Romans 16

Ilonggo (Maayong Balita nga Biblia (2012))

← Chapter 15 Jump to:

1Luyag ko ipakilala sa inyo si Febe, ang aton utod nga babayi nga nagaalagad sa iglesia sa Cencreas.

2Batuna ninyo sia sa ngalan sang Ginoo, subong dapat himuon sang mga tumoluo, kag buligi ninyo sia sa iya mga kinahanglanon, kay sia gid nakabulig sa madamo nga mga tawo kag nakabulig man sia sa akon.

3Ginaabiabi ko si Priscila kag si Aquila, ang akon pareho nga mga manugpangabudlay sa pag-alagad kay Cristo Jesus.

4Ini sila nagtaya sang ila kabuhi sa katalagman para sa akon. Indi lamang ako, kundi man ang tanan nga kaiglesiahanan sang mga Hentil, may kabalaslan sa ila.

5Ginaabiabi ko man ang iglesia nga nagatipon sa ila balay. Ginaabiabi ko ang akon hinigugma nga abyan nga si Epeneto. Sia amo ang nahauna nga tawo sa probinsya sang Asia nga nagtuo kay Cristo.

6Pag-abiabi kay Maria nga nagpangabudlay sing tudotudo para sa inyo.

7Pag-abiabi kay Andronico kag kay Junia, mga kapareho ko man nga Judio nga nabilanggo upod sa akon. Kilala gid sila sang mga apostoles, kag una pa sila sa akon magcristohanon.

8Ginaabiabi ko si Ampliato, ang akon hinigugma nga abyan sa Ginoo.

9Pag-abiabi man kay Urbano, ang aton pareho nga manugpangabudlay sa pag-alagad kay Cristo, kag sa kay Staquis, ang akon hinigugma nga abyan.

10Pag-abiabi kay Apeles nga ang iya pagpakig-unong kay Cristo napamatud-an. Pag-abiabi sa katapo sang panimalay ni Aristobulo.

11Pag-abiabi kay Herodion, ang akon kapareho nga Judio, kag sa mga katapo sang panimalay ni Narciso nga mga Cristianos.

12Ginaabiabi ko si Trifena kag si Trifosa nga nagapangabudlay sa pag-alagdan sang Ginoo, kag sa akon hinigugma nga abyan nga si Persida nga nagapangabudlay sing tudo para sa Ginoo.

13Ginaabiabi ko si Rufo, ang bantog nga alagad sang Ginoo, kag ang iya iloy nga nagakabig gid sa akon subong anak.

14Pag-abiabi kay Asincrito, kay Flegonte, kay Hermes, kay Patrobas, kay Hermas kag sa tanan nga mga kautoran kay Cristo nga kaupod nila.

15Pag-abiabi kay Filologo kag kay Julia, kay Nereo kag sa iya utod nga babayi, kay Olimpas kag sa tanan nga mga tumoluo nga kaupod nila.

16Mag-abiabihay kamo subong mga mag-ulotod kay Cristo. Ang tanan nga mga iglesia nga iya ni Cristo nagaabiabi sa inyo.

17Mga utod, nagapakitluoy ako sa inyo, nga mag-andam kamo sa mga nagatuga sang pagbinahinbahin kag nagatublag sang pagtuo sang mga tumoluo, kag nagapamatok sa pagtulon-an nga inyo nabaton. Likawi ninyo sila.

18Kay ang mga nagahimo sina nga mga butang wala nagaalagad kay Cristo nga aton Ginoo, kundi sa ila lamang mga tiyan. Paagi sa ila matahom nga mga pulong kag mga pagdayawdayaw, ginapatalang nila ang mga panghunahuna sang mga tawo nga kulang sa ihibalo.

19Ang inyo pagkamatinumanon sa Maayong Balita nabantugan sa tanan nga mga tawo, kag tungod sini nagakalipay ako nahanungod sa inyo. Luyag ko nga magmaalam kamo nahanungod sa maayo, kag magmangin-inosente sa malaut.

20Kag ang Dios nga amo ang ginahalinan sang aton paghidait, madali na lang magdugmok kay Satanas sa idalom sang inyo mga tiil. Ang kaayo sang aton Ginoong Jesus manginyara sa inyo.

21Si Timoteo nga akon kapareho nga manugpangabudlay nagaabiabi sa inyo, amo man si Lucio, si Jason, kag si Sosipater, nga akon kapareho nga mga Judio.

22Ako, si Tercio, nga nagasulat sini nga sulat ni Pablo nagaabiabi sa inyo kay Cristo.

23Ang tagbalay nga si Gayo, nga sa iya balay nagatipon ang iglesia nagaabiabi sa inyo. Si Erasto, ang tesorero sang siudad, kag ang aton utod nga si Cuarto nagaabiabi sa inyo.

24Dayawon ta ang Dios! Sia nga sarang makapalig-on sa inyo pagtuo suno sa Maayong Balita nga akon ginawali nahanungod kay Jesu-Cristo, kag suno sa pagpahayag sang tinago nga kamatuoran nga nalipdan sa madugay nga mga panag-on halin pa gid sang una.

25Pero karon kay ang kamatuoran napahayag na paagi sa mga ginsulat sang mga propeta kag paagi sa sugo sang walay katapusan nga Dios, ini ginapakilala na sa tanan nga mga kapungsoran, agod nga ang tanan magtuo sa Dios kag magtuman sa iya.

26Sa Dios, nga amo lamang ang maalam, ihatag ang pagdayaw sa walay katapusan nga mga panag-on paagi kay Jesu-Cristo! Kabay pa.

← Chapter 15 Jump to: