang mga sala sang mga tawo, pero sa sini nga panag-on ginasapak na niya ang ila mga sala sa pagpakita nga sia matarong. Sa sini nga paagi iya ginabaton ang tagsatagsa nga nagatuo kay Jesus.

27Karon, ano bala ang sarang naton mapabugal? Wala gid! Sa ano nga kabangdanan makapabugal kita? Tungod bala sa aton pagtuman sang Kasugoan? Indi, kundi tungod kay nagatuo kita.

28Gani makasiling kita nga ang isa ka tawo ginabaton sang Dios paagi sa iya pagtuo lamang, kag indi paagi sa pagtuman sang Kasugoan.

29Ukon ang Dios, Dios lang bala sang mga Judio? Indi bala nga sia Dios man sang mga Hentil? Siempre, huo e!

30Isa lamang ang Dios kag iya pagabatunon ang mga Judio tungod sang ila pagtuo kag ang mga Hentil tungod man sang ila pagtuo.

31Nagakahulogan bala ini nga ginasikway na naton ang Kasugoan tungod sini nga pagtuo? Wala gid! Sa baylo, ginapalig-on naton ang Kasugoan.

← Chapter 2 Jump to: Chapter 4 →